Apocalipsis 19 - Nuevo Testamento Toba Sombrero Negro

Lajamaĝa ga'me jiyaĝadipi da'me chimaqapije'ma di'me piyem

¹ Mane'e ca'li yem da'me dojo', qama'le jomachiya da'me lajamaĝa ga'me jiyaĝadipi let'adaic jo'ne yejam da'me chimaqapije'ma di'me piyem, enaac: “¡A'nonaĝachiyegui ñe'me Jaliaĝanec! ¡Nach'eñe ñe'me Qanedios mach'e Qadec'alaĝaiqui! Yataqata 'uo da'me 'lonaĝa choqoda'me lañoqotaĝanaĝac let'adaic,

² 'Uo da'me chiyaqayi da'me lec'atenaĝanaĝac joñe'me Jo'ne chimaqachiñe, nataq'aen da'me chiyaqayi da'me eja; Qa'a nach'eñe jo'ne ya'uo da'me ne'uaĝanaguec Jañe'me quejeguetaĝai lat'edai, Yajouaĝat da'me lequejeguetaĝa jo'ne 'naĝa't ena'uaque Joga'me jiyaĝadipi jo'ne neteda'ña jena'me aleua. Chane'eja 'yiyelaĝatec jañe'me yauo da'me leleuaqa' jodia'me mach'e lalemaĝaje'te.”

³ Yem da'me dojo' qama'le joga'me jiyaĝadipi jo'ne yauata da'me ne'uaĝanaguec jadi'me yauo male yitaĝa 'nonaĝachidegue joñe'me Dios, enaac: “¡A'nonaĝachiyegui ñe'me Jaliaĝanec! Qa'a jana'me nemala' da'me yavigoue jadi'me yauo Nach'e eta't da'me dichitaue, ja yitaĝa ta'le 'nemaĝañe.”

⁴ Qama'le joga'me veinticuatro 'yaĝaicachidi nataq'aen jogaa'me cuatro yejidi jo'ne nec'aletedaye, naqapaĝateguet jena'me aleua, da'me 'nonaĝachigui joñe'me Dios jo'ne neta'ña di'me lejaliaqa', qama'le enapega't: “¡Jaja'a, nach'e naq'aeta! ¡yataqata am qa'nonaĝachigui nayi!”

⁵ Qama'le 'uo ga'me 'naqatac jo'ne jomachiya, 'me chiyoqochiñe di'me lejaliaqa' joñe'me jo'ne eetac: “¡Yataqata a'nonaĝachiyegui joñe'me mach'e Qanedios, Ena'uaque da'me ami jo'ne ami 'yaĝayaqa Choqoda'me ami jo'ne ja ami 'te 'yaĝayaqa, Da'me ami jo'ne ademiya'a da'me a'uonataĝañi'uo joñe'me, Da'me ami jo'ne yataqata auep'iiya'a joñe'me!”

⁶ Nataq'aen 'uo da'me jo'ne nach'e ena'am jomachiya jo'ne ena'am ta'le lajamaĝa joga'me jiyaĝadipi let'adaic, nataq'aen da'me ena'am ta'le noĝop ladic jo'ne nayenegue, uotaĝa da'me 'loĝoyaĝac jo'ne let'adaic da'me lajamaĝa, jo'ne eetac: “¡A'nonaĝachiyegui ñe'me Jaliaĝanec! Qa'a yovita da'me male nejaliaĝatelegue yema, Joñe'me mach'e Qanedios jo'ne qaya'te yaqalaatac.

⁷ Nayi qo'mi made'tapolqa, Da'me e'n qo'mi najaqachiguilo da'me qadamaic Nataq'aen da'me 'ñonaĝataĝaye joñe'me, Qa'a nayi male yovita da'me 'lonáĝac joñe'me 'Naĝanaĝate Lec'oĝot, Qa'a joote niyamaĝateta't jañe'me jo'ne jetaque qoyen loua.

⁸ Chane'eja nayi qoyaje'tema da'me yaidiñe jogaa'me louo Jo'ne 'loyaĝa'j da'me ualoq jo'ne yataqata yapagaq nataq'aen da'me yaqaselec.” Qa'a nach'enaua naa'me nouo jo'ne yelo'teguet da'me chimaqachiñe jo'ne 'lonataqa joga'me jiyaĝadipi jo'ne ja 'nalo'te.

⁹ Qama'le jayem dojapegue' joñe'me piyem le'ec, enaac: “Nayi auediñe da'me dojo': «Made'tapolqa jogaa'me jo'ne joote qoyayatenaĝanaĝaneque ga'me neualaĝayaĝaiqui jo'ne 'lonaĝaiqui joñe'me 'Naĝanaĝate Lec'oĝot.»” Yem qama'le yitaĝa jayem noqoteteneque: “Naa'me naajo' 'naqataqa jo'ne yataqachiñe ejoda daa'me 'laqataqa joñe'me Dios.”

¹⁰ Chane'eja te'me jejoidiñe naa'me yeliquetel, jejocoto naa'me lapia'te joñe'me piyem le'ec queda'me te'me 'ñonaĝachigui, qalaĝaja jayem uaqata: “Ena'te aua'uo da'me dojo', qa'a naqayem jo'ne ch'e jayem Dios lalemaĝajet, qama'le nach'e am jena'am, choqogaa'me adaqaya'olqa jo'ne nach'e eta't da'me 'yamaqate'n naa'me 'laqataqa joñe'me Jesús. Nach'eñeta ñe'me Dios jo'ne a'nonaĝachigui.” Qa'a naa'me 'laqataqa joñe'me Jesús, nach'enaua jo'ne 'yañaqate't joñaa'me Dios 'laqataĝanaĝanaqa.

Joñe'me pegaq ladipa jo'ne mataĝanaĝaic

¹¹ Qama'le jauana di'me piyem da'me 'nouategue, qama'le 'uo jo'me pegaq jo'ne pagaĝaic, qama'le jauana jo'me netalegue 'me ladipa jo'ne lenaĝat da'me “Ja 'nalegue jo'ne ejoda naa'me 'laqataqa”, qa'a yachiyaqayi da'me chimaqachiñe da'me ya'uo da'me lec'atenaĝanaĝac nataq'aen da'me ya'uo ga'me nalada't.

¹² Qama'le naa'me 'lae'te yataqata edañguilo, ena'am ta'le dole' lauaq, nataq'aen jena'me laqaic uo'oe jogaa'me qayoĝode' qop'al jo'ne netayelo, nataq'aen 'uo ga'me nediijec 'me uetalegue jo'ne mach'e lenaĝat jo'ne yataqata ja qoyayaten, nach'eñeta joñe'me mach'e yayaten joga'me.

¹³ Naa'me louo jo'ne yatedañe joote necouayelo jana'me netauo', qama'le da'me lenaĝat joñe'me eet'oi: “Jona'me 'Laqatac joñe'me Dios.”

¹⁴ Quetedapegue' ena'uaque jogaa'me mach'e nejoĝonaqapi, jo'ne yatedañe naa'me louo jo'ne onaĝayaqa da'me 'loyaĝa'j, yoqovite' choqoda'me pagaĝayaqa, qama'le nach'e ena'ama netalo'te jogaa'me pega' jo'ne pagaĝayaqa.

¹⁵ Qama'le jena'me nedegaĝat joñe'me chiyaqaue ga'me nedaĝanaĝat jo'ne neuoyejec, qaedi nach'ega jo'ne yejogueque ena'uaque ga'me jiyaĝadipi jo'ne uetedalegue jena'me aleua, nataq'aen lajoqot'a ga'me naje'l jo'ne laicaua da'me male nejaliaĝatelo'te jogaa'me. Chane'eja ya'uo ga'me ne'uaĝanague'j jogaa'me, ena'am da'me qoyen yolaĝachiguilo jogaa'me uva jala, qaedi qoyachiyoĝotaye ga'me lataĝa, qama'le nach'ega jo'ne yelo'teguet da'me lalemataic joñe'me Dios 'me qaya'te yaqalaatac, jo'ne 'uo da'me lichic.

¹⁶ Jojo'me lapoto en uetalegue nataq'aen jena'me loteta jo'ne 'uo ga'me nediijec 'me ualegue 'me lenaĝat laqaya jo'ne eetac: “Lejaliaĝane'j ena'uaque gaa'me nejaliaĝanaqa nataq'aen yataqata yaguegue da'me lañoqotaĝanaĝac.”

¹⁷ Nataq'aen jauana jo'me piyem le'ec jo'ne nechatetot jañe'me ajeua, da'me yataqata 'nañaĝatelegue da'me liyaĝanaĝac queda'me yiyaĝalegue ena'uac jogaa'me mayodipi 'me uayodelegue di'me laeñi di'me piyem, enaac: “¡Auanaeyiquena qa'a 'uo da'me liqui'yaĝanataĝanaĝac let'adaic joñe'me Dios!

¹⁸ Qama'le aualiqui jena'me lapa't dia'me jaliaĝanaqa, dia'me coico lejaliaĝanaqa nataq'aen dia'me jiyaĝa'u jo'ne 'uañaĝayaqa, nataq'aen jena'me pegaĝa lapat choqona'me lapa't jodia'me jiyaĝa'u jo'ne ladi'p, yema jena'me lapa't dia'me jo'ne ja namaĝa's choqodia'me nelataqa, dia'me jo'ne ja 'yaĝayaqa nach'e ena'ama jodia'me 'yaĝayaqa.”

¹⁹ Yem qama'le jauana ñe'me jiyac polio' nataq'aen ñaa'me nejaliaĝanaqa jo'ne uetedalegue jena'me aleua choqogaa'me jo'ne mach'e necoicopi 'me nejoĝonaqapi, nach'egaua jo'ne dajo'ta't qaedi male deloi'te' joñe'me netalegue joñe'me pegaq pagaĝaic chayovida'alo gaa'me mach'e nejoĝonaqa joñe'me.

²⁰ Qama'le ñe'me jiyac polio' male paja'a da'me qoyecoñe' choqoñe'me jo'ne ja eja da'me lapaĝaguenataĝanaĝac, ñe'me jo'ne nach'eñe 'me yachiyoĝotayi da'me yauo'oe naa'me 'nanaqa jo'ne chiyaqayi q'aen da'me uo'oe gaa'me yoqovi'n jo'ne yaje'tema da'me yanayelo joga'me mach'e lenaĝat ñe'me jiyac polio', chayovida'a da'me qoyi'yoĝode'n ca'li joga'me jiyac polio' lequi'i. Qama'le ñe'me jiyac polio' choqoñe'me jo'ne ja eja da'me lapaĝaguenataĝanaĝac male qoyajaĝadiñgui jaga'me limaĝañi jo'ne uetañgui ga'me dole' let'adaic.

²¹ Qama'le ena'uaque jodia'me laqaya' da'me nach'e ena'ama da'me yele'u, da'me qoyalateque joga'me nedaĝanaĝat jo'ne chiyaqaue ga'me nedegaĝat joñe'me jo'ne netalegue ñe'me pegaq, qama'le yema jena'me mayodipi yaliquitedac jena'me lapa't jodia'me jiyaĝa'u jo'ne nalataqa.