Hebreos 13 - Nuevo Testamento Toba Sombrero Negro

Da'me eeta da'me jauoqo qaedi Dios qo'mi yiyamaĝade'n

¹ Ena'te aĝañiñi da'me anoqopichiyapega't, da'me mach'e ami naqaya'.

² Nataq'aen ena'te aĝañiñi da'me auauoyi ga'me 'lochaqa' joga'me ami yovida'alo, qa'a uo'oe jogaa'me jo'ne naq'aeta da'me yauote ca'li, qama'le ja yayate'n da'me nach'egaua gaa'me piyem laje' jo'ne ue'tajopa.

³ Anetoviñetaque gaa'me adaqayadi' jo'ne netedaue jaga'me coñetaĝanaĝaiqui, qama'le ena'am aueñi da'me uotaĝa ena'am ta'le anecoñetaĝa'udi' jogaa'me, nataq'aen da'me auenache'talo gaa'me jo'ne joote ja no'en da'me qo'yeteque, queda'me uotaĝa nach'e ena'am da'me ami qo'yeteque qomle.

⁴ Nach'e ena'am da'me ademiya'a da'me aviyamaĝachetac da'me adouayaĝaqui, nataq'aen jogaa'me nooua' youen da'me nach'e eta't da'me niyamaĝatela'ajalo da'me mach'e 'lonáĝa'j, qa'a ñe'me Dios ya'uo qomle ga'me ne'uaĝanague'j jogaa'me quejeguetaĝayaqa choqogaa'me jo'ne leua'u gaa'me ja loua'.

⁵ Ena'te auepichiya'a jaga'me laicaua, dite da'me anetoñetapec da'me uo'oe jo'ne mach'e adoqochidi', qa'a 'uo da'me 'laqatac ñe'me Dios, eet'oi: “Da'me jayem yataqata ja am 'te jeca'e, uotaĝa ta'le am jeguem.”

⁶ Chane'eja male yataqata qaya'te qadoqolanaĝa da'me jenaqaac: “Nach'eñe ñe'me Jaliaĝanec jo'ne jayem lecochiya, Qama'le qaya'te jo'oyapega nayi. ¿Jach'e ga'me yaqanatet ga'me jiyaĝaua ta'le jayem 'yetec?”

⁷ Anetoviñetaque ñaa'me mach'e adajoĝola'chidi', naqaeñaua jo'ne ami 'yaĝatema ca'li daa'me 'laqataqa ñe'me Dios. Auenachelegue da'me jo'ne chiyaqayi da'me 'loyaĝa'j joñaa'me, qama'le oqui'tegue da'me ee'tec da'me mach'e lepi'iyaĝa'j.

⁸ Jesucristo nach'e eta't da'me 'uo, chiyoqotelegue da'me 'uaechiñe chayovida'a nayi, nataq'aen nach'e eta't da'me ja pal.

⁹ Qama'le ena'te auajeñeta ta'le ami qoyauequeteda'alo gaa'me napaĝaguenataĝanaĝaco jo'ne yodapecache 'me ja qoyateto'n. Nach'edata da'me lañoqotaĝanaĝac joñe'me Dios jo'ne yataqata 'yañaqate't naa'me mach'e adai'lidi'. Chane'eja ena'te oqui'teguelo naa'me namaĝajoĝonaĝaco jo'ne qoye'n ladiquiyaĝac da'me niqui'yaĝac, qa'a jogaa'me jo'ne quetede'egue da'me dojo' qaya'te ta'le 'uo ga'me naueguedela't.

¹⁰ Da'me qo'mi 'uo jena'me mach'e qadoĝot jo'ne ena'am ta'le c'atoĝonaĝala', qalaĝaja da'me mach'e qadajaqajec jo'ne janemaĝam nale joñe'me Dios, ja qoyajen ta'le qonecolaĝate'talo jogaa'me judiopi letaĝayaĝanaĝanaqa jo'ne uetedaue joga'me toijeyac tamenaĝaiqui.

¹¹ Qa'a joñe'me lajoĝola' gaa'me netaĝayaĝanaĝanaqa yedota jaga'me jiyac letauo' joga'me tamenaĝaiqui da'me e'n lajaqajel ga'me jiyaĝadipi, qaedi qonaqa't jogaa'me loeco, qalaĝaja ga'me lapat jogaa'me yejidi qoyen p'adegue di'me 'nomachaqa' da'me qoyigouelo.

¹² Qama'le nach'e ena'am ñe'me Jesús qoyen p'aye ga'me noic da'me 'uo da'me lachoĝodec ca'li yeleu, qaedi qodoĝotaĝaneque gaa'me loeco ga'me jiyaĝadipi, yajouaĝat da'me naliñi qoyen jaga'me mach'e letauo'.

¹³ Chane'eja 'noota qom ena'am ta'le qolaĝague nayi ñe'me Jesús, da'me qoyen p'aye ga'me 'nomachaqa', qaedi nach'e jenaqa'am da'me qoyen lachoĝodec.

¹⁴ Qa'a jena'me aleua qaya'te qat'achaqa' ta'le jauanaĝa jo'ne noic 'me nach'e eta't da'me 'uo, dite da'me jajoqo'ta da'me jovitaĝa ga'me noic laqaya jo'ne dalaĝaic.

¹⁵ Chane'eja nach'e eta't da'me 'ñonaĝataĝaye ñe'me Dios, da'me jenaq chiyaqayi ñe'me Jesucristo jenjo' qadi'yoĝodenataĝanaĝac jo'ne ena'am ta'le qadajaqajec da'me janemaĝam, qa'a nach'edaua daa'me qat'aqataqa mach'e qadajaqajec, nale jechoĝotaq da'me naqaeñe mach'e Qadejaliaĝanec.

¹⁶ Nach'e ena'am ena'te aĝañiñi da'me auauoyi da'me 'noota, nataq'aen da'me anecolaĝachiyalo gaa'me adaqayadi' ga'me youetedaque, qa'a nach'eda da'me qadajaqajec jo'ne 'yamaqaten joñe'me Dios.

¹⁷ Ñaa'me adajoĝola'chidi', 'noota qom auoqochiiyalo, nataq'aen da'me aueñi eja ga'me ami yapaĝagueneque, qa'a nach'eñaua jo'ne ja 'nomatedegue da'me ami netelalo, queda'me yayate'n da'me Dios naloqoten qomle da'me mach'e 'lonataĝanaĝa'j. Chane'eja anapogoĝoiñitapec da'me 'uo da'me lamai'j joñaa'me nale yauote da'me dojo', ena'te aueñi co'yaq da'me 'lonata'j, qa'a ta'le naq'aeta qama'le qaya'te 'uo da'me anaviquila't.

¹⁸ Ena'te aĝañiñi da'me qo'mi auajelaĝañilo'te, qa'a jayatenaq da'me qo'mi uetauelo da'me qadelnataĝac jo'ne onaĝaic, qama'le jetaque ñiyamaĝataqatapeguet yema.

¹⁹ Yataqata jayem auajelaĝañilegue, qaedi Dios jayem yaje'tem da'me paja'a da'me yitaĝa ami jouetauelo.

'Naqatac jo'ne p'ategue

²⁰ Joñe'me Dios jo'ne qo'mi yanema da'me 'nemaĝac, qa'a nach'eñe 'me 'niyelaĝachijeguem ñe'me Jesús da'me en chiyaqauelo dia'me napa'lpi, joñe'me Jesús jo'ne 'naĝanaĝate 'nouatoqo't 'me p'ajaye, ñe'me mach'e Qadejaliaĝanec jo'ne joote yomat da'me niyamaqataĝanaĝac jo'ne qaya'te loiquiaqa', yajouaĝat da'me qoyen naliñi jaga'me letauo'.

²¹ Joñe'me Dios en ami yataqatelo'te q'ae'n, qaedi oqui'tegue da'me jo'ne mach'e lelnataĝac joñe'me, qama'le qo'mi ee'teque da'me jo'ne mach'e 'lamaqatenataĝanaĝac, da'me jo'ne chiyaqayi joñe'me Jesucristo, qaedi nach'eñe joñe'me jo'ne 'uo da'me 'lonaĝa jo'ne ja yitaĝa ta'le pal. Jaja'a, nach'e naq'aeta da'me dojo'.

²² Ami yaqaya'olqa, ami ñachoĝodenoto da'me auacoñiyeguet jenjo' yaqataĝac 'me ami jamaĝalo nayi, qa'a ch'e jaleca da'me jo'ne jediñe.

²³ Auayachiñe nayi ga'me mach'e qadaqaya Timoteo da'me joote qoyejoye, qama'le qom ja uayaloq da'me jayem novita, qama'le qolaq qomle da'me ami jec'ataĝalo.

²⁴ Auanema da'me yamaic yema gaa'me adajoĝola'chidi' nach'e ena'ama yema ga'me Dios lec'oqo'tepi jo'ne ami ue'tajopa, qama'le gaa'me qadaqaya' jo'ne Italia laje' nach'e ena'am da'me ami yamaĝalo da'me lep'iyenataĝanaĝa'j.

²⁵ Ñe'me Dios ami yecodelo'te da'me lichoĝodenataĝanaĝac yemeda da'me ami.