Hebreos 1 - Nuevo Testamento Toba Sombrero Negro

Joñe'me Dios Lec'oĝot qo'mi yapaĝague'n

¹ Joca'li jaa'me 'uoidi jo'ne 'uaechidiñe, Dios yojaĝanaĝa'n jodia'me 'laqataĝanaĝanaqa da'me dojapegue'to jodia'me jiyaĝa'u jo'ne mach'e jachiyojoĝogueta: nach'e eta't 'viyelaĝalegue da'me dojapegue'to, choqoda'me yodapecache daa'me 'laqataqa jo'ne yanema.

² Qalaĝaja nayi naa'me naajo' noloqo'ote jo'ne p'atedegue, male 'uo joñe'me jo'ne mach'e C'oĝot, qama'le nach'eñe jo'ne qo'mi yapaĝague'n, nach'eñe jo'ne qoyen loqo'te ena'uaque jogaa'me jo'ne uo'oe, qa'a nach'eñe 'me chiyaqayi da'me ye'et ena'uac joca'li.

³ Queda'me naqaeñe jo'ne laqaselegaĝac da'me 'lonaĝac joñe'me Dios, nataq'aen da'me 'loyaĝac joñe'me ena'am da'me 'loyaĝac joñe'me Dios. Qama'le naa'me 'laqataqa joñe'me C'oĝot 'uo da'me lañoqotaĝanaĝa'j qaedi nelaĝatetedañe ena'uaque naa'me naajo' jo'ne uo'oe. Chane'eja ca'li yomat da'me ena'am ta'le qo'mi yiyo'y qaedi qoyapalaĝa't naa'me mach'e qadoeco, qama'le neta'ña di'me yayaten joñe'me Dios, da'me male na'ague di'me piyem jo'ne lejaliaqa'.

Ñe'me Dios Lec'oĝot napacalo'te joñaa'me piyem laje'pi

⁴ Nach'eñe joñe'me Dios Lec'oĝot jo'ne najoya'ñalo ena'uaque joga'me piyem laje'pi, qa'a naqaeñe 'me qoyen p'ajaye da'me 'loyaĝac, qama'le ja ena'ama daa'me 'loyaĝa'j ga'me piyem laje'pi.

⁵ Qa'a joñe'me Dios qaya'te ta'le ua'a da'me 'uo ga'me 'laqatac ta'le yanem ga'me piyem le'ec ta'le eet'oi: “Nayi jenjo' nolo' am ja'aĝatem Da'me naqa'am jo'ne mach'e am yalec; Qa'a da'me jayem yataqata jayem adet'a.” Uotaĝa ta'le Dios 'yaĝatetac ga'me piyem le'ec da'me eetac: “Naqayem jo'ne mach'e jayem let'a joñe'me, Qama'le naqaeñe 'me mach'e yataqachiñe yalec.”

⁶ Qalaĝaja qom 'yaĝatetac joñe'me mach'e Lec'oĝot jo'ne nipiloĝot, da'me namaĝa'ña jena'me aleua, qama'le eetac: “Yema jogaa'me mach'e yamaĝa's jo'ne piyem laje'pi, 'Noota qom 'nonaĝachidegue joñe'me.”

⁷ Nataq'aen 'yaĝatema ca'li jogaa'me piyem laje', enaac: “Da'me ami piyem laje'pi, male aueñiya'am jena'me layat, Da'me ami yecochaĝa'u, male aueñiya'am jena'me dole' lauaq.”

⁸ Qalaĝaja da'me jo'ne 'yaĝatem joñe'me Lec'oĝot eetac: “Nach'e am jo'ne am Dios, qama'le qaya'te loiquiaqa' da'me adejaliaĝa, Nataq'aen da'me am jo'ne yataqatelegue da'me anejaliaĝatelegue ena'uac.

⁹ Yataqata a'uamaqaten da'me 'noota nataq'aen adiquiya'a da'me ja no'en. Qo'che' jen am yiquiyac, mach'e jayem Anedios, Qama'le jen am jaqachigui da'me namaic let'adaic, Da'me anapacalo'te jogaa'me jo'ne am ueteda'ajop.”

¹⁰ Qama'le nach'e ena'am eetac: “Naqa'am jo'ne am Jaliaĝanec 'me aviyamaĝachiñe joca'li jenjo' aleua, Choqoda'me aue'et di'me piyem ca'li.

¹¹ Mate mane'e yemeda jogaa'me uo'oe male pa'l jo' qom'te, Qalaĝaja da'me mach'e at'oyaĝac nach'e eta't ja pal. Qa'a yema ga'me 'uo ch'e qo'naĝat qomle, ena'am ga'me noĝot jo'ne toĝoic,

¹² Qama'le qoyenanegue ena'uac, Nataq'aen yema qoyadalaĝat, Ena'am ga'me jiyaĝaua qoyenanegue ga'me loĝot jo'ne toĝoic, Qama'le ya'uo ga'me dalaĝaic. Qalaĝaja da'me at'oyaĝac nach'e eta't ja pal, qaya'te loiquiaqa'.”

¹³ Joñe'me Dios qaya'te ua'a ta'le enaac da'me dojapegue' ga'me piyem le'ec: “Ona'ague nayi jena'me jayaten, Chayovida'a qom ñoma't jogaa'me adaute'udi' Qama'le jacho'oto naa'me adapia'te.”

¹⁴ Qa'a ena'uaque jogaa'me piyem laje' nach'egaua jo'ne nepaqa'li 'me t'onataĝadeuo'o joñe'me Dios, qa'a joñe'me nach'eñe jo'ne yamaĝalo'te da'me lecochiyalo joga'me jiyaĝadipi jo'ne qonec'alaĝatedegue.