Hebreos 4 - Nuevo Testamento Toba Sombrero Negro

Da'me 'nomataqa' joñe'me Dios

¹ Qama'le nayi, da'me qo'mi maliaĝa qo'mi qoyiyaĝanalo qaedi jenoĝonaĝaue di'me 'nomataqa' joñe'me Dios. Chane'eja, 'noota qom qadetelapega't qaedi qaya'te onolec da'me ami jo'ne qoyauana da'me ja nalo'oguet ta'le yenoĝoneuo.

² Qa'a da'me qo'mi joote jomachaĝa da'me dojo' 'naqatac jo'ne onaĝaic, ena'am ga'me Israel laje'pi joca'li. Qalaĝaja da'me 'naqatac jo'ne qo'yaĝatema ca'li joga'me Israel laje'pi qaya'te chiyaqayi, jouaĝat da'me ja 'yamaqate'n qama'le ja napotenegueta gaa'me laqaya' jo'ne yataqata 'uo da'me lepe'e' joca'li.

³ Qama'le da'me qo'mi jo'ne joote ja'amaqatenaq da'me 'naqatac male jenoĝonaĝaue qomle di'me 'nomataqa' joñe'me. Nach'ena jo'ne Dios 'yaĝat ca'li da'me enaac: “Qo'che' jen eja da'me yalemataic, jenaac: «Da'me ami male ja auaqanachichi ta'le auec'achiya di'me 'yachaqa' jo'ne 'ñomataqa'.»” Qama'le enaac da'me dojo' mate mane'e joote yoma't yema daa'me 'lonataqa chiyoqotelegue da'me ye'et jena'me aleua ca'li 'uaechiñe.

⁴ Qa'a 'uo ga'me lae naa'me nedii's jo'ne 'yaĝatetac ga'me nolo' jo'ne séptimo, eetac: “Joca'li yovita ga'me nolo' jo'ne séptimo Qama'le Dios cha'li 'nomateguejopa yema jogaa'me mach'e 'lonataqa.”

⁵ Nataq'aen 'uo ga'me 'naqatac laqaya jo'ne eetac: “Da'me ami male ja auaqanachichi ta'le auec'achiya di'me 'ñomataĝaiqui.”

⁶ Chane'eja, mate mane'e ñe'me Dios yiyaĝanalo ca'li joga'me jiyaĝadipi jo'ne mach'e lec'oqo'tepi qaedi yenoĝodoue di'me 'nomataĝaiqui, qalaĝaja jogaa'me ja 'yamaqate'n da'me 'laqatac joñe'me qama'le ja tadoue, yajouaĝat da'me ja yoqochideta joñe'me.

⁷ Ca'li yem da'me dojo' qama'le yenoĝodegue jalcote jaa'me 'uoidi chayovida'a ñe'me Dios yitaĝa en laloqo' da'me dojapegue'to ga'me jiyaĝadipi jo'ne lec'oqo'tepi. Chane'eja yojaĝanaĝan ñe'me David jo'ne enaac: “Nayi jenjo' nolo', qom auomachiiya da'me jo'ne Dios 'yaĝatetac, Ena'te aueñi t'añi'y naa'me adai'lidi'.”

⁸ Qa'a joñe'me Josué ja yaqanatet ta'le 'nomataĝadegue joga'me Israel laje'pi joca'li; qo'che' ñe'me Dios yitaĝa 'yaĝatetac da'me 'uo ga'me nolo' laqaya.

⁹ Chane'eja nayi joñe'me Dios yitaĝa yiyaĝanalo jogaa'me mach'e lec'oqo'tepi qaedi tadoue da'me 'nomataĝaiqui.

¹⁰ Qa'a ga'me jo'ne taue da'me 'nomataĝaiqui joñe'me Dios, nach'ega jo'ne joote yoma't jogaa'me mach'e 'lonataqa qama'le 'nomateguejopa, ena'am joñe'me Dios da'me 'nomateguejopa jogaa'me jo'ne mach'e 'lonataqa joca'li 'uaechiñe.

¹¹ Chane'eja da'me qo'mi, 'noota qom 'ñañaĝataq qaedi jañoĝotaq da'me jenoĝonaĝauo'o da'me 'nomataĝaiqui joñe'me Dios, qaedi qaya'te ta'le onolec jo'ne ja yenoĝoneuo'o yajouaĝat da'me que'teguelo jogaa'me jo'ne ja p'iida'a joñe'me Dios.

¹² Qa'a da'me 'laqatac joñe'me Dios yataqata nec'aletaye nataq'aen 'uo da'me lañoqotaĝanaĝac. Nach'eda jo'ne nichaĝajoĝonaĝat jo'ne p'ajaye, napacalegue ga'me nedaĝanaĝat jo'ne dos naa'me lia'a, qama'le yaqanatet ta'le yeda'uo ga'me lauel ga'me jiyaĝaua, chayovida'a da'me yovidauo ga'me lepaqal, ena'am ta'le yededa'uo gaa'me loiquiaqa'te naa'me lep'inaqa nataq'aen na'me lap'iyoĝo. Qama'le nach'eda jo'ne ya'uo da'me lec'atenaĝanaĝac, naloqote'n gaa'me lelnataĝaco ga'me jiyaĝaua nataq'aen gaa'me jo'ne mach'e lamaico.

¹³ Gaa'me 'lonataqa joñe'me Dios, qaya'te onolec ta'le yaqanatet ta'le nañoĝochiñejop joñe'me, dite da'me yataqata di'yoq ena'uac. Chane'eja qom male jajoqo'tot joñe'me, qama'le nach'eda da'me 'laqatac joñe'me jo'ne qo'mi naloqote'n qama'le qo'mi dechoqotaĝaneque.

Jesús mach'e Qadetaĝayaĝanaĝanec

¹⁴ Chane'eja queda'me joote yec'adije'ma di'me piyem ñe'me Qadetaĝayaĝanaĝanec jo'ne napacalegue ena'uac, nach'eñe ñe'me Jesús jo'ne Dios Lec'oĝot, qama'le da'me qo'mi, 'noota qom 'ñañaĝataq da'me qolaqatelegue da'me qadepe'e ladic.

¹⁵ Qa'a ñe'me mach'e Qadetaĝayaĝanaĝanec yataqata yaqanatet ta'le yichoĝoden da'me mach'e qadachoĝolaĝac, qa'a joñe'me uetauelo ca'li yemeda gaa'me napiyenagueco, ena'ama da'me qo'mi, qalaĝaja joñe'me qaya'te lepatenaĝanaĝac.

¹⁶ Chane'eja da'me qo'mi, 'noota qom ena'te joqoleguetaq da'me jec'ataĝa'uo di'me lejaliaqa' joñe'me mach'e Qanedios jo'ne ñoqotaĝanaĝaic, qaedi joñe'me qo'mi lecochiyalo nataq'aen da'me qo'mi yichoĝode'n, gamachaqaega ga'me nolo' qom 'uo ga'me jouenaqataque.