Apocalipsis 4 - Nuevo Testamento Toba Sombrero Negro

Qoyauana di'me lejaliaqa' joñe'me Dios

¹ Mane'e ca'li yem da'me dojo', qama'le jauana ga'me jom jo'ne 'nouatetaye da'me jeloje'ma di'me piyem, qama'le yitaĝa jomachiya ga'me najamaĝa jo'ne 'uaeñe da'me jomachiya ca'li, nataq'aen da'me ena'am jaga'me najeede qom qoyajediye, qama'le jayem dojapegue', enaac: “Auenidije'ma jena'me jenjo' qama'le am jaloĝonalo jogaa'me uo'oe qom'che jo'ne di'yo't qom yenoĝodegue naa'me naajo' jo'ne uo'oe nayi.”

² Qanach'e ua'a da'me jayem ua'ajop da'me lañoqotaĝanaĝac ñe'me Dios Lepaqal, qama'le jauana di'me nejaliaqa' jo'ne na'ague di'me piyem, nataq'aen da'me 'uo ñe'me jo'ne ñichiñe netaue ñe'me nejaliaĝaiqui.

³ Joñe'me jo'ne ñichiñe netaue ñe'me nejaliaĝaiqui 'uo da'me 'loyaĝac ena'am ga'me diamante uotaĝa ena'am ga'me qa' laqaya lenaĝat rubí da'me yataqata yaqaselec, qama'le ga'me equejop jaga'me neje'onaĝaiqui jo'ne lejaliaĝaiqui 'uo ga'me uosac jo'ne yaqaselec, ena'am ga'me qa' jo'ne lenaĝat esmeralda.

⁴ Nach'e ena'am ga'me jo'ne equejop jaga'me neje'onaĝaiqui jo'ne lejaliaĝaiqui jauanalo gaa'me laqaya' jo'ne veinticuatro nejaliaĝaiqui' 'me je'onaĝaiqui', nach'egaua jo'ne netañelo jogaa'me veinticuatro 'yaĝaicachidi: yatedañe gaa'me louo jo'ne pagaĝayaqa choqogaa'me yanetayelo naa'me laqai'go gaa'me noqop'al jo'ne oro.

⁵ Jaga'me nejaliaĝaiqui chiyaqapiñegui jena'me lauaq jo'ne yaqaselec, choqona'me nejamaĝa nataq'aen na'me 'loĝoyaĝac, nataq'aen ga'me dajoya'ña jaga'me neje'onaĝaiqui edetañguilo gaa'me siete coyadaĝanaqate' jo'ne dole', nach'egaua jo'ne siete lepaqa'li joñe'me Dios.

⁶ Nataq'aen ga'me dajoya'ya jaga'me je'onaĝaiqui nach'e ena'am 'uo ga'me jo'ne ena'am ta'le qa'em lat'edai, jo'ne yaqa'ñe ena'am jaga'me cristal da'me chichiñe. Qama'le di'me laeñi jo'ne neta'ña jaga'me je'onaĝaiqui, ga'me jo'ne mach'e equejopa naa'me lael, uo'oe gaa'me cuatro yejidi polio' jo'ne najaqatelegue jaa'me 'lae'tepi ga'me dajoya'ague choqoga'me netauaqague.

⁷ Jaa'me jaajo' yejidi polio' 'uo jo'me onolec jo'ne ena'am ta'le jauaĝaic da'me 'loyaĝac, qama'le jo'me dajoyalegue ena'am ta'le uaca c'oĝot, qama'le jo'me p'ayalegue 'uo da'me 'loyaĝac na'me latajoĝoc jo'ne ena'am ta'le jiyaĝaua, nataq'aen jo'me p'ategue ena'am ga'me uole qom uayotac.

⁸ Onolqa'tape jogaa'me yejidipi uo'oe gaa'me laua' jo'ne seis, 'me yapadichiñe jana'me 'lae'tepi jo'me p'aye jaa'me laua' choqojo'me p'auo. Nataq'aen da'me yema ga'me nolo' choqoga'me pi'yaq da'me ja yaĝadiñi da'me 'yotedac: “¡Yataqata ja 'nalegue joñe'me, Naqaeñe joñe'me Jaliaĝanec Dios jo'ne qaya'te yacalaatac, Joñe'me jo'ne jalchi'ena 'uo nataq'aen nach'e eta't da'me qo'mi ue'tajopa!”

⁹ Chane'eja nale jogaa'me yejidi 'nonaĝachidegue joñe'me jo'ne ñichiñe netañgui jaga'me je'onaĝaiqui, nach'eñe ñe'me jo'ne nach'e eta't da'me nec'aletaye, nataq'aen da'me yatem da'me lamai'j,

¹⁰ qama'le jogaa'me veinticuatro 'yaĝaicachidi yejoidiñe naa'me leliquetel da'me dajoyeda'aguet joñe'me qama'le yatem da'me loqopich'i nataq'aen da'me yajaĝadi'ña jogaa'me noqop'al joga'me dajoya'ña jaga'me neje'onaĝaiqui qama'le yo'o'n:

¹¹ “Am Qadejaliaĝanec nataq'aen da'me mach'e am Qanedios, Naqa'am jo'ne am tachigui da'me yataqata am qo'nonaĝachigui, Jouaĝat da'me 'uo da'me at'onaĝac nataq'aen da'me adañoqotaĝanaĝac let'adaic, Qa'a naqa'am jo'ne aue't yema naa'me naajo' uo'oe; Qa'a naq'aeta da'me mach'e adelnataĝac ca'li, Qama'le uo'oe nayi da'me male aue'n di'yo'quena.”