Filipenses 4 - Nuevo Testamento Toba Sombrero Negro

'Nelopague'j gaa'me Filipos laje'

¹ Ami yaqaya'olqa, jalcote da'me ami joqopitalo qama'le yataqata ami ñetonata'n. Yataqata jayem matac, qa'a ena'am ta'le ami yi'yoĝodaqa'te nayi. Chane'eja, ¡ena'te aĝañiñi da'me oqui'tegue joñe'me Qadejaliaĝanec!

² Yataqata ñachoĝodenoto jaga'me Evodia nataq'aen jaga'me Síntique qaedi male ja nautena't, qa'a ami dos joote oviyaue da'me naqayayaĝac 'me chiyoqo'ot joñe'me Qadejaliaĝanec.

³ Qama'le da'me am jo'ne eja yataqata am yecochaĝaua jena'me jenjo' qat'onatac, nataq'aen am ñachoĝodenot qaedi alecochiyalo naajo' yauo' jo'ne 'yonataĝanaĝa'u ca'li japaĝaguenataĝatapec da'me Dios 'laqataĝanaĝac, qama'le ueteda'ajop ñe'me Clemente nataq'aen yemeda jogaa'me yecochaĝa'u laqaya' joca'li. Yema naa'me naajo', joote qoyedidiñe gaa'me lenaqa'te jaga'me nede jo'ne uedalegue yema jogaa'me lenaqa'te jogaa'me Dios lec'oqo'tepi, nach'egaua jo'ne 'uo da'me 'loyaĝa'j dalaĝaic.

⁴ ¡'Noota qom nach'e eta't ami made'tape, da'me ami jo'ne ademii'teguet joñe'me Qadejaliaĝanec! Joote ami ja'aĝatema ca'li, qama'le nayi yitaĝa ñenaĝategue jenjo': ¡yataqata ami made'tape!

⁵ 'Noota qom ami qoyayate'n nale da'me yataqata ami choĝodenataĝanaĝayaqa, qa'a joñe'me Qadejaliaĝanec 'niyelaq jo' qomle.

⁶ Ena'te aueñi lichiguilo naa'me adai'lidi' nale, dite da'me nach'e eta't anetameñetac, qama'le anachoĝodeñitapecot joñe'me Qadet'a Dios nale 'uo joga'me auoviñetaque, nataq'aen auañem da'me adamaiqui nale.

⁷ Qama'le joñe'me Dios ami yanema joga'me 'nemaĝac jo'ne yataqata napacalegue ga'me yañoĝot da'me yayaten ga'me jiyaĝaua. Qama'le dojo' 'nemaĝac male 'namachidiñe q'ae'n naa'me adai'lidi' nataq'aen gaa'me adelnataĝacodi', jouaĝat da'me yataqachiñe ademii'teguet joñe'me Cristo.

⁸ Ami yaqaya'olqa, jeetapega naq'aeta jenjo' 'yaqatac nayi. 'Noota qom analoqochiñe nale jena'me jenjo' 'noota ladic, chayovida'a da'me jo'ne yataqata qo'nonaĝachigui. Qama'le nach'e eta't auenache'ta da'me eja nataq'aen da'me chimaqachiñe, da'me yataqatelegue nataq'aen da'me ja 'nalegue, da'me onaĝaic nataq'aen da'me qoyiyamaĝaden.

⁹ Yataqata a'vichi yema jo'ne joote ami japaĝagueneque quelqaya. 'Noota qom auacoñiyeguet yema da'me jo'ne ñenaĝategue nale ami jojetapegue'to, nataq'aen jayem auadenaĝachi da'me jauotac nale. Qom naq'aeta da'me auauoyi, qama'le joñe'me Dios jo'ne ami yanema da'me at'emaĝaqui, nach'eñe ami uetauelo yemeda naa'me noloqo'ote.

Pablo yanema da'me lamaic gaa'me Filipos laje'

¹⁰ Yataqata jayem matac jouaĝat da'me qo'mi naqaya' da'me jep'iyaqa joñe'me Cristo, qama'le nayi male auaqanachichi da'me yitaĝa jayem auenache'ta. 'Uo joga'me yelnataĝac da'me ja jayem 'te auapalaĝache'ta, dite da'me ch'e qaya'te lajoĝoc ta'le jayem alecochiya chayovida'a nayi.

¹¹ Ena'te aueñetapega ta'le ñenaĝategue jena'me jenjo' qa'a 'uo joga'me jouetaque; ja naq'aeta, qa'a joote jayaten da'me ñetonec joga'me jauana.

¹² Yataqata ñaya'ac da'me jouaue da'me qaya'te jauana, nataq'aen ñaya'ac laqaya da'me jouaue da'me qaya'te jouetaque; yemeda naajo' 'noyaĝaco joote jouauelo. Qama'le jayaten joda'me eeta nale 'uo ga'me niqui'yaĝac uotaĝa nale joqouat, chayovida'a da'me jayaten da'me eeta nale yaguegue da'me jauana, uotaĝa nale jayem 'naja.

¹³ Nach'eñe ñe'me Cristo jo'ne ya'uo joga'me 'yañaĝac qaedi male jeloquetape'to naa'me naajo' qat'oyaĝaco da'me jouaqa'ta jena'me aleua.

¹⁴ Qalaĝaja yataqata 'noota da'me auauoyi quelqaya da'me jayem alecochiiya, yajouaĝat da'me 'uo da'me yaqalaic ca'li.

¹⁵ Ami yaqaya'olqa jo'ne oñiya'ña di'me Filipos, joote auayachiñe da'me eeta ca'li yemta ja'aĝatetac da'me Dios 'laqataĝanaĝac jo'ne onaĝaic da'me jeca'e di'me Macedonia, queda'me nach'e amite' jo'ne jayem auamaqaiya ga'me adajaqajequi. Qaya'te tamenaĝaiqui laqaya ta'le ya'uo da'me dojo' ca'li.

¹⁶ Nataq'aen ca'li joue'ta di'me Tesalónica ja onolec ga'me najaqaje jo'ne jayem auamaqaiya ca'li.

¹⁷ Da'me dojo' jo'ne ami ja'aĝatema nayi, ja jelotaque ta'le yitaĝa 'uo joga'me jayem auañem. Nach'edata da'me jelotaque da'me nichiquetaye ga'me anejetenaguequi jo'ne Dios ami yanema qomle.

¹⁸ Joote jaconeguet yema joga'me jayem anamaqaiya, nach'ega jo'ne yataqata alidaq. Qama'le jalcote da'me jauana nayi, qa'a jada'me adajaqaje jo'ne jayem neda'a ñe'me Epafrodito, jaga'me yataqata napacalegue ga'me jouetaque. Da'me adichoĝodenataĝanaĝaqui yataqata jalcote onaĝaic, ena'am joga'me neme jo'ne jama da'me laeta da'me qoyanem joñe'me Dios, qama'le yiyamaĝaden da'me yaconeguet.

¹⁹ Chane'eja ñe'me Dios ami yanema yema joga'me auoviñetaque: chiyaqayi joñe'me Qadec'alaĝaiqui Jesucristo da'me ami yanema yema joga'me onaĝaic adeuoyaĝaqui.

²⁰ ¡Male yataqata qo'nonaĝachigui joñe'me Qadet'a Dios yemeda naa'me noloqo'ote! Jaja'a, nach'e naq'aeta da'me dojo'.

Pablo lep'iyenataĝanaĝaco jo'ne p'atedegue

²¹ Yataqata jalcote da'me yamaic jo'ne ami jamaĝalo, da'me ami jo'ne ademii'teguet ñe'me Cristo, jo'ne mach'e ami Dios lec'oqo'te. Nataq'aen naa'me qadaqaya' jo'ne jayem uetedapecot nataq'aen ami yamaĝalo da'me lamai'j.

²² Nataq'aen ami yamaĝalo jalcote da'me lamaic jena'me qadayi jo'ne 'lachaqa' jena'me jenjo', nataq'aen ga'me Dios lec'oqo'tepi jo'ne t'onataĝatedape'uo joñe'me lejaliaĝane'j ga'me Roma laje'pi.

²³ ¡'Noota qom Qadejaliaĝanec Jesucristo ami yichoĝode'n yemeda naa'me noloqo'ote!