Filipenses 2 - Nuevo Testamento Toba Sombrero Negro

'Noota qom jadenaĝataq joda'me 'loyaĝac ñe'me Cristo

¹ Joñe'me Cristo yataqata ami 'yañaqate't, jouaĝat da'me ademii'teguet joñe'me, nataq'aen da'me loqopich'i joñe'me male ami loyaĝanate'tape. Nataq'aen nach'eñe joñe'me Lepaqal jo'ne ami uetauelo, chayovida'a da'me yataqata ami joĝodayaqa nataq'aen ami choĝodenataĝanaĝayaqa.

² Chane'eja nayi yitaĝa ami ñachoĝodenouelo qaedi aueñi onolec da'me adelnataĝaqui, nach'e eta't anoqopichiyapega't nataq'aen onolec da'me auepaquitapega, qaedi yataqata adaloi'ta't. Qom auauoyi yema daa'me daajo' qama'le yataqata let'adaic da'me yamaic jo' qomle.

³ Ena'te ani'yoĝodeñila't uotaĝa ch'e aueloiquiitapega't, dite da'me onolqa'tape da'me ami 'noota qom joĝodaic na'me lauel, qaedi nach'e eta't eetapegalo gaa'me laqaya' ta'le yataqata p'ajodaye.

⁴ Qama'le onolqa'tape da'me ami 'noota qom ja jaldata da'me ch'e netela't nale, dite da'me nach'e eta't yelotaque da'me netelalo gaa'me laqaya'.

⁵ Chane'eja 'noota qom nach'e eta't auadenaĝachi joga'me lelnataĝac joñe'me Jesucristo:

⁶ Nach'eñe jo'ne jalchi'ena 'uo da'me nediosyaĝac, qalaĝaja ca'li jetaque novitequena ja 'nañaĝatec da'me dojo' 'loyaĝac.

⁷ Dite da'me yepotan ca'li da'me mach'e 'lonaĝac, qama'le yaconeguet da'me 'loyaĝac joga'me ch'e namaĝajec; male di'yoq da'me nejiyaĝauayaĝac.

⁸ Chane'eja male yatañe da'me lajoĝoc ga'me jiyaĝaua, qama'le yataqata ja ni'yoĝodela't, dite da'me yataqata yoqo'cha joñe'me Dios chayovida'a ca'li yeleu: ¡qama'te qoyalat ca'li da'me qoyep'elegue jañe'me sodoso!

⁹ Qo'che' joñe'me Dios yanem da'me lejaliaĝa jo'ne yataqata p'ajaye. Qama'le naqaeñe joñe'me jo'ne qoyen napacalo'te yema jogaa'me jaliaĝanaqa laqaya',

¹⁰ qaedi male naqaeñe jo'ne qonetamenot da'me yejoidiñe naa'me leliquetel yema jogaa'me uo'oe: jogaa'me ueteda'ague di'me piyem choqogaa'me uetedalegue jena'me aleua nataq'aen jogaa'me uetedo'ot jena'me aleua,

¹¹ qaedi male yema qo'yaĝatetedac queda'me nach'eñe joñe'me Jesucristo naqaeñe jo'ne Qadejaliaĝanec. Qama'le naq'aeta da'me yataqata qo'nonaĝachigui joñe'me Dios mach'e Qadet'a.

Ga'me Dios lec'oqo'tepi ena'ama gaa'me lecoyadaĝanaqatel ga'me jiyaĝadipi laqaya'

¹² Ami yaqaya'olqa, ca'li maliaĝa ami jouetauelo, yataqata jayem auoqochiiya nale 'uo ga'me ami jamaĝalo'te. Qama'le nayi da'me jayem qaya'a, jetaque nach'e ena'am auauoyi nale ga'me ami jamaĝalo'te. Chane'eja nach'e eta't a'nañaĝachi da'me a'nonaĝachiyegui joñe'me Dios qaedi yataqata ami 'noote', qaya'te auoviñetaque.

¹³ Qa'a nach'eñe joñe'me Dios jo'ne ami yanouelo da'me nelnataĝaco jo'ne onaĝayaqa nataq'aen ami yanema da'me at'añaĝaqui qaedi aueñi di'yoq da'me yepaquetapega joñe'me.

¹⁴ Chane'eja gamachaqaega ga'me a'vichi, ena'te ami jaĝayaqa uotaĝa ta'le auecochetapiye nale,

¹⁵ qaedi yataqata ami ja 'nalo'te qama'le qaya'te 'uo ga'me ami yepoleguelo'te. Da'me ami mach'e Dios lec'oqo'tepi jo'ne qaya'te qoyen adaviyaĝajet, qalaĝaja queda'me oviyauelo ga'me aleua laje'pi jo'ne p'aguenataĝanaĝayaqa nataq'aen jiyaĝa'u jo'ne loeco lo'olpi, 'noota qom nach'e eta't aueñi di'yoq joga'me onaĝaic, aueñiya'ama gaa'me uaqachiñil da'me yecoyadelegue na'me 'lalaĝa.

¹⁶ Ena'te aĝañiñi da'me a'uaĝachetac da'me dojo' 'naqataĝanaĝac, nach'eda jo'ne chiyaqayi da'me 'noyaĝac 'me ja 'naidena'a. Qom oquitague jena'me jenjo' qama'le nach'e eta't jayem aueñi matac, qama'le ga'me nolo' qom yitaĝa 'niyelaq joñe'me Cristo, male jayaten da'me 'yonataĝanaĝac nataq'aen jo'me 'yañaĝac ja ch'e yijamaĝajaye dite da'me yataqata 'uo da'me chiyaqayi.

¹⁷ Da'me jayem uotaĝa male jayem qoyalat qomle, qama'le da'me yeleuaĝa ena'am ta'le qoyen najaqajec jo'ne qoyecodelegue da'me mach'e adajaqajec 'me chiyaqayi da'me adepi'i. Qama'le qom naq'aeta jena'me jenjo', male yataqata jayem matac jo' qomle, qama'le ami ñetauanaĝa'u da'me yamaic, onolqa'tape da'me ami.

¹⁸ Qama'le nach'e ena'am da'me ami: ¡'noota qom ami made'tape, qaedi ñetauanaqaye da'me qadamaic!

Pablo 'yaĝatetac ñe'me Timoteo nataq'aen ñe'me Epafrodito

¹⁹ Yataqata jajo'ta joñe'me Qadet'a qaedi ja cop'a jo' qomle da'me ami jamaĝalo joñe'me Timoteo, qaedi ami jayate'n jo' qomle, qama'le yataqata jayem matac jo'.

²⁰ Nach'eñeta ñe'me Timoteo jo'ne 'uo da'me lelnataĝac ena'am da'me mach'e yelnataĝac, qaya'te 'uo ga'me laqaya. Qama'le yataqata 'uo da'me lepagaĝac joda'me ami, qa'a jouaĝat da'me yataqata ami noqopitalo.

²¹ Qama'le jogaa'me jiyaĝa'u laqaya' ch'e nenateta'ajalo nale e'n p'ajodaye ga'me jetaque yauata, qama'le ja yauote joga'me yiyamaĝaden joñe'me Jesucristo.

²² Qalaĝaja da'me ami joote auayachiñe joda'me 'loyaĝac joñe'me Timoteo, yataqata 'noota joñe'me, ena'am ta'le yalec, qama'le yataqata jayem lecochiya ca'li qadalo'ta't da'me ja'aĝataqatac da'me Dios 'laqataĝanaĝac.

²³ Chane'eja jetaque ami jamaĝalo joñe'me, qom male jayaten joda'me jayem qo'yetec qomle.

²⁴ Qalaĝaja jalcote jep'iya'a joñe'me Dios da'me jayem yajeta qaedi nach'e ena'am jayem da'me ami jec'atalo qomle.

²⁵ Qalaĝaja nayi 'uo da'me yelnataĝac laqaya, da'me yitaĝa ami jamaĝalo joñe'me qadaqaya Epafrodito, nach'eñe ñe'me adamaĝajequi jo'ne anamaĝayiquena ca'li qaedi jayem lecochiya nale 'uo joga'me jouetac, naqaeñe jo'ne yecochaĝaua nayi, yataqata 'uañaĝaicolec joñe'me. Qama'le jeetapega 'noota qom ami 'viyelaĝalo nayi,

²⁶ qa'a joñe'me yataqata ami netonata'n qama'le jalcote da'me lamaic ta'le yitaĝa ami yauanalo. Nataq'aen jalcote joda'me lachitataic joñe'me qa'a joote auayachiñe quelqaya da'me 'uo joda'me lapite'na ca'li.

²⁷ Yataqata eja quelqaya da'me yataqata yeleuac joñe'me, chayovida'a da'me yamta'le yeleu. Qalaĝaja Dios yataqata yichoĝoden ñe'me, nataq'aen da'me jayem yichoĝoden, qaedi ja yañodelegue joda'me yachoĝodec jo'ne jouetaue nayi.

²⁸ Chane'eja jalcote da'me jepaquetapega ta'le ami jamaĝalo ñe'me, qaedi yitaĝa ami made'tape qom auañiya, qama'le da'me jayem male ja jayem 'te totelegue.

²⁹ Yataqata ami made'tape qom auañiya, qa'a auayachiñe da'me nataq'aen Qadejaliaĝanec lamaĝajec joñe'me; nach'e eta't adoqopichiyalo jogaa'me jo'ne naq'aeta da'me 'loyaĝa'j, eda'am ñe'me Epafrodito,

³⁰ qa'a ñejo' yamta'le yeleu da'me t'onataĝatape'uo joñe'me Cristo, yataqata yanegue joda'me nejiyaĝauayaĝac qaedi jayem lecochaĝaneguet, da'me jo'ne ja auaqanachichi ta'le auauoyi da'me ami, yajouaĝat da'me ami qaya'alo.