Gálatas 6 - Nuevo Testamento Toba Sombrero Negro

'Noota qom ñecochaĝapega't

¹ Ami yaqaya'olqa, ami jo'ne joote auajoitalegue ñe'me Dios Lepaqal. Chane'eja, qom 'uo ga'me qo'youatelegue da'me ya'uo loec, 'noota qom auedoilo'te naa'me onaĝayaqa at'aqataqadi' da'me auapaĝagueñi. Qalaĝaja achiya'aguet qaedi ja nach'e ena'am 'uo ga'me anapiyenaguequi da'me auauoyi ga'me ja no'en.

² Qom 'uo ga'me auaqalañitac qama'le anecochiyapega't, qa'a nach'eda naq'aeta da'me 'loyaĝac da'me qodique'teguelo da'me lamaĝajoĝonaĝac ñe'me Cristo.

³ Qom 'uo ga'me nepetapela't p'ajaye, qom ja naq'aeta, qama'le ch'e noqovila't.

⁴ Qama'le 'noota qom onolqa'tape nayatela't da'me mach'e lajoĝoc: qom 'noota qama'le mach'ega matac qa'a jouaĝa't gaa'me 'lonataqa, nataq'aen ja naloqoteneguet ga'me mach'e lajoĝo'j gaa'me laqaya'.

⁵ Qa'a onolqa'tape mach'e laviyaĝajet da'me mach'e lajoĝoc qom dajoya'aguet ñe'me Dios.

⁶ Joga'me yaconeguet da'me napaĝaguenaguec 'me 'laqatac ñe'me Dios, 'noota qom necolaĝate'ta ga'me napaĝaguenoqo't yema ga'me onaĝaic jo'ne yauana.

⁷ Ena'te anoqoviñela't: qaya'te yaqanatet ta'le yoqovin ñe'me Dios, onolqa'tape gaa'me daqataĝa'n yaconalo gaa'me jala ga'me jo'ne joote yaadiñi.

⁸ Qom qolaqatalo'te daa'me ja 'noe'n lamaico da'me qanejiyaĝauayaĝac, qama'le nale'en qadeleu. Qalaĝaja qom joqochaĝa ñe'me Dios Lepaqal, qama'le jaconaĝaguet da'me nec'alaĝa 'me qaya'te loiquiaqa'.

⁹ Chane'eja, 'noota qom ja qadeli'ñejop da'me jauoqo da'me 'noota, qa'a qom qolaqatalegue, Dios qo'mi yanema ga'me qanejetenaguec ga'me nolo' 'me laloqo' q'aen.

¹⁰ Qo'che', qom nach'e eta't jaqanatetaq, je'etaĝama da'me 'noota jogaa'me qadaqaya', qalaĝaja yataqachiñe p'ajaye yecochaĝalo jogaa'me jo'ne quetegue ñe'me Cristo.

Naqataĝaco nataq'aen nep'iyenataĝanaĝac jo'ne p'ategue

¹¹ Jenjo' lae ga'me mach'e jediñe: auec'achiñe da'me jalco'l gaa'me yedii's.

¹² Gaa'me jo'ne ami yepagaqatetapeque da'me auacoñiyeguet ga'me 'nanaĝajet jo'ne qoyichaĝaye ga'me lapat lae, jogaa'me ch'e naquitetedapega da'me qaedi jiyaĝadipi yiyamaĝade'n. Ja jetaque qoyecaa'tape jogaa'me jouaĝat ta'le 'yaĝatetedac da'me 'laqataĝanaĝac jo'ne 'yaĝatetac jaga'me nesodoso ñe'me Cristo.

¹³ Jogaa'me joote 'uo ga'me 'nanaĝajet, qalaĝaja ja que'teguelo daa'me Moisés lamaĝajoĝonaĝaco. Jaldata da'me yepaquetedapega jogaa'me da'me jetaque auacoñiyeguet da'me 'nanaĝajet qaedi 'uo da'me ni'yoĝodenaĝa'j 'me 'yaĝatetedac da'me ami yaqanate't auacoñiyeguet da'me nichaĝajoĝonaĝac.

¹⁴ Jayem qamqa'me nach'edata 'uo da'me ñi'yoĝodenaĝac da'me jaconeguet da'me jo'ne chiyaqayi da'me leleuaĝa ñe'me Qadejaliaĝanec Jesucristo. Qa'a jouaĝat da'me leleuaĝa ñe'me, male ja jen 'te p'ajaye ga'me jo'ne jenjo' aleua 'me ja no'en jayem yachalegue. Ena'am da'me jenjo' aleua joote jeleualegue.

¹⁵ Qalaĝaja, eja male ja p'ajaye qom qoyaconeguet da'me 'nanaĝajet jo'ne nichaĝajoĝonaĝac, uotaĝa ja qoyaconeguet. Da'me jo'ne p'ajaye ta'le dalaĝaic da'me lajoĝoc ga'me jiyaĝaua.

¹⁶ 'Noota qom Dios yanema ga'me 'lemaĝac jogaa'me jo'ne naq'aeta da'me uetedaue, nataq'aen yaloĝonalo da'me lichoĝodenataĝanaĝac gaa'me Dios lec'oqo'tolqa.

¹⁷ Chane'eja nayi, chiyoqotelegue da'me male qaya'te gamachaqaega ya'uo yaqalaic, qa'a jena'me yo'oc uo'oe gaa'me yedidiñe jo'ne yaloĝo'n da'me yachoĝodec qa'a jeuaĝayet ñe'me Cristo.

¹⁸ Ami yaqaya'olqa, 'noota qom Qadejaliaĝanec Jesucristo ami yanema da'me anichoĝodenataguequi. ¡Jaja'a, nach'e naq'aeta da'me dojo'!