Colosenses 1 - Nuevo Testamento Toba Sombrero Negro

Lep'iyenataĝanaĝac ñe'me Pablo

¹ Jayem Pablo jo'ne jayem lamaĝajec ñe'me Jesucristo, qa'a naq'aeta da'me yepaquetapega joñe'me Dios. Da'me jayem choqoñe'me Timoteo male ami jep'iyena',

² ami Dios lec'oqo'tepi jo'ne oñiya'ña di'me Colosas, ami qadaqaya'olqa jo'ne a'nañaĝachiyec da'me ademii'teguet joñe'me Cristo. 'Noota qom Dios mach'e Qadet'a ami yanema da'me anichoĝodenataguequi nataq'aen da'me at'emaĝaqui.

Pablo yanem lamaic joñe'me Dios

³ Nale ami jajelaĝanaĝalo'te qama'le janemaĝam da'me qadamaic joñe'me Dios, jo'ne Let'a ñe'me Jesucristo mach'e Qadejaliaĝanec,

⁴ qa'a joote janomaqa da'me yataqachiñe auep'iiya'a joñe'me Cristo Jesús, nataq'aen queda'me adoqopichiyalo ena'uaque joga'me Dios lec'oqo'tepi.

⁵ Dojo' yajouaĝat da'me anaquichi'ta ga'me jo'ne jalchi'ena qoyiyamaĝatetac qaedi ami qoyanema qomle da'me oviya'ague di'me piyem, da'me jo'ne auomachiiya ca'li ami qo'yaĝatema da'me yataqatelegue jo'ne 'laqataĝanaĝac ñe'me Dios.

⁶ Naqaeda da'me 'naqataĝanaĝac jo'ne joote ami novida'alo, qama'le ena'am ta'le nichiquetaye da'me jalayaĝac, ena'am da'me 'uo yemeda naa'me ale'u lael. Nach'eda da'me ami chiyoqotelegue ca'li yemta auomachiiya qama'le auayachiñe joga'me lichoĝodenataĝanaĝac ñe'me Dios queda'me eja yataqatelegue.

⁷ Dojo' ami yapaĝagueneque ca'li ñe'me qadaqaya Epafras, nach'eñe jo'ne qat'onataĝanaĝaua nataq'aen Cristo nejoĝonec jo'ne yataqatelegue, nach'eñe jo'ne adiyamaqai'tem.

⁸ Nach'eñe qo'mi yayatenaĝanaĝaneque ca'li da'me adoqopich'ii jo'ne ami uetauelo, qa'a ami t'onataĝanouelo ñe'me Dios Lepaqal.

Da'me lec'alaqataĝanaĝac ñe'me Dios

⁹ Qo'che' da'me qo'mi, chiyoqotelegue jo'me nolo' ca'li ami janoma'alo, ja jaĝanaĝañi da'me ami jajelaĝanaĝalo'te nataq'aen jajelaĝanaqatapecot joñe'me Dios qaedi yataqachiñe ami yayatenaĝanaĝaneque da'me loequenataĝanaĝac, choqogaa'me yodapecache nayatenaĝanaĝaco nataq'aen gaa'me netadenataĝanaĝaco 'me ami yanema joñe'me Lepaqal.

¹⁰ Qaedi auaqanachichi ta'le 'noota ga'me auauoyi, nach'e naq'aeta ga'me yauote nale jogaa'me quetegue joñe'me Jaliaĝanec, nach'e eta't auauoyi ga'me jo'ne yiyamaĝaden joñe'me, auauoyi jala gaa'me yodapecache 'me onaĝayaqa at'onataqadi', nataq'aen aueñi nichiquetaye da'me yataqata auatetoñi joñe'me Dios.

¹¹ Jajelaĝanoqot joñe'me qaedi en chiyaqayi da'me p'ajaye lañoqotaĝanaĝac da'me ami 'yañaqate't, qaedi naq'aeta da'me auaqanachichi ta'le anapogaĝadeñiyeguet ena'uac nataq'aen 'uo da'me at'añaĝaqui choqoda'me adamaiqui.

¹² Qama'le auañem da'me adamaiqui joñe'me Qadet'a, qa'a joñe'me ami yaqataĝata'ajalo qaedi auacoñiyeguet da'me lejaliaĝa jo'ne yoqochiñe qama'le anetauañiya'uo ga'me yanema yema joga'me c'oqo'tepi joñe'me.

¹³ Ñe'me Dios joote qo'mi nec'alaĝatedegue, da'me qo'mi yachiyoĝotauelo joda'me 'lañaĝac ga'me 'lalaĝa, qama'le qo'mi yovidaĝateda'a da'me lejaliaĝa ñe'me C'oĝot jo'ne yauotec,

¹⁴ nach'eñe jo'ne chiyaqayi da'me qo'mi qonec'alaĝatedegue nataq'aen da'me male qoyapalaĝa't yemeda naa'me qadoeco.

¹⁵ Cristo nach'eñe Dios jo'ne naloĝola't, jo'ne ja di'yoq mañaĝa; nach'eñe Dios Lec'oĝot jo'ne 'uaechiñe da'me 'uo joca'li maliaĝa qaya ga'me qoye'et.

¹⁶ Qa'a chiyaqayi joñe'me Cristo, ñe'me Dios ye't joca'li ena'uaque gaa'me uo'oe: gaa'me ueteda'ague di'me piyem nataq'aen gaa'me uetedalegue jena'me aleua, gaa'me di'yo't nataq'aen gaa'me ja di'yo't, gaa'me uo'oe jo'ne ja di'yo't 'me nejaliaĝatedelegue jena'me aleua, jo'ne 'uo da'me lañoqotaĝanaĝa'j choqoda'me 'lañaĝa'j. Ena'uaque gaa'me uo'oe qoye'tema joñe'me qama'le qoye'n lalemaĝaje'te joñe'me.

¹⁷ Cristo jalchi'ena 'uo joca'li maliaĝa qayaua naa'me naajo' uo'oe, qama'le nach'eñe jo'ne 'nelaĝatetañe ena'uac.

¹⁸ Uoja'eda, ñe'me Cristo nach'eñe laqai'j joga'me p'etaqadaiquipi, jo'ne mach'e lapat. Nach'eñe jo'ne chiyoqochiñe, nataq'aen 'uaechiñe da'me 'niyelaĝajeguem chiyaqauelo joga'me napa'lpi, qaedi nach'eñeta jo'ne onolec ñe'me lajoĝola't ena'uaque gaa'me uo'oe.

¹⁹ Qa'a ñe'me Dios jetaque yanaue joñe'me Lec'oĝot ena'uac da'me nediosyaĝac,

²⁰ qama'le chiyaqayi q'aen joñe'me queda'me yitaĝa niyamaĝadenegueta ena'uaque jogaa'me uo'oe, ena'uaque jogaa'me neda'ña jena'me aleua nataq'aen gaa'me neda'ague jodi'me piyem, qama'le ya'uo da'me 'nemaĝac jo'ne yachiyoĝochichigui da'me leleuaĝa ñe'me Cristo ca'li qoyep'elegue jaga'me sodoso.

²¹ Da'me ami ena'am ta'le ami qaya'alo ca'li, da'me ja auatetoñi joñe'me Dios nataq'aen naa'me adai'lidi' nautetedapega joñe'me, yajouaĝat da'me uo'oe gaa'me ja 'noe'n 'me a'viche'tape.

²² Qalaĝaja nayi Cristo yitaĝa ami 'niyelaĝatela'ajalo, chiyaqayi da'me lachoĝodec 'me leleuaĝa ca'li cha'li ue'tena, qaedi ja ami 'te 'nalo'te da'me ami naueguedela't, qaya'te adejamaĝataĝaqui nataq'aen qaya'te adaviyaĝaje'che.

²³ Qom yataqachiñe ami ejoda da'me a'nañaĝachela't da'me ami t'añidañe q'ae'n joda'me adepi'i, 'noota qom ja auaĝañiyegue da'me adeuataqataĝanaĝaqui jo'ne chiyaqayi da'me onaĝaic 'naqataĝanaĝac ca'li yemta auomachiiya. Nach'eda da'me 'naqataĝanaĝac jo'ne joote qoyapaĝagueneque ena'uaque jogaa'me noyaqa jo'ne neda'ña jena'me aleua, nataq'aen jo'ne ja'aĝatetac da'me jayem nale japaĝaguenataĝan.

Da'me 'lonataĝanaĝac ñe'me Pablo

²⁴ Nayi jayem matac queda'me 'uo ga'me yachoĝodec yajouaĝat da'me ami yecochiyalo, qa'a da'me mach'e yachoĝodec ena'am ta'le en nalo'ta'ajalo q'ae'n jodaa'me qadachoĝodeco jo'ne chiyoqodayi da'me qademe'teguet ñe'me Cristo, yajouaĝat jena'me p'etaqadaiquipi jo'ne mach'e lapat.

²⁵ Dios jayem 'yetec da'me qaedi jayem lecochoqo't ga'me p'etaqadaiquipi, qama'le jayem 'yelopec da'me adiyamaqai'tem, qaedi ja'aĝatetac da'me mach'e 'laqataĝanaĝac.

²⁶ Dojo' yelo'teguet joda'me lelnataĝac jo'ne jetaque ye'et ñe'me Dios chiyoqo'tegueta gaa'me 'uoidi jo'ne 'uaechidiñe, qalaĝaja qaya'te joca'li ga'me jiyaĝaua ta'le yaloĝona. Qalaĝaja nayi male yataqachiñe yaloĝonalo joga'me mach'e lec'oqo'tepi.

²⁷ Nach'egaua jogaa'me jo'ne Dios jetaque yatetonaĝanaĝaneque joda'me p'ajaye lelnataĝac jo'ne jetaque ya'uo yemata'a't yema ga'me noyaqapi 'me uetedalegue jena'me aleua. Dojo' lelnataĝac jo'ne jetaque ya'uo nach'eda da'me lec'alaqataĝanaĝac ñe'me Cristo, joñe'me jo'ne ami uetauelo, nach'eñe jo'ne adeuataqataĝanaĝaqui 'me chiyaqayi da'me auacoñiyeguet qomle da'me mach'e at'onaĝaqui.

²⁸ Chane'eja da'me qo'mi male ja'aĝataqatac joñe'me Cristo, jaqataqatapegalo ena'uaque joga'me jiyaĝadipi nataq'aen japaĝaguenaqatapeque joda'me layatenaĝanaĝac joñe'me Cristo, qaedi onolqa'tape joga'me jiyaĝadipi yataqata yemetede'eguet joñe'me Cristo nataq'aen joote yi't da'me lepi'iyaĝa'j nale dajotedo'ot ñe'me Dios.

²⁹ Nach'eda chiyaqayi da'me jo'onataĝatac, qama'le 'ñañaĝatec yema da'me mach'e 'yañaĝac choqoda'me lañoqotaĝanaĝac ñe'me Cristo jo'ne jayem netaye.