Apocalipsis 20 - Nuevo Testamento Toba Sombrero Negro

Male qonomat joñe'me payac

¹ Ca'li yem da'me dojo' qama'le yitaĝa jauana jo'me piyem le'ec jo'ne nenochiñe, chiyaqaje'ma di'me piyem, lajoqot'a jaga'me lo'o ga'me najom jaga'me limaĝañi lat'edai jo'ne necoñetaĝanaĝaiqui' jogaa'me nepaqa'li jo'ne ja 'noe'n, qama'le nach'e ena'am da'me lajoqot'a jo'me cadeena let'adaic.

² Jo'me piyem le'ec naviiñe ñe'me ñaĝadiaq polio', nach'eñe ñe'me nanaic jo'ne 'uaechiñe joca'li, joñe'me jo'ne lenaĝat qoyen da'me payac, nataq'aen da'me lenaĝat laqaya qoyen jo'ne Satanás, qama'le jo'me piyem le'ec yecoñe' joñe'me chayovida'a qom nalo'taguet mil na'me 'uoidi da'me en netaye lequet.

³ Choqoda'me yajaĝañgui jaga'me limaĝañi lat'edai, qama'le yapadene'uo nataq'aen ya'uo jaga'me 'nanaĝanaqate jo'ne yetouoĝolegue ga'me najom lapadenaĝat, qaedi ja yitaĝa ta'le yoqovi'n joga'me jiyaĝadipi jo'ne uetedalegue jena'me aleua, chayovida'a qom yenoĝodegue joga'me mil 'uoidi. Qomle male yenoĝodegue naa'me naajo' 'uoidi, qama'le cada'ac da'me yitaĝa qoyejoye.

⁴ Ca'li yem qama'le yitaĝa jauanalo jogaa'me jiyaĝa'u laqaya' jo'ne netauelo gaa'me nejaliaĝaiqui', qa'a joote yacoteguet da'me lañoqotaĝanaĝa'j qaedi male dec'atenaĝa'n nataq'aen da'me daloqotenaĝa'n. Jogaa'me jiyaĝa'u jo'ne jauanalo nach'ediaua dia'me jo'ne joote yele'u da'me qoyichaĝadegue naa'me laqai'go, yajouaĝat da'me 'yaĝatetedac joca'li joñe'me Jesús, nataq'aen da'me dapaĝaguenataĝatedapec da'me 'laqatac joñe'me Dios. Jodia'me ja jetaque netametot ca'li ñe'me jiyac polio' choqoga'me mach'e lequi'i, qama'le nach'e ena'am da'me ja naje'teguet ta'le qoyanayelo naa'me laqai'go jaga'me 'nanaĝanaqate, uotaĝa ta'le qoyanayelo naa'me loua'. Qama'le jauanalo da'me yitaĝa nec'aledegue jogaa'me, qama'le ueteda'ajop joñe'me Cristo da'me qoyanema da'me lejaliaĝa'j chayovida'a qom yenoĝodegue ga'me mil 'uoidi.

⁵ Qama'le nach'ena 'me 'uaechiñe da'me uo'oe jogaa'me jo'ne qo'niyelaĝachidijeguem. Qalaĝaja jodia'me napa'l laqaya' ja yitaĝa ta'le nec'aledijeguem chayovida'a qom yenoĝodegue jogaa'me mil 'uoidi.

⁶ Chane'eja ¡made'tapolqa nayi jogaa'me jo'ne uetedaue da'me dojo' 'me 'uaechiñe da'me yitaĝa qo'niyelaĝachidijeguem, qa'a nach'egaua jo'ne joote loqo'te ga'me noic 'me ja 'nalegue! Ga'me neleuaĝa jo'ne p'ategue qaya'te 'uo ga'me ee'teque jogaa'me, qa'a naqaegaua mach'e letaĝayaĝanaĝanaqa joñe'me Dios nataq'aen ñe'me Cristo, qama'le ueteda'ajop joñe'me da'me 'uo da'me lejaliaĝa'j chayovida'a qom yenoĝodegue joga'me mil 'uoidi.

⁷ Mane'e qomle yenoĝodegue joga'me mil 'uoidi, qama'le ñe'me Satanás male yitaĝa qoyachiyoĝotaue da'me necoñetaĝanaĝaiqui da'me male yitaĝa qoyejoye,

⁸ qama'le nenoĝojeguem qaedi yitaĝa yoqovi'n joga'me jiyaĝadipi jo'ne uetedalegue jena'me aleua, chayovida'a naa'me lael jo'ne cuatro, ga'me jiyaĝadipi let'adaic jo'ne lenaĝat da'me Gog nataq'aen joga'me Magog. Qama'le yemata'a't ena'uac qaedi yauote ga'me nalada't. Yataqachiñe jalcote joga'me jiyaĝadipi, ena'am jena'me pogaĝanaĝa 'me ueta'ña na'me loogue jana'me qa'em lat'edai.

⁹ Qama'le jena'me jiyaĝadipi e'n nalalegue yema jena'me aleua, qama'le quedajop joga'me lomachaqa't ga'me Dios lec'oqo'tepi, nach'ega ga'me noic jo'ne loqopitaĝat joñe'me. Qalaĝaja male ua'a da'me 'naqañe jo'me dole' jo'ne chiyoĝogue di'me piyem, qama'le yaviyaĝat ena'uac.

¹⁰ Yem da'me dojo' qama'le joñe'me payac jo'ne yoqovi'n ena'uac joga'me jiyaĝadipi male nach'e ena'am da'me qoyajaĝañgui jaga'me limaĝañi jo'ne uetañgui joga'me dole' let'adaic, di'me jo'ne nach'e ena'am ua'ña da'me qoyajaĝa'ña joca'li joñe'me jiyac polio' choqoñe'me jiyaĝaua jo'ne ja eja da'me lapaĝaguenataĝanaĝac. Qama'le ua'ña da'me 'uo da'me lachoĝode'j yemeda naa'me pi'yaĝadi choqonaa'me noloqo'ote, qaya'te loiquiaqa'.

Male qonaloqote'n qomle jena'me jiyaĝadipi ga'me nolo' jo'ne p'ategue

¹¹ Nataq'aen jauana jaga'me je'onaĝaiqui lat'edai jo'ne pagaĝai choqoñe'me jo'ne netañgui. Mane'e ca'li naloĝola't joñe'me, qama'le jena'me aleua choqodi'me piyem male nelagaĝa'tape, qama'le nalo'ta't da'me yapalaĝat, ja yitaĝa ta'le qoyauanalo.

¹² Qama'le nach'e ena'am jauanalo dia'me napa'lpi jo'ne 'yaĝaiquipi nataq'aen dia'me jo'ne ja 'yaĝaiquipi, da'me nechatetedañe, dajotedo'ot joñe'me Dios. Ua'a qanach'e qo'youachiguilo jogaa'me nedel, chaqaga'me nede laqaya jo'ne nach'ega 'me nedaĝalate jena'me qonec'alaĝatedegue. Chane'eja dia'me napa'lpi male qonaloqote'n: male qoyec'ate'n naa'me joote qoyedidiñe jo'ne uetedalegue jogaa'me nedel jo'ne chiyaqayilo jogaa'me mach'e 'lonataqa, da'me qaedi qoyejete'n.

¹³ Qama'le jaga'me qa'em lat'edai nach'e ena'am da'me yaneua'alo joga'me mach'e uetedañgui jo'ne napa'lpi, choqoñe'me lejaliaĝanec da'me neleuaĝa nataq'aen jañe'me necoñetaĝanaĝaiqui' ga'me napa'lpi nach'e ena'ama yaneua'alo gaa'me jo'ne uetedaue, qama'le nalo'ta't qoyen yema da'me 'uo da'me nec'atenague'j, onolqa'tape naa'me jo'ne mach'e chiyaqayilo jogaa'me mach'e 'lonataqa.

¹⁴ Yem da'me dojo', qama'le joñe'me lejaliaĝanec da'me neleuaĝa chaqañe'me necoñetaĝanaĝaiqui' ga'me napa'lpi male nach'e ena'ama da'me qoyajaĝadiñgui jaga'me limaĝañi jo'ne uetañgui ga'me dole' let'adaic, jo'ne nach'ega 'me neleuaĝa jo'ne p'ategue.

¹⁵ Chane'eja dia'me napa'lpi nach'e ena'am da'me qoyajaĝadiñgui ga'me dole', ena'uaque dia'me jo'ne qaya'te lenaĝa't ta'le uedalegue da'me qoyedidiñe jaga'me nede jo'ne nedaĝalate jena'me qonec'alaĝatedegue.