Apocalipsis 8 - Nuevo Testamento Toba Sombrero Negro

Qonaqat jaga'me 'nanaĝanaqate jo'ne p'ategue

¹ Mane'e ca'li joñe'me 'Naĝanaĝate Lec'oĝot 'yolaĝachigui jaga'me siete jogaa'me 'nanaĝanaqate jo'ne p'ategue 'me netalegue joga'me nenañejec, qama'le ua'a da'me cha'li tochiñe di'me piyem, chayovida'a da'me yenoĝonegue ga'me media hora.

² Mane'e da'me yem qama'le jauanalo jaa'me siete piyem laje' jo'ne nechatetedañe, dajoteda'aguet joñe'me Dios, qama'le jaa'me yanema jaa'me siete najeedel.

³ Qama'le novi' jo'me piyem le'ec laqaya jo'ne lajoqot'a jajo'me laviyoĝon lae't jo'ne oro, qama'le cha'li nechachiñe da'me dajo'taguet joga'me c'atoĝonaĝala', qama'le 'uo ga'me yaneuo jo'ne laviyoĝon 'me jalcote qaedi yapoteneguet da'me netamenaĝa'j joga'me Dios lec'oqo'tepi, qama'le yequetegaĝalegue ga'me p'ajeguem joga'me c'atoĝonaĝala' jo'ne oro 'me neta'ña ga'me dajoya'ya jaga'me je'onaĝaiqui jo'ne na'ña joga'me nejaliaqa'.

⁴ Chane'eja jaga'me nemala' joga'me laviyoĝon nataq'aen da'me netamenaĝa'j joga'me Dios lec'oqo'tepi quijemegue joga'me louaq ga'me piyem le'ec da'me yec'adije'ma di'me lejaliaqa' joñe'me Dios.

⁵ Qama'le joñe'me piyem le'ec male yacona jaga'me laviyoĝon lae't, qama'le en najaqachigui jana'me poqo ga'me dole' jo'ne uetalegue joga'me c'atoĝonaĝala'. Yem qama'le yojouoĝolegue jena'me aleua, qama'le 'uo da'me 'loĝoyaĝac choqoda'me nejamaĝa nataq'aen da'me naqaselegaĝac qama'le deda jena'me aleua.

⁶ Chane'eja jogaa'me siete piyem laje' jo'ne lajoqot'alo jogaa'me siete najeedel male niyamaĝateta'ajalo qaedi male dajedaĝa'n.

Qoyajediye gaa'me najeedel

⁷ 'Uo ñe'me piyem le'ec jo'ne 'uaechiñe da'me dajedaĝan, qama'le jauana jajo'me loñi jo'ne ena'am ta'le qa' da'me qoyecodelegue jena'me aleua, choqoga'me dole' jo'ne yeleguet jaga'me netauo'. Qama'le gaa'me lael jena'me aleua jo'ne tres, 'uo ga'me onolec jo'ne yavic, nach'e ena'am jogaa'me ep'a uo'oe gaa'me yavi'j, nataq'aen yema jena'me nolelaĝa jo'ne dadala 'me uetalegue jena'me aleua.

⁸ Joñe'me piyem le'ec laqaya jo'ne dajoyalegue ñe'me jo'ne 'uaechiñe, nach'e ena'am yajediye jaga'me lajeede, qama'le qoyajaĝañgui ga'me noĝop let'adaic ga'me jo'ne ena'am ta'le qajoĝonaĝa let'adaic jo'ne edetañgui. Qama'le gaa'me lael jena'me noĝop let'adaic 'uo ga'me onolec jo'ne neleguemaĝata jaga'me netauo'.

⁹ Qama'le nach'e ena'am yele'u yema ga'me noĝop laje'pi jo'ne uetañgui jaga'me netauo', chaqagaa'me licotal jo'ne uo'oe, nach'e ena'am qoyenoĝo'n.

¹⁰ Joñe'me piyem le'ec laqaya jo'ne dajoyalo'te joñaa'me dos piyem laje' male yajediye jaga'me lajeede, qama'le 'uo jaga'me uaqachiñi lat'edai jo'ne edetañgui, ena'am jaga'me coyadaĝanaqate da'me lauaq, qama'le 'naqañe, chiyaqaje'ma di'me piyem, qama'le tachi'ña ga'me lae jogaa'me ñachel, naqaegaua jo'ne tres gaa'me lael, qama'le nach'e ena'am tañguilo jogaa'me noĝo'pi jo'ne natetedajeguem.

¹¹ Jaga'me uaqachiñi lenaĝat da'me Chem, qama'le ga'me noĝop jo'ne tañgui male qoyen chem, qama'le jalcote ga'me jiyaĝadipi jo'ne yeletem.

¹² Ñe'me piyem le'ec laqaya jo'ne dajoyalo'te ñaa'me tres piyem laje' yajediye jaga'me mach'e lajeede, qama'le naa'me tres lael jañe'me ajeua 'uo ga'me onolec jo'ne qoyolaĝachigui, nataq'aen ñe'me auoĝoic nach'e ena'am qoyolaĝachigui na'me lae, qama'le nach'e ena'am naa'me uaqachiñil jo'ne tres naa'me ua'ñalo 'uo da'me onolec jo'ne qoyalaĝachigui, qaedi 'uo da'me 'lalaĝa. Qama'le naa'me tres jo'ne lael na'me nolo', 'uo ga'me onolec lae jo'ne 'naltapiye, nataq'aen jena'me pi'yaq 'uo ga'me lae jo'ne om ñe'me auoĝoic choqonaa'me uaqachiñil.

¹³ Mane'e ca'li yem da'me dojo', qama'le jelojeguem, qama'le jomachiya ga'me uole jo'ne uayotac, quetañgui laeñi di'me piyem, qama'le enaac da'me netenec da'me 'laqatac: “¡Degueja qomle da'me lachoĝode'j joga'me jiyaĝadipi jo'ne netedalegue jena'me aleua, da'me qom male dejedaĝa'n nayi jogaa'me piyem laje' laqaya' jo'ne tres!”