Hebreos 6 - Nuevo Testamento Toba Sombrero Negro

¹ Chane'eja da'me qo'mi jo'ne joote jaconaĝaguet da'me napaĝaguenataĝanaĝac jo'ne 'uaechiñe 'me 'yaĝatetac ñe'me Cristo, 'noota qom ja jaqapiyaĝañi, dite da'me qolaqa'tegue da'me qadepe'e ladic chayovida'a qom jovidaqa'a da'me male qo'mi yajo't. Ja yitaĝa ta'le ji'iyelaĝajoĝolegue da'me ja'aĝataqatac da'me ladic ga'me jiyaĝaua da'me ca'ae gaa'me loeco jo'ne yauetegue da'me neleuaĝa, uotaĝa ta'le yitaĝa ja'aĝataqatac da'me eeta da'me qadepi'iyaĝac.

² Ja yitaĝa ta'le ji'iyelaĝajoĝolegue da'me ja'aĝataqatac da'me chilaĝanataĝanaĝac uotaĝa da'me jachaqalo'te naa'me qadoua' jogaa'me p'etaqadayaqa, uotaĝa da'me qo'niyelaĝachidijeguem jogaa'me joote yele'u, uotaĝa da'me Dios laloqotenaĝanaĝac jo'ne qaya'te loiquiaqa'.

³ Chane'eja nach'eda da'me jauoqo: nach'e eta't da'me ñichiyaqatajeguem, qom Dios qo'mi yaje'tema.

⁴ Qa'a ga'me jo'ne joote 'yamaqaten da'me eja jo'ne chiyaqayi joñe'me Dios choqoda'me joote yaconeguet da'me leyalaqataĝanaĝac joñe'me, nataq'aen joote uetaue ñe'me Dios Lepaqal 'me ja 'nalegue,

⁵ choqoda'me joote yayate'n daa'me onaĝayaqa jo'ne 'laqataqa joñe'me Dios choqoda'me lañoqotaĝanaĝac jo'ne yataqata di'yoqo'tegue qomle,

⁶ qalaĝaja da'me male yaĝañi da'me lepe'e, nach'ega ga'me jiyaĝaua jo'ne ja yaqanatet ta'le yitaĝa 'ñemaĝañi. Ja yaqanatet ta'le yitaĝa 'niyeloqot joñe'me Dios qa'a ena'am ta'le naqaega jo'ne yitaĝa yep'elegue jaga'me nesodoso joñe'me Dios Lec'oĝot da'me yataqata ye'uetac joñe'me.

⁷ Qa'a joga'me jiyaĝadipi ena'am ga'me aleua jo'ne nach'e eta't da'me 'uo da'me uotep talegue, qama'le paja'a da'me queñi jena'me noĝop. Qom paja'a da'me en najeguem ga'me nanec jo'ne 'uo da'me nejalayaĝac, da'me 'uo ga'me laqataĝanaĝa'j jogaa'me jo'ne t'onataĝadelegue, qama'le nach'ega ga'me aleua jo'ne 'uo da'me nichoĝodenataguec 'me chiyoqo'ot joñe'me Dios.

⁸ Qalaĝaja ga'me aleua jo'ne qaya'te chiyaqayi, jouaĝat da'me jaldata da'me en naje'ma jana'me yaĝat choqoga'me lolelaĝa, qama'le nach'ega ga'me aleua jo'ne taya'a da'me 'uo ga'me ne'uaĝanaguec 'me chiyoqo'ot joñe'me Dios, chayovida'a da'me qoyigoue ena'uac.

⁹ Ami yaqaya'olqa, temaqaedi naq'aeta da'me dojo' jo'ne ami ja'aĝatema, qalaĝaja da'me joote jayaten da'me eja da'me ovitaue da'me 'noota ladic jo'ne yelo'tegue da'me nec'alaĝa.

¹⁰ Qa'a ñe'me Dios nach'eñe jo'ne ja 'nalegue, qama'le ja yapalaĝate'ta da'me at'onataqadi' choqoda'me adoqopich'ii jo'ne joote aualoĝoñiya joñe'me, da'me alecochiiyapegalo jogaa'me adayii jo'ne yataqatelo'te adepi'iyaĝa'u, nach'eda da'me jo'ne maliaĝa a'vichetac.

¹¹ Da'me qo'mi yataqata 'uo da'me qadamaic ta'le onolqa'tape da'me ami nach'e eta't oquitalegue da'me adaloĝonataĝanaĝaqui chayovida'a qom yovita ga'me nolo' jo'ne p'ategue, qaedi yataqata yepaquichigui yema da'me mach'e adeuataqataĝanaĝaqui.

¹² Chane'eja da'me ami, 'noota qom ja adouali, dite da'me auadenaĝachi' gaa'me jo'ne nach'e eta't p'iida'a joñe'me Cristo nataq'aen da'me 'nañaĝadeteguet ena'uac, qama'le yacoteguet da'me qoyen loĝo't jo'ne joote Dios yaloĝon.

Yataqata eja da'me jo'ne joote Dios yaloĝon

¹³ Joca'li 'uo da'me jo'ne Dios 'yaĝatem ñe'me Abraham, qama'le mach'eñe da'me 'naĝatelegue, qa'a qaya'te 'uo ga'me laqaya jo'ne p'ajaye qaedi 'naĝatelegue.

¹⁴ Qama'le eetac: “Yataqata let'adaic da'me yichoĝodenataĝanaĝac jo'ne am janem qomle, nataq'aen yataqata jalcote ga'me ac'oqo'tepi jo'ne am janema.”

¹⁵ Qama'le ñe'me Abraham 'uo da'me napogaĝadenaĝac let'adaic, chayovida'a da'me yovida'a da'me male yaconeguet da'me jo'ne Dios joote 'yaĝatem.

¹⁶ Ga'me jiyaĝaua, qom 'uo ga'me jetaque daloĝonataĝalegue, qama'le 'uo ga'me jiyaĝaua laqaya jo'ne yataqata p'ajaye, mach'ega jo'ne qoyen 'naĝatelegue da'me 'naqatac. Chane'eja, qom male qo'yaĝatetac da'me jo'ne chiyaqayi ga'me laloĝonataĝanaĝac, qama'le ja yitaĝa ta'le 'uo ga'me cotaĝac.

¹⁷ Nach'e ena'am ñe'me Dios, da'me jetaque en 'yoqo'tegue da'me jo'ne yaloĝonalo yema ga'me lec'oqo'tepi jo'ne yacoteguet qomle da'me jo'ne qoyen loĝo't, qama'le yataqata 'naĝatelegue da'me 'laqatac ca'li yayatenaĝaneque da'me mach'e lelnataĝac jo'ne ja yitaĝa ta'le ya'uo ga'me dalaĝaic.

¹⁸ Ñe'me Dios ja doqovinaĝan, qama'le uo'oe naa'me naajo' jo'ne dos 'me ja yitaĝa ta'le 'uo ga'me dalaĝaic: nach'ena jo'ne Dios joote qo'mi yaloĝonalo choqoda'me 'laqatac joñe'me jo'ne 'naĝatelegue. Chane'eja da'me qo'mi, 'uo da'me qat'añaĝac jo'ne chimaqachiñe, da'me qo'mi jo'ne jeloqotaque da'me qo'mi de'uolo'te joñe'me Dios, nataq'aen da'me jaconaĝaguet da'me neuataqataĝanaĝac jo'ne qo'mi yanema joñe'me.

¹⁹ Jenjo' qadeuataqataĝanaĝac naqaeda da'me qo'mi 'yañaĝachidiñe qaedi nach'e eta't da'me qo'mi t'añi'y, ena'am joga'me lequet jaga'me licota da'me qoyecoñeteguet ga'me cadeena jo'ne laicaua qaedi nach'e eta't en namachiñe. Chane'eja da'me qadeuataqataĝanaĝac ena'am ta'le 'youategue joga'me ualoĝo lae jo'ne lapadenaĝat ga'me tamenaĝaiqui 'me na'ague di'me piyem qaedi male jenoĝonaĝauo'o.

²⁰ Nach'edi di'me jo'ne yenoĝoje'ma joca'li joñe'me Jesús, qaedi qo'mi yichoĝode'n da'me en qadadiiuo, qa'a nach'eñe ñe'me Jesús jo'ne joote qoyen Qadetaĝayaĝanaĝanec 'me p'ajaye, da'me ena'am da'me 'loyaĝac ñe'me Melquisedec joca'li.