Hebreos 10 - Nuevo Testamento Toba Sombrero Negro

Ga'me 'namaqatenataĝanaĝac toijec male qaya'te ta'le chiyaqayi

¹ Qa'a daa'me namaĝajoĝonaĝaco jo'ne qoyanema ñe'me Moisés joca'li, nach'edata da'me ena'am ta'le ch'e lequi'il gaa'me niyamaqataĝanaĝaco jo'ne onaĝayaqa 'me nateda'aquena. Chane'eja da'me jo'ne joote novitequena ja naqaeda da'me jo'ne yataqatelegue, qa'a daa'me namaĝajoĝonaĝaco jo'ne 'uaechidiñe, qaya'te ua'a ta'le yaqanate't da'me e'n yataqatelo'te jogaa'me jiyaĝa'u, jo'ne onolqa'tape naa'me 'uoidi da'me yec'adeta joñe'me Dios, qaedi yitaĝa yauo'oe gaa'me lajaqajel.

² Qa'a ta'le naqaeda da'me namaĝajoĝonaĝac yaqanatet ta'le e'n yoqovite' jogaa'me jiyaĝa'u, qama'le jogaa'me nepetetapela'ajalo da'me male qaya'te 'uo da'me laviyaĝajet, qama'le ja yitaĝa ta'le 'yaĝatedeuo ga'me lajaqaje'j.

³ Qalaĝaja da'me nach'e eta't da'me qoyauo'oe gaa'me najaqajel onolqa'tape naa'me 'uoidi, qama'le nach'eda jo'ne netoueneque gaa'me jo'ne mach'e loeco.

⁴ Qa'a jaga'me letauo' ga'me uaca lec'oĝot uotaĝa jaga'me quetaq letauo' ja naqaga ta'le yapalaĝa't jogaa'me loeco gaa'me jiyaĝa'u.

⁵ Chane'eja da'me male nec'ata jenjo' aleua ñe'me Cristo, qama'le t'aqataĝanem joñe'me Dios, enaac: “Ja a'uamaqate'n gaa'me najaqajel jo'ne qoyigouelo nale, Nataq'aen gaa'me nachetaqataĝanaqatel, Dite da'me jayem auanem jena'me yapat.

⁶ Yataqata ja a'uamaqate'n gaa'me necataqa Uotaĝa jogaa'me najaqajel Da'me qaedi auapalaĝa't jogaa'me loeco gaa'me jiyaĝa'u.

⁷ Chane'eja male jenaac: «Am Ñedios, nayi da'me jayem male ñanaequena Qaedi ja'uo da'me jo'ne mach'e adelnataĝac, Qa'a naq'aeta da'me jo'ne joote qoyediñe 'me jayem yelo'teguet.»”

⁸ Qama'le da'me dojo' 'laqatac joñe'me Cristo 'yaĝatetac ñe'me Dios da'me ja 'yamaqaten gaa'me najaqajel jo'ne qoyigouelo nale, uotaĝa gaa'me nachetaqataĝanaqatel uotaĝa gaa'me necataqa, qama'le ja yaconegueta, da'me qaedi yapalaĝa't gaa'me loeco jogaa'me jiyaĝa'u, mate mane'e nach'egaua gaa'me najaqajel jo'ne qodamaĝajoĝolo'te ta'le qoyauo'oe.

⁹ Yem qama'le yitaĝa eetac: “Nayi da'me ñanaequena, am Taĝadena', qaedi ja'uo da'me jo'ne a'uamaqaten.” Da'me dojo' jo'ne eetojo' da'me male qoyen yapalaĝat da'me yoyadegue gaa'me necataqa jo'ne toye's, qama'le yacha'ñe ga'me 'lachaqa' ga'me onolec jo'ne dalaĝaic.

¹⁰ Chane'eja ñe'me Dios joote qo'mi e'n yoqovite' q'ae'n, yajouaĝat da'me 'lonatac joñe'me Jesucristo jo'ne yoqo'cha da'me lelnataĝac joñe'me Dios, qama'le 'yaĝateuo da'me mach'e 'loyaĝac qaedi qoyalat. Ch'e onolec da'me nalataguec, qaedi nale'en da'me qo'mi yoqovite' q'ae'n.

¹¹ Eja jogaa'me letaĝayaĝanaĝanaqa joga'me judiopi da'me 'yetetedac yemeda naa'me noloqo'ote da'me mach'e 'lonataĝanaĝa'j, qama'le ja yaĝadiñi da'me 'yiyelaĝatedapelegue da'me yauo'oe gaa'me lajaqajel, mate mane'e ja naqaegaua ta'le yapalaĝa't jogaa'me jiyaĝaua loeco.

¹² Qalaĝaja ñe'me Jesucristo mach'eñe da'me 'naĝatela't, qa'a onolec da'me leleuaĝa qaedi nach'e eta't da'me nep'aĝanegueta naa'me qadoeco, qama'le yem da'me jo'ne qo'yetec male na'ña jena'me yayaten joñe'me Dios.

¹³ Qama'le nayi male nach'edi 'me ue'tague da'me deuataĝatac, chayovida'a qom Dios male en petalo'te naa'me lapia'te jogaa'me laute'upi.

¹⁴ Qa'a da'me jo'ne onolec joga'me najaqajec, chiyaqayi da'me dojo' male qoya'uo da'me nach'e eta't da'me qoye'n yataqatelo'te jogaa'me liquiyaqa joñe'me Dios.

¹⁵ Qama'le ñe'me Dios Lepaqal nataq'aen qo'mi 'yaĝatema da'me eeta, enaac:

¹⁶ “'Uo da'me niyamaqataĝanaĝac jo'ne janema qomle jogaa'me jiyaĝa'u, Qom male yenoĝodegue gaa'me noloqo'ote jo'ne p'atedegue.” Nach'eda jo'ne eetac joñe'me Jaliaĝanec: “Jachauelo naa'me lai'lidi' da'me jo'ne mach'e yamaĝajoĝonaĝac, Nataq'aen da'me jedelo'te gaa'me jo'ne lelnataĝaco.

¹⁷ Qama'le ja yitaĝa ta'le jenate'talo jogaa'me jo'ne mach'e loeco, Uotaĝa jogaa'me letaĝaloĝoco.”

¹⁸ Chane'eja, qom male qoyapalaĝa't gaa'me qadoeco, qama'le ja yitaĝa ta'le youetaque da'me jaĝaue ga'me qadajaqajec ta'le qoyen lajo'vi joga'me qadoec.

Ñichiyaĝa'uo joñe'me Dios

¹⁹ Chane'eja ami yaqaya'olqa, yajouaĝat da'me naliñi qoyen jaga'me letauo' ñe'me Jesús, male qo'mi qoyaje'tema da'me jaĝaue ga'me tamenaĝaiqui, chayovida'a di'me 'nachaqa' da'me yataqata ja 'nalegue.

²⁰ Qa'a joñe'me Jesús 'youategue ca'li ga'me napadenaĝanaĝat qaedi 'uo ga'me qadadiiuo dalaĝaic 'me yelo'tegue da'me nec'alaĝa, da'me dojo' jo'ne chiyoqochigui da'me leleuaĝa joñe'me.

²¹ Nach'eñe ñe'me Jesús mach'e qadetaĝayaĝanaĝanec jo'ne p'ajaye 'me neteloqo't di'me 'lachaqa' joñe'me Dios.

²² Chane'eja 'noota qom ñichiyaĝa'uo joñe'me Dios, da'me yoqovichiguilo naa'me qadai'li nataq'aen qaya'te 'uo ga'me qadoqoleguetaĝanaĝac da'me yataqata jep'iyaqa joñe'me, da'me joote qoye'n yoqovite' naa'me mach'e qadelnataĝaco, nach'e ena'am da'me joote qoyiyodingui naa'me mach'e qadoje' ga'me noĝop jo'ne qaya'te lale'gue.

²³ Yataqata 'ñañaĝataq da'me qadeuataqataĝanaĝac jo'ne japaĝaguenataĝanaqatapec nale; ena'te joqoleguetaqatac, qa'a ñe'me Dios yataqata yepaquichigui qomle da'me jo'ne joote qo'mi yaloĝonalo.

²⁴ Qama'le onolqa'tape da'me qo'mi, 'noota qom jelaqaque ga'me lajoĝoc da'me ñecochaĝapega't, qaedi nichiguegue da'me qadoqopich'i, chayovida'a da'me nach'e eta't jauoqo da'me jo'ne 'noota.

²⁵ Ena'te jaĝanajoĝoye da'me qadema'a't, qaedi ja jenaqa'ama gaa'me jo'ne joote yaĝadegue, dite da'me 'noota qom onolqa'tape 'yañaqate't gaa'me laqaya'; yataqata jauoqo da'me dojo' qom jauanaĝa da'me male qo'mi nadi'talo ga'me nolo' da'me 'niyelaq joñe'me Qadejaliaĝanec.

²⁶ Qa'a qom nach'eda da'me jenaĝa qadelnataĝac da'me qolaqa'taguelo naa'me qadoeco, da'me joote ja'amaqatenaq da'me napaĝaguenataĝanaĝac jo'ne eja, qama'le qaya qomle ga'me najaqajec ta'le yapalaĝa't naa'me qadoeco.

²⁷ Ta'le naq'aeta qama'le nach'edata da'me jeuataqataque ga'me nec'atenaĝanaĝac jo'ne qo'mi na'talo 'me qaya'te ena'am da'me lichic, nach'ega ga'me dole' jo'ne yataqata let'adaic 'me yigouelo qomle ga'me laute'upi joñe'me Dios.

²⁸ Ca'li 'uo ga'me nale 'yota'n daa'me namaĝajoĝonaĝaco 'me chiyoqodo'ot ñe'me Moisés, da'me uo'oe gaa'me dojolqa uotaĝa tresolqa jo'ne choqotaĝanaĝayaqa da'me yauote da'me 'laqataĝanaĝa'j da'me nauteta joga'me, qama'le nach'ega qodamaĝajoĝolegue qaedi qoyalat, qaya'te ta'le 'uo ga'me lichoĝodenataĝanaĝa'j.

²⁹ Qama'le nayi, ¿qo'li ja yaguegue ga'me ne'uaĝanague'j qoyen jogaa'me jo'ne 'yota'n ñe'me Dios Lec'oĝot? Qa'a nach'egaua gaa'me jo'ne ja 'yamaqate'n jaga'me letauo' joñe'me, nach'aga jaga'me letauo' jo'ne naliñi qoyen joca'li qaedi en yepaquichigui da'me 'namaqatenataĝanaĝac dalaĝaic, qama'le en qoyapalaĝa't gaa'me qadoeco. Nach'e ena'am jogaa'me ye'uetedac ñe'me Dios Lepaqal jo'ne qo'mi yichoĝode'tape.

³⁰ Da'me qo'mi jayatenaq da'me nach'eñe ñe'me Jaliaĝanec jo'ne eetac ca'li: “Naqayem jo'ne ja'uo da'me ne'uaĝanague'j gaa'me jiyaĝa'u, nach'e ena'am da'me 'uo ga'me je'eteque.” Nataq'aen enaac: “Jec'ate'n qomle jogaa'me noyaqa jo'ne mach'e yalaqapi.”

³¹ Qama'le yataqata let'adaic da'me lichic ñe'me Dios jo'ne nach'e eta't da'me nec'aletaye, ta'le ya'uo ga'me lachoĝodec ga'me jiyaĝaua.

³² Qalaĝaja da'me ami auenache'talo jaa'me noloqo'ote jo'ne yenoĝodegue joca'li da'me yemta auacoñiyeguet da'me yoqochiñe. Ua'a ca'li yataqata 'uo da'me adeloiquiaĝaqui let'adaic, qalaĝaja ja aĝañiñi da'me adepi'i, dite da'me 'uo da'me at'añaĝaqui da'me anapogaĝadeñiyeguet da'me adachoĝodequi.

³³ Qa'a da'me ami uo'oe gaa'me jo'ne ami qoye'ue'tape joca'li da'me auajoyi'toto ga'me jiyaĝadipi jo'ne jalcote nataq'aen da'me ami qonouelatapegalo, qama'le gaa'me adaqayadi' yataqata ami uaĝayeta, da'me nach'e ena'am qoyen da'me lachoĝode'j.

³⁴ Qa'a da'me ami yataqata avichoĝodeñi' ca'li jogaa'me jo'ne netedaue jaga'me coñetaĝanaĝaiqui, nataq'aen da'me maliaĝa ami made'tape ca'li qodoĝotaĝaneque gaa'me adadiyamaqataqadi', qa'a auayachiñe da'me 'uo da'me adoĝochi laqaya jo'ne yaguegue da'me 'lonaĝac nataq'aen da'me nach'e eta't ja pal.

³⁵ Chane'eja ena'te aĝañiñi qomle da'me adeuataqataĝanaĝaqui, qa'a nach'eda jo'ne ami novidaĝa'talo qomle ga'me adomataĝanaĝaqui let'adaic.

³⁶ Qa'a maliaĝa auoviñetaque da'me a'nañaĝachiyeguet da'me adachoĝodequi, qaedi auomachi da'me auauoyi da'me laqataĝac joñe'me Dios, qama'le auacoñiyeguet qomle da'me jo'ne joote ami qo'yaĝatema.

³⁷ Qa'a da'me qoyediñe jo'ne Dios 'laqatac eet'oi: “Ja uayaloĝoguet da'me male novi' joñe'me jo'ne jetaque naequena. ¡Ja nayaloĝodela't!

³⁸ Qama'le jogaa'me jo'ne chimadichiñe da'me 'loyaĝa'j, 'Uo qomle da'me lec'alaĝa'j jo'ne chiyaqayi da'me lepe'e'. Qalaĝaja jogaa'me jo'ne 'viyelaĝata jena'me lilata', Male ja jiyamaĝade'n jogaa'me.”

³⁹ Da'me qo'mi qamqa'me ja ji'iyelaĝajoĝogue ga'me joote jachiyoĝojoĝoguet qama'le ja jajoqo'taguet ga'me ua'a da'me male qo'mi qoyala't, dite da'me 'uo da'me mach'e qadepe'e qama'le yataqata jovidaqa'a da'me nec'alaĝa.