Hebreos 7 - Nuevo Testamento Toba Sombrero Negro

Ñe'me Melquisedec jo'ne netaĝayaĝanaĝanec joca'li

¹ Qa'a nach'eñe ñe'me Melquisedec jo'ne nejaliaĝanec di'me noic 'me lenaĝat da'me Salem joca'li, nataq'aen da'me mach'e netaĝayaĝanaĝanec jo'ne dajo'tot joñe'me Dios jo'ne napacalegue ena'uac. Mane'e joca'li ñe'me Abraham 'viyelaq da'me chiyoqo'ta ga'me nalada't, di'me jo'ne ua'a joca'li noma't jogaa'me nejaliaĝanaqa, qama'le nenoĝonegue ñe'me Melquisedec da'me uaqate'taguet ñe'me Abraham, qama'le yanem da'me Dios lichoĝodenataĝanaĝac ca'li.

² Ñe'me Abraham e'n diez gaa'me lael da'me lomataĝanaĝac 'me yachiyoĝotaue jo'me nalada't, qama'le onolec ga'me lae male yanem ñe'me Melquisedec. Da'me dojo' nenaĝat jo'ne Melquisedec yelo'teguet da'me “Jaliaĝanec jo'ne Ja 'Nalegue”, qalaĝaja nach'e ena'am da'me 'uo da'me lenaĝat laqaya jo'ne “Nejaliaĝanec da'me 'Nemaĝac”, qa'a naqaeda jo'ne yelo'teguet da'me nejaliaĝanec di'me Salem.

³ Qaya'te ta'le ch'e yayate'n jogaa'me jo'ne mach'e let'al ñe'me Melquisedec, uotaĝa gaa'me jo'ne mach'e chiyoĝogueta, qama'le nach'e ena'am ja qo'yaĝa't da'me eeta joca'li niyiñe, uotaĝa joca'li male yeleu. Chane'eja naq'aeta da'me dojo' 'loyaĝac joca'li: qo'che' qoyetapega ena'am da'me 'loyaĝac ñe'me Dios Lec'oĝot jo'ne netaĝayaĝanaĝanec 'me nach'e eta't da'me dajo'tot joñe'me Dios.

⁴ Chane'eja male auayachiñe da'me eeta da'me 'namaqatenataĝanaĝac joca'li ñe'me Melquisedec. Qa'a ñe'me jo'ne mach'e jachiyojoĝoguet, nach'eñe ñe'me Abraham, yanem joca'li jo'me lae da'me mach'e lomataĝanaĝac jo'ne yachiyoĝotaue joca'li jo'me nalada't.

⁵ Qa'a 'uo joca'li da'me Dios lamaĝajoĝonaĝac jo'ne 'yaĝa't jogaa'me netaĝayaĝanaĝanaqa 'me chiyoqoda'aguet di'me Leví. Nach'egaua jo'ne 'uo da'me ladi'j da'me yajela'y ga'me jiyaĝadipi jo'ne nach'e ena'am chiyoĝoteguet di'me Abraham, chayovida'alo gaa'me mach'e laqaya', onolqa'tape da'me yadegue onolec ga'me lae ga'me nejetenague'j jo'ne uo'oe diez gaa'me lael.

⁶ Qalaĝaja ñe'me Melquisedec, mate mane'e ja naqaeñe ta'le chiyoĝoguet ñe'me Leví, nach'eñe jo'ne qoyejeten ca'li yaconeguet ga'me lae da'me nejetenaguec ñe'me Abraham. Nach'e ena'am ñe'me Melquisedec naqaeñe jo'ne yanem da'me Dios lichoĝodenataĝanaĝac ñe'me Abraham jo'ne joote yaconeguet da'me 'naĝataĝac joñe'me Dios.

⁷ Qaya'te ta'le yoqoleguet da'me dojo': ga'me jo'ne dichoĝodenataĝan, nach'ega jo'ne p'ajaye, qama'le napacalegue ga'me jo'ne qoyichoĝoden.

⁸ Nataq'aen nayi naa'me naajo' noloqo'ote uo'oe gaa'me netaĝayaĝanaĝanaqa jo'ne yacoteguet ga'me jo'ne qoyanem, nach'egaua jo'ne ch'e jiyaĝa'u, qama'le gamachaqaega nolo' da'me yele'u. Qalaĝaja naa'me nedii's jo'ne Dios 'laqataĝanaĝac ja 'yaĝatetedac da'me leleuaĝa ñe'me Melquisedec, qama'le ena'am ta'le maliaĝa nec'aletaye.

⁹ Chane'eja ñe'me Leví jo'ne yaconegueta joca'li yema gaa'me qoyanema, nataq'aen ena'uaque jogaa'me netaĝayaĝanaĝanaqa jo'ne chiyoĝoteguet, ena'am ta'le yanema ñe'me Melquisedec ga'me lae yema ga'me yauata, yajouaĝat da'me jo'ne yanegue joca'li ñe'me Abraham.

¹⁰ Qa'a ñe'me Leví ena'am ta'le dajouo'o ñe'me Abraham joca'li uaqate'taguet ñe'me Melquisedec, temaqaedi da'me jona'li niyiñe.

Ñe'me Qadetaĝayaĝanaĝanec jo'ne nach'e eta't da'me 'uo

¹¹ Joca'li ñe'me Dios yanema daa'me lamaĝajoĝonaĝaco ga'me Israel lec'oqo'tepi qaedi gaa'me netaĝayaĝanaĝanaqa jo'ne lec'oqo'te di'me Leví e'n yataqatelo'te joga'me jiyaĝadipi. Qalaĝaja jogaa'me Leví lec'oqo'te ja yaqanate't ca'li; qo'che' male qonamaq ñe'me Netaĝayaĝanaĝanec laqaya jo'ne ja ena'ama gaa'me Leví lec'oqo'te qa'a ja chiyoĝoguet di'me Aarón, dite da'me ena'am da'me 'loyaĝac ñe'me Melquisedec.

¹² Qama'le qom qoyadalaĝa't gaa'me netaĝayaĝanaĝanaqa nataq'aen qom ja ena'am da'me 'loyaĝac ga'me dalaĝaic, qama'le nach'e ena'am qoyouetaque da'me qoyadalaĝa't daa'me namaĝajoĝonaĝaco.

¹³ Joñe'me mach'e Qadejaliaĝanec, ñe'me netaĝayaĝanaĝanec dalaĝaic jo'ne qo'yaĝatetac, ja chiyaqauelo ga'me lec'oqo'tepi di'me Leví, dite da'me chiyoĝoguet di'me Judá, jo'ne qaya'te 'uo ga'me netaĝayaĝanaĝanec ta'le chiyaqaue.

¹⁴ Qa'a joñe'me Qadejaliaĝanec yataqachiñe qoyayaten da'me chiyaqauelo ga'me lec'oqo'tepi di'me Judá, nach'egaua jo'ne qaya'te 'uo ga'me 'laqatac ñe'me Moisés ta'le dojelo'te ca'li 'yaĝatetac da'me 'loyaĝa'j gaa'me netaĝayaĝanaĝanaqa.

¹⁵ Qama'le yataqachiñe di'yoq da'me dojo', qom 'uo ñe'me Qadetaĝayaĝanaĝanec dalaĝaic jo'ne male ena'am da'me 'loyaĝac ñe'me Melquisedec.

¹⁶ Qama'le da'me qoyen netaĝayaĝanaĝanec ja yepaquetelegue da'me namaĝajoĝonaĝac 'me 'yaĝa't ga'me nec'oqo'tepi ta'le chiyaqauelo, dite da'me chiyaqayi da'me lañoqotaĝanaĝac da'me mach'e 'loyaĝac jo'ne nach'e eta't ja pal.

¹⁷ Qa'a naa'me nedii's jo'ne Dios 'laqataĝanaĝac 'yaĝatetedac joñe'me, eet'oi: “Naqa'am jo'ne am netaĝayaĝanaĝanec 'me nach'e eta't ja pal, Qa'a auena'am da'me 'loyaĝac ñe'me Melquisedec.”

¹⁸ Chane'eja da'me 'uaechiñe namaĝajoĝonaĝac male qoyapalaĝat, qa'a qaya'te 'lañaĝac joca'li choqoda'me qaya'te chiyaqayi.

¹⁹ Qa'a daa'me namaĝajoĝonaĝaco jo'ne qoyanema joca'li ñe'me Moisés ja yañoĝo't ta'le e'n yataqatelo'te ga'me jiyaĝadipi. Qalaĝaja nayi male 'uo da'me dojo' qadeuataqataĝanaĝac jo'ne onaĝaic, qa'a nach'eda jo'ne male jaqanatetaq ta'le jec'otaĝa joñe'me Dios.

²⁰ Yataqata eja da'me dojo', qa'a ñe'me Dios 'naĝatelegue ca'li. Qalaĝaja qaya'te 'laqatac ñe'me Dios ta'le 'naĝatelegue da'me qoye'n netaĝayaĝanaĝanaqa gaa'me jiyaĝa'u laqaya'.

²¹ Nach'eñeta ñe'me onolec jo'ne qoyachalegue ca'li da'me 'laqatac ñe'me Dios, qa'a naa'me nedii's 'yaĝatetac da'me dojo', eet'oi: “Joñe'me Jaliaĝanec 'naĝatelegue da'me dojo', qama'le ja eetapega ta'le ja ya'uo qomle, enaac: «Naqa'am jo'ne am netaĝayaĝanaĝanec 'me nach'e eta't ja pal.»”

²² Chane'eja nach'eñe ñe'me Jesús jo'ne qo'mi yayataĝade'teque da'me male 'uo da'me qaniyamaĝadenataguec, qom yataqata ñiyamaĝadenaĝaguet joñe'me Dios. Yataqata t'añi da'me dojo', qa'a Dios 'naĝatelegue da'me 'laqatac, qama'le ja ena'am da'me 'uaechiñe.

²³ Uo'oe joca'li jogaa'me netaĝayaĝanaĝanaqa laqaya' jo'ne qayoĝode', qa'a yajouaĝat da'me ja nach'e eta'ajalo da'me nec'aletedaye.

²⁴ Qalaĝaja ja ena'am ñe'me Jesús jo'ne nach'e eta't da'me 'uo, qama'le da'me 'lonatac joñe'me ja pal, qaya'te laqaya ta'le qoyen qauayet.

²⁵ Qo'che' yataqata yaqanatet ta'le nach'e eta't da'me nec'alaĝatedegue joga'me jiyaĝadipi, jogaa'me jo'ne 'yamaqate'n joñe'me da'me jetaque yec'adeta joñe'me Dios. Qa'a naqaeñe jo'ne nach'e eta't da'me nec'aletaye, qama'le nach'e eta't da'me nachoĝodetapelo'te jogaa'me.

²⁶ Chane'eja nach'eñe ñe'me Jesús jo'ne jouenaqa'ta, qa'a naqaeñe mach'e Qadetaĝayaĝanaĝanec jo'ne p'ajaye, joñe'me jo'ne ja 'nalegue, qaya'te ta'le loec nataq'aen ja paĝachigui, joote qoyachiyoĝotauelo jogaa'me loeco lo'olpi qama'le qoyana'ña di'me p'ajeguem jo'ne ne'tague di'me piyem.

²⁷ Qa'a ja ena'ama jogaa'me netaĝayaĝanaĝanaqa laqaya' jo'ne youe'n da'me yala't gaa'me yejidi yemeda naa'me noloqo'ote da'me yigouelo ga'me lajaqajecpi qaedi qoyapalaĝa't jogaa'me loeco jo'ne ja 'noe'n, da'me ye'uauaĝadiñe jogaa'me mach'e loeco, qama'le da'me yem male qauadegue jogaa'me loeco ga'me jiyaĝadipi. Qama'le ja ena'am ñe'me Jesús, jo'ne ya'uo ca'li ga'me lajaqajec jo'ne onolec, joca'li yaneuo da'me mach'e 'loyaĝac, qama'le qaya'te lajaqajec laqaya ta'le qoyouetaque.

²⁸ Qa'a 'uo da'me chiyoqodayi naa'me namaĝajoĝonaĝaco jo'ne Moisés yepota'n joca'li: gaa'me jo'ne qoye'n netaĝayaĝanaĝanaqa nach'egaua jo'ne jiyaĝa'u 'me ja yataqatelo'te. Qalaĝaja da'me jo'ne chiyaqayi da'me Dios 'laqatac jo'ne 'naĝatelegue, jo'ne napacalegue da'me 'uaechiñe, nach'eda da'me qoyen Netaĝayaĝanaĝanec ñe'me mach'e Lec'oĝot, nach'eñe jo'ne nach'e eta't da'me yataqatelegue.