Efesios 6 - Nuevo Testamento Toba Sombrero Negro

Gaa'me net'al choqogaa'me nec'oqo'te

¹ Ami ñoqolqa, 'noota qom yataqata auoqochiiyalo nale gaa'me adet'aldi', jouaĝat da'me ami nataq'aen ovi'tajop joñe'me Cristo, qa'a chimaqachiñe ta'le naq'aeta da'me auauoyi.

² Jena'me jenjo' Dios lamaĝajoĝonaĝac enaac: “'Noota qom yataqata a'nonaĝachiyeguilo gaa'me adet'aldi'”, nach'ena jo'ne 'uo ga'me chiyaqayi:

³ “qaedi onaĝaic na'me adadiqui, nataq'aen qaedi jalote da'me anejiyaĝauayaĝaqui da'me anec'aliitalegue jena'me aleua.”

⁴ Nataq'aen ami net'al, ena'te aueñi dalemata'y jogaa'me ac'oqo'chedi', dite da'me yataqata auapaĝagueñi' gaa'me, chayovida'a qom yayate'n jena'me jenjo' qadepe'e ladic.

Gaa'me nalemaĝaje'te choqogaa'me nejaliaĝanaqa

⁵ Ami nalemaĝaje'te, 'noota qom yataqata auoqochiyalo nale gaa'me jo'ne ami nejaliaĝatelo'te; 'noota qom jalcote da'me a'nonaĝachiyeguilo gaa'me nataq'aen alecochiiyalo, ena'am ta'le a'uonataĝañiuo'o joñe'me Cristo.

⁶ Qama'le nach'ena jena'me jenjo' nach'e eta't auauoyi, ja nach'edata da'me auauoyi nale ami yec'ate'tape jogaa'me adejaliaĝanaqadi'. Da'me ami nach'e ena'am ami lalemaĝaje'te joñe'me Cristo, qama'le 'noota qom yataqata a'nañaĝachi da'me auauoyi ga'me loequenataĝanaĝac joñe'me Dios.

⁷ Nach'e eta't aviyamaĝachetac ga'me at'onataqui, qa'a ja ch'e a'uonataĝañiuo'o ga'me aleua le'ec, dite da'me aueñi ena'am ta'le a'uonataĝañiuo'o joñe'me Dios.

⁸ Qa'a joote auayachiñe queda'me yema gaa'me lalemaĝaje'te jo'ne yataqata yiyamaĝatetedac ga'me 'lonata'j, ñe'me Qadet'a ya'uo qomle da'me nejetenague'j.

⁹ Nataq'aen ami jaliaĝanaqapi, 'noota qom yataqata avichoĝodeñi' gaa'me adalemaĝaje'chidi', ena'te aueñi co'yaq ga'me anenaĝachiyidegue, qa'a joote auayachiñe queda'me 'uo ñe'me mach'e Adejaliaĝanequi jo'ne nach'e ena'am Lejaliaĝane'j gaa'me adalemaĝaje'chidi', nach'eñe jo'ne ne'tague di'me piyem, qama'le nach'e eta't naloqote'n yema jena'me jiyaĝadipi, yataqata qaya'te liquiyac joñe'me.

Da'me 'leuoĝonaĝa't joga'me p'etaqadaiquipi

¹⁰ Ami yaqaya'olqa jo'ne yataqata ademii'teguet joñe'me Cristo, nach'e eta't a'nañaĝachiyeguet da'me 'lañaĝac joñe'me.

¹¹ A'ueuoĝoñiyot da'me dojo' 'leuoĝonaĝa't joñe'me Dios jo'ne ami yanema, qaedi yataqata adaloi'tagueta yema gaa'me payac letaĝaloĝoco.

¹² Qa'a ja jeloquiaĝaye gaa'me jiyaĝa'u jo'ne ch'e napat nataq'aen p'inaqa, qa'a gaa'me qadaute'u nach'egaua gaa'me payagodipi jo'ne lejaliaqa' di'me p'ajeguem, nach'egaua jo'ne nejaliaĝatelo'te gaa'me 'nonataqa jo'ne chiyoqodaue ga'me 'lalaĝa.

¹³ Chane'eja, yataqata auañidiñe yemeda gaa'me mach'e qoye'n qat'euoĝonaqa'te, qaedi yataqata a'nañaĝachi qom male ami novitalo gaa'me noloqo'ote jo'ne yataqata ja 'noe'n, qama'le yataqata auaqanachichi ta'le ja anajeñe'tegueta gaa'me adaute'udi'.

¹⁴ 'Noota qom nach'e eta't a'nañaĝacheta't, qama'le da'me eja choqoda'me liyamaqataĝanaĝac joñe'me Dios ami netayelo nataq'aen ami netelalo, qa'a naajo' male qoye'n at'euoĝonaqachidi'.

¹⁵ Nach'e eta't aniyamaĝacheta't qaedi a'uaĝachetac da'me Dios 'laqataĝanaĝac 'me chiyaqayi da'me 'nemaĝac, qama'le aueñiya'am ga'me coico le'ec jo'ne yaidiñe gaa'me lapela'te da'me niyamaĝateta't.

¹⁶ Da'me adepi'i joñe'me Dios ena'am ta'le adequepaĝanaĝachi, qaedi auaqanachichi ta'le a'uomaĝachi yema gaa'me payac lechiquenal jo'ne edañguilo.

¹⁷ Nataq'aen jetaque da'me adec'alaqai ami de'uolo'te, ena'am ga'me jaĝa'to jo'ne laicaua 'me de'uolegue na'me laqaic ga'me coico le'ec. Nach'e ena'ama daa'me Dios 'laqataqa jo'ne ena'am ta'le daĝanaĝat 'me ami yanema ñe'me Dios Lepaqal, qama'le yataqata noma't na'me adauteua.

¹⁸ Nach'e eta't anetameñetapecot joñe'me Dios; nale aviyaĝañiyot joñe'me, auomachii'ta joñe'me Lepaqal qaedi nach'eñe ami netamenaĝanaĝa'n. Ena'te ami lichiguilo qama'le auajelaĝañilo'te yema ga'me Dios lec'oqo'tepi.

¹⁹ Nach'e ena'am jayem auajelaĝañilegue, qaedi joñe'me Dios jayem yanem da'me 'yañaĝac da'me ja'aĝatetac da'me mach'e 'laqataĝanaĝac jo'ne ja di'yoq ca'li.

²⁰ Joñe'me Qadejaliaĝanec jayem yamaĝalegue ca'li jena'me jenjo' qaedi ja'aĝatetac jenjo' jo'ne 'lonataĝanaĝac, nach'ena jayem yajouaĝat nayi da'me male jayem qoyecoñedetac. Chane'eja anachoĝodeñiyot joñe'me Dios qaedi yataqata ya'uo ga'me 'yañaĝac, qaedi maliaĝa jequeta da'me ja'aĝa'tape naajo' 'naqataqa.

Da'me p'ategue lep'iyenataĝanaĝac joñe'me Pablo

²¹ Nayi ami jamaĝalo na'me Tíquico, jenjo' qadaqaya jo'ne onaĝaicaloec, mach'e Qadejaliaĝanec lalemaĝajet jo'ne yataqatelegue. Jenjo' jo'ne ami yec'atalo male ami 'yaĝatema jo' qomle yema ga'me 'uo, joga'me eeta da'me ñejiyaĝauayaĝac nataq'aen joga'me je'etetac nayi.

²² Chane'eja ami jamaĝalo nayi qaedi ya'uo jo' qomle ga'me at'añaĝaqui da'me male qo'mi auayachiñe'.

²³ Ami yaqaya'olqa, male ñachoĝodenot joñe'me Qadet'a Dios choqoñe'me Qadejaliaĝanec Jesucristo qaedi yataqata yanema yema na'me qadayi joda'me 'nemaĝac nataq'aen da'me noqopich'i, da'me chiyaqayi da'me lepe'e'.

²⁴ 'Noota qom joñe'me Dios yataqata yichoĝode'n onolqa'tape naa'me jo'ne yataqata ja yaĝadiñi da'me noqopideta joñe'me Qadejaliaĝanec Jesucristo, nach'e eta't ja pal.