Hebreos 5 - Nuevo Testamento Toba Sombrero Negro

¹ Yema ga'me netaĝayaĝanaĝanec jo'ne lajoĝola' ga'me tamenaĝaiqui lo'olpi mach'e liquiyac joñe'me Dios, qama'le qoyachiyoĝotauelo jogaa'me jiyaĝa'u laqaya' da'me dajoya'aguet joñe'me Dios, qaedi yadegue gaa'me lachitaqataĝanaqa'te ga'me jiyaĝadipi choqoga'me lajaqajecpi jo'ne qoyigouelo, qaedi qoyapalaĝa't gaa'me loeco jogaa'me.

² Qama'le ga'me netaĝayaĝanaĝanec yataqata yaqanatet ta'le yichoĝode'n gaa'me jo'ne yejoma'ape yajouaĝat da'me qaya'te layatenaĝanaĝa'j, qa'a nach'e ena'am ja t'añi da'me mach'e nejiyaĝauayaĝac joga'me.

³ Chane'eja yajouaĝat da'me dojo', male yauo'oe daa'me lachitataĝanaĝaco qaedi qoyapalaĝa't naa'me mach'e loeco, choqogaa'me loeco gaa'me jiyaĝa'u laqaya'.

⁴ Qaya'te ta'le yaqanatet da'me mach'e neguela't da'me eetapela't da'me netaĝayaĝanaĝanec jo'ne lajoĝola' ga'me tamenaĝaiqui lo'olpi, dite ñe'me Dios da'me nach'eñe jo'ne yiyaĝana ga'me jiyaĝaua qama'le yanem da'me liyamaqataĝanaĝac, ena'am da'me ee'tec joca'li yiyaĝana ñe'me Aarón.

⁵ Qama'le nach'e ena'am ñe'me Cristo da'me ja ni'yoĝodela't ta'le mach'e neguela't da'me eetapela't lajoĝola' ga'me netaĝayaĝanaĝanaqa, dite ñe'me Dios jo'ne eetac ca'li: “Nayi jenjo' nolo' am ja'aĝatem da'me naqa'am jo'ne mach'e am yalec, qa'a da'me jayem yataqata jayem adet'a,” naqaeñe jo'ne yanem da'me dojo' niyamaqataĝanaĝac.

⁶ Nataq'aen 'uo da'me nediijec laqaya jo'ne 'laqatac joñe'me Dios 'me eet'oi: “Da'me am nach'e eta't da'me am netaĝayaĝanaĝanec, Qama'le auena'am da'me 'loyaĝac ñe'me Melquisedec.”

⁷ Qama'le da'me 'uo ñe'me Cristo cha'li ueta'ña jena'me aleua, 'uo da'me lejamaĝa jo'ne neten da'me netamen, nataq'aen jalcote jana'me lachi' da'me nachoĝodenot joñe'me Dios, joñe'me jo'ne 'uo da'me lañoqotaĝanaĝac qaedi nec'alaĝate'guejop da'me neleuaĝa, qama'le ñe'me Dios domachiya joñe'me yajouaĝat da'me yataqata yoqo'cha.

⁸ Chane'eja joñe'me Cristo, mate mane'e mach'e Dios Lec'oĝot, qalaĝaja nach'e ena'am da'me napaĝaguena da'me eeta da'me noqochoĝojoĝoc, chiyoqochigui da'me mach'e lachoĝodec.

⁹ Qama'le ja yaĝañi da'me yataqata yoqo'cha joñe'me Dios, chayovida'a da'me yovita da'me laloqo' da'me qoyalat. Chane'eja nach'eñe joñe'me jo'ne yovida'a q'aen da'me male qoyen ladic da'me qonec'alaĝatedegue yema jogaa'me jo'ne yoqochideta joñe'me, da'me nec'alaĝa jo'ne qaya'te loiquiaqa'.

¹⁰ Qama'le ñe'me Dios yanaye joñe'me da'me naqaeñe jo'ne lajoĝola' gaa'me netaĝayaĝanaĝanaqa, naqaeñe jo'ne ena'am da'me 'loyaĝac ñe'me Melquisedec.

'Noota qom qolaqa'tegue da'me qadepe'e ladic

¹¹ Da'me jayem jalcote da'me jo'ne jetaque ami ja'aĝatema da'me jo'ne mach'e yelo'teguet da'me dojo' napaĝaguenataĝanaĝac, qalaĝaja 'uo da'me laqalaic da'me ami japaĝagueneque, yajouaĝat da'me ja paja'a ta'le auayachiñe.

¹² Qa'a nayi da'me joote yenoĝodegue jaa'me 'uoidi chayovida'a ta'le naqa'ami jo'ne auapaĝaguenataĝañitac, qalaĝaja maliaĝa auoviñetaque da'me yitaĝa ami qoyapaĝague'n daa'me ja qalache jo'ne mach'e lapaĝaguenataĝanaĝaco joñe'me Dios, queda'me ena'am ta'le a'viyelaqaiya da'me qaya'te at'añaĝaqui, qama'le ja youen da'me ami qoyiqui'yaĝaneque ga'me niqui'yaĝat jo'ne 'uo da'me 'lañaĝac, dite jaga'me lochi' jo'ne nach'aga 'me aniyomitapiye.

¹³ Qa'a joga'me jo'ne maliaĝa niyomigui jana'me lochi', nach'ega jo'ne ena'am ta'le notolec jo'ne maliaĝa uanoquetac, qa'a maliaĝa ja yayaten da'me naloqoten joda'me jo'ne yataqatelegue.

¹⁴ Qalaĝaja joga'me niqui'yaĝat jo'ne 'uo da'me 'lañaĝac nach'ega jo'ne tayet da'me qoyanema gaa'me 'yaĝayaqa jo'ne joote yayate'n da'me naloqotenaĝanaĝac qa'a joote naeda'ac da'me yateto'n da'me 'loyaĝa'j gaa'me 'noote' choqogaa'me ja 'noe'n.