Gálatas 3 - Nuevo Testamento Toba Sombrero Negro

Da'me 'loyaĝa'j gaa'me Galacia laje'

¹ Ami Galacia laje', ¡yataqachiñe ja ami 'te damite' qaedi maqachaĝa auetadenataĝañi! ¿Jach'e jogamaĝa ami yeda'n? Naqayem joote ami janema ga'me yoqotenaĝanaĝac jo'ne yataqachiñe di'yoqo'tegue, ga'me eeta da'me leleuaĝa ñe'me Jesucristo ca'li qoyep'elegue jaga'me sodoso.

² Jaldata onolec ga'me jetaque jayem a'uaĝachiyem: ca'li Dios ami yanema ñe'me Lepaqal, ¿qo'li chiyaqayi da'me oqui'teguelo daa'me namaĝajoĝonaĝaco, uotaĝa chiyaqayi da'me auacoñiyeguet da'me onaĝaic 'naqataĝanaĝac? ¡Qa'ejo' nach'eda chiyaqayi queda'me auacoñiyeguet da'me onaĝaic 'naqataĝanaĝac!

³ Ta'le naq'aeta da'me dojo', ¿toqoch'e ja jetaque auatetoñiyeguet? Da'me auacoñiyeguet ñe'me Dios Lepaqal, qama'le 'uo da'me lecochaĝac da'me auachiyoĝochiyalegue da'me at'oyaĝaqui 'me dalaĝaic, qama'te nayi ¿toqoch'e jetaque aueñi taue da'me mach'e adoequiaĝaqui?

⁴ ¿Qo'li jalcote da'me a'nañaĝataĝaqui jo'ne qaya'te chiyaqayi? Mate mane'e ¡ja jeetapega ta'le qaya'te ami chiyaqayilo!

⁵ Dios joote ami yanema ñe'me Lepaqal nataq'aen ami yaloĝonalo da'me lañoqotaĝanaĝac qa'a chiyaqayi da'me auacoñiyeguet da'me nep'iquinataĝanaĝac jo'ne onaĝaic 'naqataĝanaĝac; ja chiyaqayi da'me oqui'teguelo daa'me namaĝajoĝonaĝaco.

Qodaloqotenaĝana ñe'me Abraham

⁶ Nach'e naq'aeta ñe'me Abraham ca'li: “Dios yataqatelegue q'aen ñe'me qa'a yataqachiñe p'iya'a ñe'me Dios.”

⁷ Chane'eja, 'noota qom yataqachiñe auayachiñe queda'me jogaa'me jo'ne yataqatelo'te lec'oqo'tepi ñe'me Abraham nach'egaua jo'ne yataqachiñe p'iida'a ñe'me Dios.

⁸ Chiyoqo'teguet ga'me jalchi'ena joca'li daa'me 'laqataqa ñe'me Dios 'yaĝatetac da'me nach'e ena'am Dios yataqatelo'te q'ae'n jogaa'me jo'ne ja judiopi, qa'ejo' nach'eda eeta qom p'iida'a ñe'me Jesucristo. Qo'che' Dios yanem ñe'me Abraham jenjo' onaĝaic 'laqataĝanaĝac: “Nach'e am jo'ne am chiyaqayi da'me jichoĝode'n yema jena'me noyaqa.”

⁹ Chane'eja chiyaqayi di'me Abraham da'me Dios yichoĝode'tape ena'uaque gaa'me jo'ne p'iida'a joñe'me, nach'e naq'aeta da'me yichoĝoden ca'li di'me Abraham.

¹⁰ Qalaĝaja gaa'me jo'ne que'teguelo daa'me namaĝajoĝonaĝaco da'me jetaque t'onataĝadeuo'o ñe'me Dios, jogaa'me ena'am ta'le dajoteda'ague ga'me 'uo da'me lichic, qa'a gaa'me nedii's enaac: “Dios ye'uaĝa'n qomle ena'uaque gaa'me jo'ne ja que'teguelo yema daa'me namaĝajoĝonaĝaco.”

¹¹ Qom nach'edata qodique'teguelo daa'me namaĝajoĝonaĝaco da'me jetaque qoyoqo'cha ñe'me Dios, qama'le qaya'te yaqanatet ta'le qoyen yataqatelegue q'aen, qa'a daa'me nedii's enaac: “Jogaa'me jo'ne Dios yataqatelo'te q'ae'n, nach'egaua gaa'me jo'ne p'iida'a ñe'me, qama'le nach'e eta't nec'aletedaye qomle.”

¹² Qalaĝaja ta'le chiyaqayi daa'me namaĝajoĝonaĝaco joda'me qadec'alaĝa jo'ne qaya'te loiquiaqa', qama'le ja jouenaqataque ta'le jep'iyaqa ñe'me Dios, nach'edata da'me qolaqa'teguelo daa'me namaĝajoĝonaĝaco, qa'a enaac daa'me nedii's: “Ga'me jo'ne que'teguelo daa'me namaĝajoĝonaĝaco qama'le nec'aliyi da'me yoqocha'alo yemeda jogaa'me.”

¹³ Qalaĝaja ñe'me Jesucristo nep'aĝala't yaconeguet ga'me te'me qadoĝot da'me ne'uaĝanaguec 'me qoyachalegue ga'me jo'ne ja yoqocha'alo daa'me namaĝajoĝonaĝaco. Qama'le naq'aeta da'me qo'mi nec'alaĝatedegue, qa'a daa'me nedii's enaac: “Dios ye'uaĝan gamachaqaega jo'ne yeleualegue jaga'me sodoso.”

¹⁴ Qo'che' da'me Dios 'yaĝatem ca'li di'me Abraham jo'ne 'nonaĝachigui qomle ñe'me, nach'e ena'am qoyeloĝonaĝachiguilo jogaa'me jo'ne ja judiopi. Chane'eja naq'aeta, qom jep'iyaqa ñe'me Cristo, nach'e ena'am jaconaĝaguet ñe'me Lepaqal, 'me Dios joote qo'mi 'yaĝatema.

Da'me 'laqatac ñe'me Dios ja qoyapalaĝat ca'li qoyanema naa'me namaĝajoĝonaĝaco

¹⁵ Ami yaqaya'olqa, 'uo ga'me yaloqotenaĝanaĝaiqui 'me ami janema jo'ne gamachaqaega yaqanatet ta'le yayaten. Qom 'uo ga'me jiyaĝaua nayate'ne' ga'me jiyaĝaua laqaya da'me niyamaĝadenapega't, qama'le yauote ga'me nede lae jo'ne nededelegue, chane'eja qaya'te gamachaqaega yaqanatet da'me yapalaĝat uotaĝa 'uo ga'me noqotetenegue.

¹⁶ Qama'le nayi, gaa'me jo'ne yaqataĝadiñi ñe'me Dios jo'ne 'yetem ca'li ñe'me Abraham, nach'egaua qoyeloĝonaĝachiguilo ñe'me nataq'aen ga'tae'me c'oĝot. Daa'me nedii's ja 'yaĝatetedac ga'me qoyaqataĝañi ta'le qoyeloĝonaĝachiguilo “gaa'me c'oqo'tepi”, dite da'me qoyeloĝonaĝachigui “ga'me c'oĝot”, jo'ne nach'eñe Cristo.

¹⁷ Jenjo' jetaque ami ja'aĝatema: ga'me Dios yaqataĝañi ja naqaeda ta'le ua'edi yaqataqaten uotaĝa ja ya'uo 'te lajo'viyaĝac ga'me onolec namaĝajoĝonaĝac jo'ne Dios yanegue ca'li yenoĝodegue cuatrocientos treinta gaa'me 'uoidi.

¹⁸ Qa'a ñe'me Dios ta'le nach'edata yichoĝoden ga'me jo'ne que'teguelo daa'me namaĝajoĝonaĝaco, qama'le male ja ya'uo qaedi yepaquichigui ga'me yaqataĝañi jo'ne jetaque ye'et. Qalaĝaja eja queda'me ca'li Dios yayatenaĝanec ñe'me Abraham da'me yanem qomle ga'me joote yaqataĝañi 'me jetaque 'yetem, nataq'aen qaya'te gamachaqaega qoyiyaĝanaque qaedi ena'am ta'le lajo'vi.

Da'me yelotede'eguet daa'me namaĝajoĝonaĝaco

¹⁹ Chane'eja ¿jach'e ga'me yelo'teguet da'me namaĝajoĝonaĝac? Ca'li yem da'me ya'uo da'me dojo' 'laqatac jo'ne yaqataĝañi 'me yanem ñe'me Abraham, Dios qo'mi yanema daa'me lamaĝajoĝonaĝaco qaedi qo'mi yaloĝonalo queda'me je'etaqatac da'me ja no'en. Qalaĝaja gaa'me namaĝajoĝonaĝaco 'uo da'me lajo'viyaĝa'j chayovida'a ca'li novi' ñe'me Abraham c'oĝot jo'ne nach'eñe Dios tachigui q'aen ga'me yaqataĝañi 'laqatac. Dios na'yalo q'ae'n gaa'me piyem laje' gaa'me namaĝajoĝonaĝaco ca'li yanema ñe'me Moisés, qaedi ñe'me qo'mi yanema.

²⁰ Qalaĝaja ca'li yaqataĝañi da'me 'laqatac ñe'me Dios jo'ne yanem ñe'me Abraham, ja ya'uo ga'me lamaĝajec jo'ne 'laqataĝanaĝanec, dite da'me nach'eñe ya'uo da'me dojo' 'laqatac.

²¹ Chane'eja dojo' ja yelo'teguet ta'le ena'am da'me yotauan ga'me yaqataĝañi 'laqatac ñe'me Dios. ¡Yataqachiñe ja naq'aeta! Qa'a ta'che da'me namaĝajoĝonaĝac yaqanatet da'me qo'mi yanema ga'me qadec'alaĝa jo'ne qaya'te loiquiaqa', qama'le Dios qo'mi yataqatelo'te q'ae'n qa'a qolaqa'teguelo jogaa'me.

²² Qalaĝaja joda'me nedii's 'yaĝatetac queda'me yema jogaa'me aleua laje'pi yapadelo'te gaa'me loeco, qaedi ga'me ch'e jetaque qaneme q'aen ñe'me Dios jo'ne joote yaqataĝañi da'me 'laqatac ñe'me, nach'edata tachiguilo gaa'me jo'ne p'iida'a ñe'me Jesucristo.

²³ Ca'li maliaĝa ja di'yoq da'me dojo', daa'me namaĝajoĝonaĝaco yataqachiñe ena'am jaga'me coñetaĝanaĝaiqui jo'ne jouaqatoue da'me qaya'te qadadiguegue, chayovida'a jauanaĝa queda'me jouenaqataque da'me jep'iyaqa ñe'me Jesucristo.

²⁴ Daa'me namaĝajoĝonaĝaco ena'am ga'me qanapaĝaguenoqo't ca'li, jo'ne qo'mi yauequeteda'ague ga'me qadadic qama'le qo'mi yovidaĝateda'a ñe'me Cristo, qaedi Dios male qo'mi yataqatelo'te q'ae'n queda'me jep'iyaqa ñe'me.

²⁵ Qalaĝaja nayi novitequena da'me laloqo' da'me male jaqanatetaq ta'le jep'iyaqa ñe'me Jesucristo, male ja jouenaqataque ta'le qo'mi yaue'j daa'me namaĝajoĝonaĝaco uotaĝa ta'le qo'mi yapaĝague'n.

²⁶ Ami joote auep'iiya'a ñe'me Jesucristo, qo'che' ena'uaque ami joote ami Dios lec'oqo'tepi,

²⁷ qa'a ca'li ami qonachilaĝa'n, nach'e ena'am ami qoyapetenegueta ñe'me Cristo, qama'le nayi da'me adajoĝoqui auañiya'am joñe'me.

²⁸ Chane'eja male ja p'ajaye da'me ami judiopi uotaĝa ja ami 'te judiopi, qom ami nelataqa uotaĝa uojotedañi, uotaĝa ami le'emdipi uotaĝa ami yauodipi, qa'a ena'uaque ami qoyapetenegueta ñe'me Cristo qama'le ena'uac nalo'ta't.

²⁹ Chane'eja ta'le ademii'teguet ñe'me Cristo, qama'le ami qoyapetenegueta gaa'me Abraham lec'oqo'tepi, qama'le nach'e ena'am chimaqachiñe ta'le auacoñiyeguet ga'me joote yaqataĝañi 'laqatac ñe'me Dios jo'ne yanem ca'li ñe'me Abraham.