Hebreos 12 - Nuevo Testamento Toba Sombrero Negro

Yataqata joqochaĝa ñe'me Dios mach'e Qadet'a

¹ Chane'eja da'me qo'mi, queda'me uo'oe naajo' jiyaĝa'u jo'ne qayoĝode' 'me qo'mi dajota'ualo, naqaegaua jo'ne joote daloĝonataĝata da'me lepe'e', qama'le 'noota qom cha'li jaĝanaĝadiñi yema naa'me jo'ne qo'mi nauatapegueta choqonaa'me mach'e qadoeco jo'ne e'n qo'mi lecoñetae's. Qa'a da'me qadadiquiaĝac ena'am ta'le ga'me ñaqalegoĝojoĝoc, qama'le 'noota qom yataqata qo'mi vidiaqayaqa, yataqata 'ñañaĝataĝaguet da'me qomitaĝac jo'ne qo'mi ue'tajopa, da'me jo'ne mach'e jajoqo'tague.

² 'Noota qom nach'e eta't da'me jenataqatapega joñe'me Jesús, qa'a naqaeñe 'me chiyaqayi da'me qadepe'e, nataq'aen da'me yiyamaĝachiñe. Ñe'me Jesús yauana joca'li da'me 'uo qomle da'me lamaic let'adaic. Chane'eja napogaĝadeneguet joca'li jana'me sodoso, ja jetaque yoqochi'eguet da'me nepocoĝoc jo'ne chiyaqayi da'me neleuaĝa, qama'le da'me yem da'me jo'ne lachoĝodec qoyen, male na'ña ga'me yayaten ga'me lejaliaqa' joñe'me Dios.

³ Chane'eja da'me ami, yataqata auenache'ta da'me napogaĝadenaĝac ñe'me Jesús, queda'me 'uo da'me lachoĝodec let'adaic ca'li uo'oe gaa'me loeco lo'ol jo'ne nautetedapega joñe'me. Auenache'ta da'me dojo' qaedi ja adeliñiñi, nach'e ena'am da'me ena'te aĝañiñi da'me adepi'i.

⁴ Qa'a da'me ami maliaĝa qaya'te 'uo ga'me yovida'a da'me qoyalat yajouaĝat da'me jetaque ja auacoñiyeguet da'me nadiquiyaĝac jo'ne ja no'en.

⁵ Nataq'aen joote auapalaĝache'ta da'me jo'ne ami yapaĝagueneque joñe'me Dios, da'me yataqachiñe ami lec'oqo'te, naq'aeta da'me jo'ne qoyediñe ca'li, enaac: “Am yalec, ena'te jetaque ja a'uamaqaten da'me anapaĝaguenataguec, Da'me am yapaĝaguen joñe'me Jaliaĝanec. Ena'te jetaque ch'e anacheta qomle 'uo ga'me am yicochaq.

⁶ Qa'a ñe'me Jaliaĝanec yapaĝaguen yema ga'me jo'ne noqopita, Nataq'aen da'me ye'uaĝa'n nale gaa'me jo'ne yaconegueta da'me e'n lec'oqo'te.”

⁷ Chane'eja anapogaĝadeñiyeguet da'me adachoĝodequi, qa'a ñe'me Dios yataqata ami noqopitalo, qama'le ami yapaĝague'n chayovida'a da'me ami yicocha' nale, yajouaĝat da'me e'n ami lec'oqo'te. Qa'a ¿qo'li 'uo ga'me net'a jo'ne ja yapaĝaguen ga'me lec'oĝot?

⁸ Qalaĝaja ta'le Dios ja ami 'te yapaĝague'n, qama'le nach'e ami jo'ne ja yataqachiñe ta'le ami lec'oqo'te, qa'a joñe'me yataqata yapaĝague'n yema ga'me mach'e lec'oqo'tepi.

⁹ Joca'li cha'li qo'mi ñoqolqapi, qama'le gaa'me mach'e qadet'al jo'ne uetedalegue jenjo' aleua qo'mi yapaĝague'n, qama'le da'me qo'mi yataqata joqochaĝalo. Qama'le ¿teua'atoqo' ta'le ja jetaque joqochaĝa ñe'me Qadet'a jo'ne na'ague di'me piyem, qaedi jovidaqa'a da'me qadec'alaĝa?

¹⁰ Ca'li qo'mi ñoqolqapi, gaa'me mach'e qadet'al, da'me cha'li 'uo da'me nejiyaĝauayaĝa'j jo'ne jaqaloq, 'uo da'me jo'ne qo'mi yapaĝagueneque qa'a yepetetedapega qaedi qo'mi 'noote' jo' qomle. Qalaĝaja ñe'me Dios male qo'mi yapaĝagueneque da'me jo'ne yataqatelegue qaedi ñauegaĝala't da'me qo'mi yoqovite', chayovida'a da'me jenaqa'am joñe'me.

¹¹ Eja da'me qaya'te ne'uaĝanaĝanaĝac jo'ne ja co'yaq, nale qo'mi qoyachalo'te. Eja da'me co'yaq, qalaĝaja qom male qat'amaĝac da'me jo'ne qo'mi qo'yeteque, qama'le da'me chiyaqayi nach'eda da'me qat'oyaĝac jo'ne onaĝaic. 'Uo da'me qat'emaĝac nataq'aen da'me qo'mi chimaqachidiñe.

¹² Chane'eja aueñi qoyadalaĝat da'me 'lañaĝac naa'me mach'e adoua'adi, jo'ne qaya'te 'lañaĝa'j, qama'le nach'e ena'ama naa'me adeliqueteldi' jo'ne qaya'te 'lañaĝa'j.

¹³ Chane'eja ayi'ya joga'me naq'aec jo'ne chimaqategue nataq'aen nalo'ta't, qaedi naa'me adapia'te jo'ne 'uo da'me lachoĝolaĝa'j male ja yitaĝa ta'le nouoqodapegue.

¹⁴ Anepogoĝoiñetapegue' da'me nach'e eta't ami uetauelo da'me 'nemaĝac, ena'uaque da'me ami, nataq'aen da'me nach'e eta't da'me ami ja 'nalo'te, qa'a qom qaya da'me qat'oyaĝac jo'ne ja 'nalegue qama'le ja jaqanatetaq ta'le jauanaĝa joñe'me Jaliaĝanec.

¹⁵ Nach'e eta't da'me adechilela't qaedi qaya'te 'uo joga'me jetaque yeguem da'me loqopich'i joñe'me Dios, uotaĝa ta'le 'uo joga'me jetaque ami 'naĝa't, qa'a dojo' yelagaĝa'j jena'me qadayi qama'le ena'am jaga'me nana jo'ne 'uo ga'me pata' jo'ne chem, da'me t'aĝanataĝanac da'me yedo'n jogaa'me.

¹⁶ Ena'te ami quejeguetaĝayaqa, chayovida'a da'me ena'te a'uotañi ga'me jo'ne chiyoqo'ot joñe'me Dios, qa'a naq'aeta da'me ya'uo ca'li ñe'me Esaú, da'me yemen jo'me te'me qoyen mach'e loĝot queda'me nach'eñe ñe'me nec'oĝot jo'ne nipiloĝot, ca'li en tayí da'me ya'uo onolec niqui'yaĝac.

¹⁷ Qama'le joote auayachiñe da'me ca'li yem da'me dojo', qama'le jetaque yaconeguet da'me nechoĝodenataguec jo'ne chiyaqayi ñe'me mach'e let'a. Temaqaedi da'me yataqata noyen, qalaĝaja male ja yañoĝot da'me nadalaĝat ga'me ee'tec da'me joote qoye'et joca'li.

¹⁸ Da'me ami ja aueñiya'ama joga'me Israel lec'oqo'tepi jo'ne yec'adeta joca'li jo'me qajoĝonaĝa 'me qoyaqanatet da'me qoyepote'uo joca'li, nataq'aen da'me 'uo ga'me lauaq jo'ne edañgui, choqoda'me ua'ña ga'me yataqata 'naltapiye nataq'aen ga'me layat let'adaic.

¹⁹ Ja auomachiiya da'me lajamaĝa jaga'me najeede, uotaĝa da'me 'laqatac ñe'me Dios ca'li doje. Qalaĝaja jogaa'me jo'ne domachita ca'li, 'uo da'me nachoĝodetedapecot qaedi ja en 'te quete' daa'me 'laqataqa.

²⁰ Qa'a ja naloteguet da'me lamaĝajoĝonaĝac ñe'me Dios jo'ne eet'oi: “Ga'me jo'ne yachalegue ga'me lapia' ñe'me qajoĝonaĝa, aualachi, auajaqayec jena'me qa' uotaĝa jaga'me miyoĝo, temaqaedi qom te'me jiyac.”

²¹ Yataqachiñe 'uo da'me lichic da'me jo'ne qoyauana joca'li, qama'le 'yaĝatetac ñe'me Moisés, enaac: “Jayem yiviloĝolaqatet da'me yoqolanaĝa.”

²² Qalaĝaja da'me ami qamqa'me joote auec'achiya ñe'me qajoĝonaĝa jo'ne Sión, di'me noic jo'ne mach'e 'lachaqa' ñe'me Dios 'me nach'e eta't da'me nec'aletaye, di'me noic jo'ne Jerusalén 'me ue'tague di'me piyem. Nach'edi di'me jo'ne ueteda'a jalcote joga'me piyem laje'pi da'me yema'a't qaedi 'nonaĝachidegue joñe'me Dios.

²³ Joote auec'achiyalo naa'me jo'ne ueteda'ague, qa'a joñe'me Dios yataqata e'n lec'oqo'te, qama'le joote yaqanate't da'me neteda'ña di'me piyem. Male auec'achiya ñe'me Dios jo'ne nec'atenoqo't ena'uac, choqogaa'me lepaqa'li gaa'me jiyaĝa'u jo'ne 'noote', gaa'me jo'ne Dios joote 'yeteque da'me en yataqatelo'te q'ae'n.

²⁴ Nataq'aen auec'achiya joñe'me Jesús, nach'eñe jo'ne joote yomat da'me dalaĝaic 'namaqatenataĝanaĝac, qama'le nach'e ena'am jaga'me letauo' jo'ne naliñi joca'li qaedi en qo'mi yoqovite' q'ae'n, jaga'me jo'ne nach'e ena'am da'me qo'mi 'yaĝatema da'me onaĝaic, jo'ne ja ena'am jaga'me letauo' ñe'me Abel.

²⁵ Chane'eja yataqata a'uamaqachiñe da'me 'laqatac joñe'me Dios. Qa'a joga'me Israel lec'oqo'tepi jo'ne ja yacoteguet joca'li joñe'me Dios 'laqataĝanaĝanec jo'ne ch'e aleua le'ec, qaya'te onolec jo'ne yaqanatet ta'le yaĝan joda'me qoyen lachoĝodec. Qama'le nayi, qo'mi jo'ne jomachaĝa da'me 'laqatac joñe'me jo'ne chiyaqayi di'me piyem, qom ja ja'amaqatenaq, qama'le ¿teua'atoqo' jaqanatetaq ta'le qo'mi yaĝa'n da'me qoyen mach'e qadachoĝodec?

²⁶ Joca'li 'uo jo'me nolo' da'me ya'uo da'me lejamaĝa ñe'me Dios, en deda q'aen jena'me aleua, qalaĝaja nayi da'me yitaĝa eetac: “Qomle yitaĝa ja'uo ga'me jedaĝat, male ja jen 'te onolec jena'me aleua, dite da'me male nach'e ena'am di'me piyem.”

²⁷ Da'me eetac “Qomle yitaĝa ja'uo ga'me jedaĝat” qama'le jayatenaq da'me 'uo jo' qomle ga'me nolo' qom yitaĝa 'niyelaĝatela't gaa'me uo'oe jo'ne mach'e 'lonataqa gaa'me jo'ne yaqanatet da'me qonichiyaĝat, qaedi yejamache gaa'me ja yaqanate't ta'le qonichiyaĝat.

²⁸ Joñe'me Dios male qo'mi yanema da'me lejaliaĝa jo'ne ja qoyaqanatet ta'le yitaĝa qonichiyaĝat. Chane'eja 'noota qom janemaĝam da'me qadamaic nataq'aen da'me 'ñonaĝataĝaye joñe'me, nach'e ena'am da'me jauoqo da'me chimaqachiñe jo'ne yataqata yiyamaĝaden.

²⁹ Qa'a joñe'me mach'e Qanedios nach'eñe jo'ne ena'am ta'le dole' da'me en yema datochiñe.