Apocalipsis 7 - Nuevo Testamento Toba Sombrero Negro

Ga'me Dios lec'oqo'tepi jo'ne 144000

¹ Mane'e ca'li yem da'me dojo', qama'le jauanalo jaa'me cuatro piyem laje' jo'ne nechateta'ñalo naa'me cuatro loiquiaqa'te jena'me aleua, qama'le jogaa'me cha'li 'nelaĝatetedañe naa'me cuatro laya'che, qaedi ja yajedelegue jena'me aleua uotaĝa ga'me noĝop let'adaic, qama'le nach'e ena'ama gaa'me ep'a, qaga'te ta'le ch'e onole da'me yajedelegue.

² Qama'le nach'e ena'am jauana jo'me piyem le'ec laqaya jo'ne chiyoĝogue jena'me nayapije'ma jañe'me ajeua, nach'ejo jo'ne ue'tajop jaga'me 'lanaĝanaqate joñe'me jo'ne nach'e eta't da'me nec'aletaye, nach'eñe joñe'me Dios. Qama'le joñe'me piyem le'ec neten da'me ya'uo da'me 'laqatac da'me yiyaĝalo'te jogaa'me cuatro piyem laje' laqaya' 'me joote qoyanema da'me lañoqotaĝanaĝac qaedi yauote ga'me 'yedetec jo'ne ja no'en jena'me aleua choqoga'me noĝop let'adaic,

³ enaac: “¡Ena'te auauoyi ga'me a'vichiyec jo'ne ja no'en jena'me aleua uotaĝa ga'me noĝop let'adaic uotaĝa jogaa'me ep'a, chayovida'a qom yem da'me ja'anaq naa'me nepel jogaa'me jo'ne mach'e lalemaĝaje'te ñe'me Qanedios!”

⁴ Qama'le nach'e ena'am jomachilegue jena'me liñi jogaa'me jo'ne joote nayelo da'me 'nanaĝanaĝac: qama'le nalo'taguet ciento cuarenta y cuatro mil, da'me mach'e nedo'ta't jena'me chiyoĝogueta jogaa'me doce lec'oqo'tepi ñe'me Israel.

⁵ Qama'le naa'me naajo' jo'ne qo'yaneque nalo'taguet doce mil jena'me mach'e lec'oqo'tepi joñe'me Judá, nach'e ena'am ñe'me Rubén nalo'taguet doce mil jena'me mach'e lec'oqo'tepi, choqoñe'me Gad doce mil jena'me mach'e lec'oqo'tepi,

⁶ qama'le nach'e ena'am ñe'me Aser doce mil jena'me mach'e lec'oqo'tepi, nataq'aen ñe'me Neftalí jena'me mach'e lec'oqo'tepi nalo'taguet doce mil, choqoñe'me Manasés doce mil jena'me mach'e lec'oqo'tepi,

⁷ ñe'me Simeón jena'me mach'e lec'oqo'tepi nach'e ena'am doce mil, nataq'aen joñe'me Leví doce mil jena'me mach'e lec'oqo'tepi, nataq'aen ñe'me Isacar doce mil jena'me mach'e lec'oqo'tepi,

⁸ nataq'aen ñe'me Zabulón doce mil jena'me mach'e lec'oqo'tepi, nach'e ena'am ñe'me José doce mil jena'me mach'e lec'oqo'tepi, qama'le nach'e ena'am ñe'me Benjamín doce mil jena'me mach'e lec'oqo'tepi.

Ga'me Dios lec'oqo'tepi jo'ne pagaĝayaqa naa'me louo

⁹ Mane'e ca'li yem da'me dojo' qama'le jauana ga'me jiyaĝadipi let'adaic jo'ne qaya'te yaqanatet ta'le noloqoten, jo'ne qoyachiyoĝotauelo yemeda jogaa'me noyaqa let'adayaqa nataq'aen yodapecache da'me neqomyaĝa'j nataq'aen yodapecache naa'me 'loyaĝaco naa'me 'laqataqa. Qama'le jauanalo da'me nechatetedañe ena'uac da'me dajotauo jaga'me je'onaĝaiqui jo'ne nejaliaĝaiqui, qama'le nach'e ena'ama dajoteda'aguet joñe'me 'Naĝanaĝate Lec'oĝot. Qama'le uo'oe naa'me louo jo'ne pagaĝayaqa nataq'aen da'me yachi'y jaa'me chaic layoqote, onolqa'tape jogaa'me jiyaĝa'u da'me lajoqot'alo.

¹⁰ Qama'le ena'uac da'me nete'tape da'me 'yalaqataye, eet'oi: “¡Da'me nec'alaĝa chiyaqayi ñe'me Qanedios, Jo'ne nach'eñe 'me netañgui na'me nejaliaĝaiqui, Choqoda'me chiyaqayi ñe'me 'Naĝanaĝate Lec'oĝot!”

¹¹ Qama'le ena'uac joga'me piyem laje'pi da'me equejop jaga'me je'onaĝaiqui choqogaa'me cuatro yejidi nataq'aen jogaa'me 'yaĝaicachidi; naĝadi'ñejop jaga'me je'onaĝaiqui da'me dajoyida'uo chayovida'a da'me e'n toĝoyeta q'ae'n naa'me nepel jena'me aleua, qama'le yo'o'n da'me 'nonaĝachidegue joñe'me Dios,

¹² eet'oi: “¡Nach'e naq'aeta da'me dojo'! ¡Nach'eñe joñe'me Qadet'a Dios Jo'ne nach'e eta't da'me 'ñonaĝataĝaye, Yemeda naa'me 'uoidi da'me ja pal, Jouaĝat da'me 'uo da'me 'lonaĝac let'adaic, Choqoda'me layatenaĝanaĝac! Qama'le janemaĝam da'me qadamaic nataq'aen da'me 'ñonaĝataĝaye, Qa'a nach'e ena'am qaya'te yaqalaatac, Jouaĝat da'me mach'e loĝot da'me lañoqotaĝanaĝac let'adaic, Joñe'me jo'ne nach'e eta't 'uo.”

¹³ Qama'le 'uo ga'me onolec jogaa'me 'yaĝaicachidipi jo'ne jayem yenat: “¿Jach'e naa'me naajo' jiyaĝadipi jo'ne pagaĝayaqa naa'me louo, nataq'aen da'me jach'e jogamaĝa chiyoĝotegue?”

¹⁴ Qama'le ja'ateguet: “Negue't. Naqa'am jo'ne auayaten, am jaliaĝanec.” Qama'le jayem 'yaĝatem: “Naa'me naajo' jo'ne nach'enaua 'me chiyoqodaue da'me lachoĝode'j let'adaic, nach'enaua jo'ne joote yiyo'y naa'me louo, yataqata yapaga't q'ae'n, yajouaĝat da'me yiyoĝotec jaga'me letauo' joñe'me 'Naĝanaĝate Lec'oĝot.

¹⁵ Chane'eja nayi male dajotedo'ot jañe'me neje'onaĝaiqui joñe'me Dios queda'me t'onataĝa'tape, t'onataĝadoue joga'me jo'ne mach'e netamenaĝaiqui. Qama'le joñe'me jo'ne netañgui jañe'me je'onaĝaiqui male nach'e eta't da'me uetauelo qaedi de'uolo'te.

¹⁶ Qama'le da'me noqouaĝa ja yitaĝa ta'le 'uo da'me en lachoĝode'j, uotaĝa da'me noĝop lamaic, nach'e ena'am da'me ja yitaĝa yaqanatet ta'le yaviyaĝa't jañe'me ajeua, nataq'aen jena'me nepi'yaĝa ja yitaĝa ta'le yeloiquiaĝa'tape,

¹⁷ qa'a joñe'me 'Naĝanaĝate Lec'oĝot jo'ne dajotalegue jaga'me je'onaĝaiqui jo'ne nejaliaĝaiqui, nach'eñe jo'ne nouatoqo't ena'uaque jogaa'me, qama'le yauetegue joga'me noĝop jo'ne yayetaye 'me chiyaqayi da'me nec'alaĝa. Nataq'aen joñe'me Dios male yiyo'y naa'me 'lae'te da'me niyojeguem yema jana'me lachi'.”