Colosenses 3 - Nuevo Testamento Toba Sombrero Negro

¹ Chane'eja, queda'me Cristo ami 'niyelaĝachidijeguem, 'noota qom aueloyapiye gaa'me jo'ne uo'oe 'me ueda'ague di'me piyem, 'me ne'tague ñe'me Cristo da'me ñichiñe, na'ña jena'me yayaten joñe'me Dios.

² Auenache'talo gaa'me uo'oe jo'ne ueda'ague di'me piyem, qalaĝaja gaa'me uetedalegue jena'me aleua ena'te auenache'talo,

³ qa'a ena'am ta'le joote adelevi, qama'le Dios joote yaqataĝata't da'me at'oyaĝaqui jo'ne dalaĝaic qaedi oñiya'ajop ñe'me Cristo.

⁴ Nach'eñeta ñe'me Cristo jo'ne chiyaqayi da'me at'oyaĝaqui, qama'le qom yitaĝa di'yo'quena ñe'me, qama'le nach'e ena'am ami di'yoĝoma da'me male najaqachiguilo joda'me at'onaĝaqui.

Jodaa'me 'nonataqa jo'ne chimadichidiñe

⁵ Chane'eja 'noota qom aueñe'tem ta'le yeleu da'me anejiyaĝauayaĝaqui 'me toijec; 'noota qom qaya'te taue da'me lequejeguetaĝa, uotaĝa ta'le ye't ga'me paĝachiguilo, uotaĝa ta'le quetapegue'to gaa'me jo'ne yachoĝode'n nale nataq'aen ga'me ja 'noe'n lamaico, uotaĝa ta'le jetaque yauec da'me lamaic joda'me neuoyaĝac, qa'a dojo' ena'am da'me qonetameno't ga'me nequi'i.

⁶ Qama'le yajouaĝa't naa'me naajo' uo'oe, da'me lalemataic ñe'me Dios nedalo'te qom'te gaa'me jo'ne ja yoqochideta.

⁷ Nach'e ena'ama da'me ami, yataqata oqui'teguelo joca'li naa'me naajo' ja 'noe'n.

⁸ Qalaĝaja nayi aĝañidiñi ena'uaque naa'me naajo': da'me nalemataic, gaa'me adelnataĝacodi' 'me ami yachoĝode'n, gaa'me ja 'noe'n, gaa'me 'nenaĝanataĝanaĝaco nataq'aen ga'me 'naqataqa jo'ne paĝachiguilo.

⁹ Ena'te anoqoviñetapega't, qa'a joote aĝañiñi da'me toijec at'oyaĝaqui nataq'aen ga'me ja no'en jo'ne a'vichetac ca'li.

¹⁰ Nataq'aen joote auaiñiñe da'me dalaĝaic at'oyaĝaqui 'me nichiquetajeguem, chayovida'a da'me ena'am da'me 'loyaĝac ñe'me Dios, nach'eñe jo'ne A'netoqo'chi, qaedi yataqachiñe nedo'ta't da'me auatetoñi.

¹¹ Male qaya'te lajo'viyaĝac da'me am griego uotaĝa am judío, uotaĝa ta'le 'uo ga'me nichaĝajoĝonaĝac uotaĝa ta'le qaya, uotaĝa ta'le am yaqa'a le'ec uotaĝa viaĝa le'ec, uotaĝa ta'le am nelatac uotaĝa ja am 'te nelatac. Nach'eñeta ñe'me Cristo jo'ne yemata'a't yema nataq'aen ena'uaque uetauelo.

¹² Dios ami noqopitalo, nataq'aen ami yatetelo'te qaedi ovitauelo joga'me c'oqo'tepi joñe'me. Chane'eja anaviquila't da'me qaedi ami choĝodenataĝanaĝayaqa, nataq'aen ami qopitaĝanaqataqayaqa nataq'aen ami pogaĝadenaĝayaqa. Ena'te ami 'yoĝodenaĝayaqa, uotaĝa ta'le ami co'yaqayaqa.

¹³ Aneualaĝaeñetapegue'to jogaa'me adaqayadi', nataq'aen qom 'uo ga'me ami 'yeteque da'me ja no'en, qama'le auapalaĝachi' gaa'me laviyaĝaco. Nach'e naq'aeta ñe'me Jaliaĝanec yapalaĝa't joga'me adaviyaĝacodi', nach'e ena'am da'me ami 'noota qom auapalaĝachi' jogaa'me anaviyaqatagueco.

¹⁴ Anapaquiyalo'te naa'me naajo' qom anaviquila't joda'me adoqopich'ii, nach'eda necoñeteguet da'me yataqatelegue naqayayaĝac.

¹⁵ Nataq'aen 'noota qom da'me 'lemaĝac joñe'me Cristo yelo'oguelo naa'me adai'lidi', qa'a joñe'me Dios ami yiyaĝanalo qaedi nach'ega onolec napat ami qoyapetenegueta. Qama'le auañem da'me adamaiqui.

¹⁶ 'Noota qom Cristo 'laqataĝanaĝac nach'e eta't jaqachiguilo q'ae'n naa'me adai'lidi'. Nataq'aen ami yatenaĝanaĝayaqa da'me anapaĝagueñiya't nataq'aen anequeuoquitalo nale gaa'me adaqayadi'. Nataq'aen da'me 'uo da'me lamai'j naa'me adai'lidi' qama'le a'nonaĝachigui joñe'me Dios, a'uoñe'tape joga'me nalaco jo'ne Dios Lepaqal ami yanema.

¹⁷ Nataq'aen ena'uaque gaa'me jo'ne auauoyi uotaĝa anenaĝachiyegue, a'viche'tape nale jogaa'me qa'a jouaĝat da'me ademii'teguet joñe'me Qadejaliaĝanec Jesucristo. Nataq'aen auañem da'me adamaiqui ñe'me Dios nale, yajouaĝat da'me jo'ne Cristo ami yanema.

Da'me 'noota ta'le a'vichiyeque gaa'me adaqayadi'

¹⁸ Ami yauo' jo'ne joote a'uoñi, 'noota qom auoqochiyalo jogaa'me adouadi', qa'a dojo' nach'eda at'onataqui jo'ne chiyaqayi da'me auep'iiya'a joñe'me Jaliaĝanec.

¹⁹ Ami le'mi jo'ne joote a'uoñi, 'noota qom adoqopichiyalo naa'me adouadi', ena'te a'vichiyeque ga'me co'yaq.

²⁰ Ami nec'oqo'tepi, 'noota qom auoqochiyalo jogaa'me adet'aldi', qa'a nach'eda yiyamaĝaden joñe'me Jaliaĝanec.

²¹ Ami net'al, ena'te aueñi dalemata'tape jogaa'me ac'oqo'chedi', qaedi ja lichiguilo naa'me lai'li.

²² Ami nelataqa, auoqochiyalo jogaa'me adadipaidi' jena'me jenjo' aleua, ja nach'edata da'me qom ami yec'ate'tape, qaedi ami yiyamaĝade'n jogaa'me, dite da'me yataqachiñe yataqatelo'te naa'me adai'lidi', yajouaĝat da'me at'oiyapega joñe'me Jaliaĝanec.

²³ Yema ga'me auauoyi, 'noota qom aviyamaĝachetac nale ga'me at'onataqui, aueñe'tem ta'le naqaeñe ñe'me Jaliaĝanec a'uonataĝañetape'uo, ja naqaegaua ga'me ch'e jiyaĝa'u.

²⁴ Qa'a joote auayachiñe da'me 'uo qomle ga'me anejetenaguequi, qa'a ñe'me Jaliaĝanec ami yanema qomle ga'me adajo'vii. Da'me ami yataqachiñe a'uonataĝañi'uo joñe'me Cristo, jo'ne yataqatelegue Adejaliaĝanequi.

²⁵ Qalaĝaja gaa'me jo'ne ye'tape daa'me ja 'noe'n, nach'egaua qoyejetenec qomle ga'me ja no'en jo'ne nach'ega 'yetetac, qa'a Dios qaya'te yiyota'a da'me lec'atenaĝanaĝac.