Hechos 18 - Nuevo Testamento Toba Sombrero Negro

Pablo ue'ta di'me Corinto

¹ Ca'li yem da'me dojo', Pablo ca'e di'me Atenas qama'le yec'ata di'me Corinto.

² Nach'edi ua'a da'me uada'aguet ñe'me judío 'me lenaĝat Aquila jo'ne 'lachaqa' di'me aleua jo'ne Ponto. Ja cop'a ca'li Aquila nataq'aen jañe'me loua Priscila novi't chiyoĝotegue di'me Italia, nach'edi 'viyelaĝategue ca'li qa'a ñe'me jaliaĝanec Claudio damaĝajoĝolegue ca'li da'me qaedi ena'uaque ga'me judiopi queda'ae di'me Roma. Pablo yec'atalo ca'li, dejapichiyalo qama'le

³ queda'me nach'e ena'am ga'me jo'ne yayate'n 'me 'lonata'j jo'ne nach'ena ye't ga'me ualoq 'me machaĝaqui qama'le uetauelo jogaa'me qaedi t'onataĝa'n.

⁴ Qama'le nalochigui naa'me noloqo'ote 'me niyamaqataqa, Pablo yec'ata nale ga'me judiopi lemaĝaiqui', ua'a nale dojetac, jetaque yepaquetapega da'me 'ñemaĝachidiñe ga'me judiopi nataq'aen ga'me ja judiopi.

⁵ Ca'li Silas nataq'aen Timoteo yovi't chiyoqoda'a di'me Macedonia, Pablo yataqachiñe yema'eguet da'me 'yaĝatetac da'me 'naqataĝanaĝac nataq'aen yechoĝotetapema joga'me judiopi queda'me Jesús mach'e Dios Liquiyac.

⁶ Qalaĝaja jogaa'me paja'a nalo'ta't da'me qonauteneguet nataq'aen queda'me qoye'uetac; chane'eja Pablo nechiyoĝodiñe ga'me leuo en 'lanec da'me licoqotaĝanaĝac, nataq'aen enaac: —Da'me mach'e ami anajouaĝachiyoue da'me mach'e adejomaĝaqui; ja naqayem ta'le ami jajouaĝa't. Qama'le chiyoqotelegue nayi da'me male jec'atalo ga'me jo'ne ja judiopi.

⁷ Ca'e ga'me nemaĝaiqui qama'le yec'ata di'me 'lachaqa' ñe'me jiyaĝaua lenaĝat Ticio Justo, jo'ne jalchi'ena 'nonaĝachigui ñe'me Dios nataq'aen queda'me lejec ga'me judiopi lemaĝaiqui.

⁸ Choqoñe'me Crispo 'me yelolegue ga'me nemaĝaiqui p'iya'a ñe'me Jaliaĝanec, nataq'aen yemeda ga'me mach'e c'oqo'tepi. Nataq'aen nach'e ena'am qayoĝode' gaa'me Corinto laje', ca'li domachita da'me 'naqataĝanaĝac, p'iida'a qama'le qonachilaĝa'n.

⁹ 'Uo jo'me pi'yaq, ñe'me Jaliaĝanec taue da'me 'lochaĝa ñe'me Pablo qama'le enaac: “Ena'te ado'e; oquetalegue da'me a'uaĝatetac dojo' 'naqataĝanaĝac nataq'aen ena'te at'emaĝañe.

¹⁰ Qa'a am joue'tajop nataq'aen qaya'te gamachaqaega ta'le 'uo ga'me am 'yetec qaedi am 'naĝat, qa'a ga'me yalaqapi jena'me jenjo' noic yataqachiñe jalcote.”

¹¹ Chane'eja Pablo onolec ga'me uo'e da'me ue'ta di'me Corinto, yapaĝaguetapeque jogaa'me da'me 'laqataĝanaĝac ñe'me Dios.

¹² Qalaĝaja gaa'me noloqo'ote ca'li ñe'me Galión nejaliaĝatelegue di'me Acaya, joga'me judiopi yema'a't ca'li da'me nauteteguet ñe'me Pablo; yeuede'uo ga'me nojaĝaiqui

¹³ qama'le qot'aqataĝanem ñe'me jaliaĝanec: —Jenjo' jiyaĝaua 'yetetac da'me 'ñemaĝachiñe ga'me jiyaĝadipi da'me qaedi 'noota da'me qo'nonaĝachigui ñe'me Dios, qalaĝaja nach'eda eeta da'me nauteteguet ga'me mach'e qadamaĝajoĝonaĝac.

¹⁴ Pablo te'me 'uo ga'me nenaĝategue, ca'li Galión enapegalo joga'me judiopi: —Ami judiopi, ta'le qodojapiye gamachaqaega nenoĝonataguec daa'me yamaĝajoĝonaĝaco uotaĝa ga'me nalataĝanaĝac 'me lama'aja, qama'le ami ñeualaĝae'to joga da'me ami ñaquiaĝanalo.

¹⁵ Qalaĝaja queda'me qodojeye ga'me ch'e 'naqatac, ga'me ch'e nenaĝat nataq'aen namaĝajoĝonaĝaco jo'ne ami chiyaqayilo, 'noota qom mach'e ami da'me a'vichiye, qa'a ja jetaque jalequete'n naa'me naajo' jo'ne uo'oe.

¹⁶ Qama'le en queda'e ga'me nojaĝaiqui.

¹⁷ Chane'eja ena'uaque qoyaconalo ñe'me Sóstenes, ñe'me yelolegue ga'me judiopi lemaĝaiqui', qama'le nach'edi ua'a da'me qoye'uaĝan dajoya'a ga'me nojaĝaiqui. Qalaĝaja Galión ja uenate'ta da'me dojo'.

Pablo 'viyelaĝa di'me Antioquía

¹⁸ Pablo cha'li maliaĝa qayoĝode' gaa'me noloqo'ote da'me ue'ta di'me Corinto. Yem qama'le yep'iye'tape gaa'me qadaqaya'olqa, qama'le nach'e ena'am ñe'me Priscila choqoñe'me Aquila, nedañgui jaga'me licota qaedi yec'adeta di'me aleua jo'ne Siria. Di'me Cencreas, ca'li yamta'le nañgui licota qama'le Pablo nemadelegue ga'me laqaic, qaedi yepaquichigui ga'me 'laqatac jo'ne joote 'yaeñi ca'li.

¹⁹ Ca'li yovideta di'me Éfeso, Pablo yaĝadegue ñe'me Priscila nataq'aen Aquila qama'le yec'ata ga'me nemaĝaiqui, ua'a da'me t'aqataĝatapema ga'me judiopi jo'ne yema'a't ca'li.

²⁰ Jogaa'me nachoĝodetedapecot qaedi qayoĝode' gaa'me noloqo'ote da'me cha'li ue'tedi, qalaĝaja ja 'yamaqaten,

²¹ dite da'me yep'iye'tape jogaa'me, qama'le enaac: Qom naq'aeta da'me lelnataĝac ñe'me Dios, qama'le yitaĝa 'ñiyelaq qaedi ami jejapichiyalo. Yem qama'le Pablo nañgui jaga'me licota da'me dajoyi di'me Éfeso.

²² Ca'li yovita di'me Cesarea, yec'ata di'me Jerusalén qaedi yep'iye'n joga'me p'etaqadaiquipi; yem qama'le taya'ague di'me Antioquía.

Pablo quelegue di'me Galacia nataq'aen Frigia

²³ Mane'e ca'li uo'oe gaa'me noloqo'ote 'me yenoĝodegue, yitaĝa ec ñe'me Pablo qaedi onolqa'tape quetayelo gaa'me noyaqa di'me Galacia nataq'aen Frigia, 'yañaqate'tape ena'uaque joga'me p'etaqadaiquipi.

Apolo dapaĝaguenataĝa'ña di'me Éfeso

²⁴ Jaa'me jaajo' noloqo'ote yovita di'me Éfeso ñe'me judío lenaĝat Apolo, jo'ne 'lachaqa' di'me noic let'adaic lenaĝat Alejandría, jo'ne yataqachiñe yayataĝade'teguelo nataq'aen yataqachiñe yayate'n daa'me 'uaediñe nedii's joca'li.

²⁵ Joote qoyapaĝaguenec da'me ladic ñe'me Jaliaĝanec, nataq'aen yataqachiñe 'uo da'me 'lañaĝac da'me di'yoqo'tegue q'aen dapaĝaguenataĝatapec ñe'me Jaliaĝanec Jesús, mate mane'e da'me nachilaĝanataĝanaĝac nach'edata da'me yayaten da'me lapaĝaguenataĝanaĝac ñe'me Juan.

²⁶ Apolo yataqachiñe yaloĝon da'me 'laqataĝanaĝac ga'me judiopi ca'li uetaue ga'me lemaĝaiqui'; qalaĝaja ca'li domachita jañe'me Priscila nataq'aen Aquila, cha'li yauedegue ca'li da'me yataqachiñe noqotetedapec da'me ladic ñe'me Dios.

²⁷ Ca'li Apolo jetaque taya'ague di'me aleua Acaya, jogaa'me qadaqaya'olqa yate'm da'me lecochaĝa'j, nataq'aen yauote jaga'me lediije' qaedi yedenaqatenalo ga'me p'etaqadaiquipi da'me daja', qaedi qoyelo'ogueta joga'me. Chane'eja ca'li Apolo yovita di'me Acaya, yataqachiñe lecochiyalo gaa'me jo'ne p'iida'a ca'li, jouaĝat da'me lichoĝodenataĝanaĝac ñe'me Dios.

²⁸ Qa'a ena'uaque jogaa'me domachita da'me yataqata yapaĝaguetapeque ga'me judiopi ga'me chimadichidiñe 'me ja yaqanate't ta'le nematedapec, nataq'aen yachiyoĝotetelo'te nale gaa'me nedii's da'me yaloĝotac queda'me Jesús nach'eñe ñe'me Dios Liquiyac.