Apocalipsis 5 - Nuevo Testamento Toba Sombrero Negro

Joñe'me 'Naĝanaĝate Lec'oĝot yacona jaga'me nede

¹ Ga'me louaq jo'ne yayaten joñe'me jo'ne netañgui jañe'me je'onaĝaiqui, jauana ga'me nenañejec jo'ne uedaye naa'me nedii's nach'e ena'am ga'me p'aye, nataq'aen da'me siete qoyetouoĝolegue jaga'me 'nanaĝanaqate.

² Nataq'aen jauana jo'me piyem le'ec 'me 'uo da'me 'lañaĝac qama'le yataqata netenec da'me 'laqatac da'me denataĝan: “¿Jach'e jogamaĝa qoyaje'tem da'me naqa't gaa'me 'nanaĝanaqate lidi'ñe qaedi 'youachigui ga'me nenañejec?”

³ Qalaĝaja jogaa'me ueteda'ague di'me piyem nataq'aen gaa'me uetedalegue jena'me aleua choqogaa'me uetedo'ot di'me p'añe jenjo' aleua, qaya'te 'uo ga'me onolec jo'ne yaqanatet da'me 'youachigui ga'me nenañejec qaedi qoyec'aten.

⁴ Chane'eja da'me jayem jalcote da'me ñoyenaĝac, qa'a yajouaĝat da'me ja qoyauana ga'me onolec jo'ne yeloteguet qoyen da'me 'youachigui ga'me nenañejec qaedi qoyec'aten.

⁵ Qalaĝaja 'uo ga'me onolec jogaa'me 'yaĝaicachidi 'me jayem dojapegue', enaac: “Ena'te yitaĝa anoyetac, qa'a ñe'me Jauaĝaic jo'ne chiyaqaue gaa'me lec'oqo'tepi ñe'me Judá, joñe'me jo'ne lolelaĝaic ñe'me David, nach'eñe jo'ne domataĝan qama'le yeloteguet qoyen da'me naqa't gaa'me siete 'nanaĝanaqate lidi'ñe qaedi 'youachigui ga'me nenañejec.”

⁶ Chane'eja 'uo jo'me jauana jo'ne dajotalegue jo'me nejaliaĝaiqui jo'ne je'onaĝaiqui chaqaja'me cuatro yejidi, da'me uetañgui laeñi jaa'me 'yaĝaicachidi: nach'ejo jo'ne 'Naĝanaĝate Lec'oĝot da'me nechatetañe, qalaĝaja di'yoq da'me naqaeñe ñe'me jo'ne joote qoyalat; uo'oe gaa'me siete jo'ne lepeel, nataq'aen jogaa'me 'lae'te jo'ne siete. Gaa'me 'lae'te naqaegaua gaa'me siete lepaqa'li joñe'me Dios jo'ne qonamaĝata yema jena'me aleua.

⁷ Qama'le joñe'me 'Naĝanaĝate Lec'oĝot yec'ata qama'le yacona ga'me nenañejec, ga'me jo'ne ua'ague joga'me louaq jo'ne yayaten ñe'me jo'ne netañgui jañe'me je'onaĝaiqui.

⁸ Mane'e da'me yacona ga'me nenañejec, qama'le jogaa'me cuatro yejidi nataq'aen jogaa'me veinticuatro 'yaĝaicachidi male yejoidiñe naa'me leliquetel da'me dajoyeda'aguet joñe'me 'Naĝanaĝate Lec'oĝot. Yemeda jogaa'me da'me uo'oe gaa'me liviquil nataq'aen da'me yachi'tape jogaa'me yomaĝaiqui' jo'ne oro, jo'ne najaqachiguilo jena'me lavionaĝa. Nach'ena na'me lavionaĝa 'me netamenaĝaco ga'me lec'oqo'tepi joñe'me Dios.

⁹ Qama'le 'yotedac jenjo' nalac jo'ne dalaĝaic: “Naqa'am jo'ne aueloteguet qoyen Da'me auacona ga'me nenañejec Qaedi anaqa't jogaa'me 'nanaĝanaqatel, Qa'a naqa'am jo'ne am qoyalat joca'li Qama'le naliñi jana'me adetauo' Da'me aue'n nejetenatac ñe'me Dios Joga'me jiyaĝadipi jo'ne yodapecache naa'me 'loyaĝaco naa'me 'laqataqa, Ena'uac da'me neqomyaĝac Nataq'aen ena'uaque gaa'me noyaqa.

¹⁰ Qama'le aue'n lec'oqo'tepi joñe'me Qanedios jogaa'me, Nataq'aen da'me aue'n letaĝayaĝanaĝanaqa ga'me jiyaĝadipi Da'me dajotedalegue joñe'me Qanedios, Qama'le nejaliaĝatedelegue jena'me aleua.”

¹¹ Mane'e da'me yitaĝa jec'aten, qama'le jomachiya da'me lajamaĝa ga'me piyem laje'pi jo'ne yataqata jalcote, naqaegaua jo'ne equejop jaga'me je'onaĝaiqui choqogaa'me yejidi nataq'aen jogaa'me 'yaĝaicachidi,

¹² qama'le nete'tape da'me yo'o'n da'me dojo': “¡Joñe'me 'Naĝanaĝate Lec'oĝot jo'ne qoyalat Nach'eñe jo'ne tachigui da'me yataqata qo'nonaĝachigui Jouaĝat da'me 'uo da'me lañoqotaĝanaĝac let'adaic Choqoda'me neuoyaĝac choqoda'me nayatenaĝanaĝac Choqoda'me qaya'te yaqalaatac choqoda'me 'lonaĝac! ¡'Noota qom jalcote da'me qo'nonaĝachigui joñe'me!”

¹³ Qama'le nach'e ena'am jomachilegue da'me ena'uac jogaa'me uo'oe jo'ne ueteda'ague jodi'me piyem nataq'aen jogaa'me uetedalegue jena'me aleua, qama'le nach'e ena'am jogaa'me uetedaue di'me p'añe jenjo' aleua nataq'aen jogaa'me uetañguilo gaa'me qa'mi lat'edail, naq'aeta da'me 'yotedac: “¡'Noota qom qo'nonaĝachigui joñe'me jo'ne netañgui jañe'me je'onaĝaiqui Choqoñe'me 'Naĝanaĝate Lec'oĝot, Jouaĝat da'me 'uo da'me li'yoĝodenataĝanaĝa'j nataq'aen da'me 'lonaĝac Choqoda'me lañoqotaĝanaĝac let'adaic!”

¹⁴ Chane'eja jogaa'me cuatro yejidi male 'yadeteguet: “¡Nach'e naq'aeta da'me dojo'!” Qama'le jogaa'me veinticuatro 'yaĝaicachidi male yejoidiñe naa'me leliquetel da'me 'nonaĝachidegue joñe'me jo'ne netañgui jañe'me je'onaĝaiqui choqoñe'me 'Naĝanaĝate Lec'oĝot.