Apocalipsis 17 - Nuevo Testamento Toba Sombrero Negro

Da'me ne'uaĝanaguec jañe'me yauo jo'ne quejeguetaĝai

¹ Qama'le 'uo ñe'me piyem le'ec jo'ne uetauelo ca'li jaa'me siete piyem laje' 'me lajoqot'alo jogaa'me siete yomaĝaiqui', nach'eñe jo'ne jayem nec'ata, qama'le enaac: “Nayi auanaequena qaedi am jaloĝona da'me ne'uaĝanaguec jañe'me yauo jo'ne quejeguetaĝai, jañe'me jo'ne netalegue jena'me noĝop.

² Qama'le jañe'me yauo yamaĝadoue gaa'me nejaliaĝanaqa jo'ne yelodelegue jena'me aleua da'me nequejeguetaĝa. Chane'eja joga'me jiyaĝadipi jo'ne netedalegue jena'me aleua nach'e ena'am e'n taĝaiquipi da'me nequejeguetaĝa, ena'am da'me uotaĝa qoniyomaĝañi ga'me lataĝa.”

³ Chane'eja 'uo da'me yem da'me jo'ne jayem yec'atenaĝanaĝanec ñe'me Dios Lepaqal, da'me jayem qoyauegue di'me aleua jo'ne totapega't. Qama'le jauana jañe'me yauo jo'ne netalegue ñe'me jiyac polio' jo'ne tomaĝadaic da'me 'loyaĝac, ñe'me jo'ne uetedalegue yema jena'me lo'oc naa'me nenaqa'te jo'ne ye'uetedac joñe'me Dios, ñe'me jiyac jo'ne siete naa'me laqai'go choqonaa'me lepeel nach'e ena'am da'me diez.

⁴ Jañe'me yauo yatedañe ca'li jogaa'me 'netaqa'te jo'ne 'uo ga'me malaĝadaic da'me 'loyaĝa'j choqoga'me tomaĝadaic. Nataq'aen uo'oe jogaa'me li'yodaqa'te laqaya' jo'ne oro choqogaa'me qadi jo'ne onaĝayaqa choqogaa'me perlas. Nataq'aen lajoqot'a jaga'me yomaĝaiqui jo'ne oro 'me jaqachigui q'aen da'me ja no'en jo'ne ye'et, 'me yalequetenat da'me lequejeguetaĝa jo'ne paĝachigui.

⁵ Nataq'aen da'me 'uo jo'me nediijec jo'ne uetalegue jajo'me nepe jo'ne mach'e lenaĝat 'me ja en 'te di'yoq, eetojo': «Jayem Babilonia jo'ne p'ajaye, nach'ayem lat'e yema jana'me quejeguetaĝailpi, jayem chiyaqayi da'me male qodaqaeca'a jena'me jiyaĝadipi jo'ne netedalegue jena'me aleua.»

⁶ Chane'eja da'me jayem male jauana jañe'me yauo da'me joote en taĝai q'aen jana'me letauo't ga'me jiyaĝadipi jo'ne ja 'nalo'te, nach'egaua jo'ne joote qoyala't yajouaĝat da'me 'yaĝatetedac joñe'me Jesús. Qama'le da'me jayem yataqata da'me joqoch'em.

⁷ Qalaĝaja joñe'me piyem le'ec male jayem dojapegue', enaac: “¿Toqoch'e auoqoch'em da'me dojo' jo'ne auana? Nayi cha'li am ja'aĝatem da'me jo'ne yelo'teguet, da'me jo'ne ja en 'te di'yoq jañe'me yauo choqoñe'me jiyac polio' 'me netalegue, jo'ne siete naa'me laqai'go nataq'aen diez naa'me lepeel.

⁸ Ñe'me jiyac polio' jo'ne auana, nach'eñe 'me 'uo joca'li qalaĝaja nayi male joote yeleu, qama'le yitaĝa nenoĝojeguem qom'che, qaedi male qoyen loiquiaqa' da'me qoyolaĝachigui. Chane'eja qom yauata da'me dojo' ga'me jiyaĝadipi jo'ne uetedalegue jena'me aleua, gaa'me jo'ne ja qoyedidiñe naa'me lenaqa'te qama'le ja uedalegue jaga'me nede jo'ne uetedalegue joga'me jiyaĝadipi jo'ne qonec'alaĝatedegue, chiyoqotelegue joca'li yemta qoye'et jena'me aleua, qama'le yataqata yoqochetem qom'che, da'me yitaĝa yauata di'me jiyac polio' jo'ne 'uo joca'li, qama'le nayi joote yeleu, qalaĝaja nach'edi 'me yitaĝa nec'atequena qom'che.

⁹ “Gaa'me jo'ne 'uo da'me layatenaĝanaĝa'j, 'noota qom yayate'n da'me yelo'tegueta naa'me naajo' jo'ne siete naqai'go, jo'ne nach'enaua 'me siete comada'a, qama'le jañe'me yauo netalo'te jonaa'me. Nataq'aen gaa'me comada'a jo'ne siete nach'egaua jo'ne siete nejaliaĝanaqa.

¹⁰ Qama'le gaa'me cinco jaliaĝanaqa joote qayaua, male 'uo ñe'me onolec jo'ne maliaĝa 'uo da'me lejaliaĝa, qama'le ga'me laqaya jo'ne p'ategue cha'li maliaĝa ja naequena. Qalaĝaja qom novi' qama'le ja cop'a da'me 'uo qom'te.

¹¹ Ñe'me jiyac polio' jo'ne 'uo joca'li, qama'le nayi male joote yeleu, nach'eñe jo'ne nejaliaĝanec laqaya 'me octavo, nataq'aen nach'eñe jo'ne chiyaqauelo jogaa'me nejaliaĝanaqa laqaya' jo'ne siete. Qalaĝaja nach'eñe jo'ne yec'ata da'me qoyen loiquiaqa' da'me male qoyolaĝachigui.

¹² “Gaa'me diez nepeel jo'ne auanalo nach'egaua jo'ne diez nejaliaĝanaqa laqaya' jo'ne maliaĝa ja qoyanema da'me lejaliaĝa'j, qalaĝaja nach'egaua jo'ne cada'ac da'me 'uo qomle da'me lañoqotaĝanaĝa'j, qom cha'li uetauelo ñe'me jiyac polio'.

¹³ Jogaa'me diez nejaliaĝanaqa nach'egaua jo'ne 'uo da'me 'lamaqatenataĝanaĝa'j da'me yanema da'me lañoqotaĝanaĝa'j choqoda'me lejaliaĝa'j ñe'me jiyac polio'.

¹⁴ Yem da'me dojo' qama'le deloi'te' ñe'me 'Naĝanaĝate Lec'oĝot, qalaĝaja ñe'me 'Naĝanaĝate Lec'oĝot noma't jogaa'me, qa'a ñe'me 'Naĝanaĝate Lec'oĝot naqaeñe jo'ne Lejaliaĝane'j ena'uaque jogaa'me jaliaĝanaqa, nataq'aen yataqata yaguegue da'me mach'e lañoqotaĝanaĝac. Qama'le gaa'me jo'ne ueteda'ajop joñe'me nach'egaua jo'ne Dios yiyaĝanalo 'me mach'e liquiyaqa, nach'egaua jo'ne yataqata p'iida'a joñe'me.”

¹⁵ Qama'le joñe'me piyem le'ec yitaĝa jayem 'yaĝatem da'me dojo': “Ga'me noĝop jo'ne auana, jona'me lae neta'ña jaga'me yauo jo'ne quejeguetaĝai, nach'ena jenjo' 'me qayoĝode' jogaa'me noyaqa choqoga'me jiyaĝadipi jo'ne jalcote, gaa'me noyaqa let'adayaqa jo'ne yodapecache naa'me 'laqataqa.

¹⁶ Qama'le jaa'me diez nepeel jo'ne auanalo choqoñe'me jiyac polio' da'me male nauteta jañe'me yauo jo'ne quejeguetaĝai, qama'le yaneteda'ñedi da'me yegue'm qa'a ja yitaĝa yepaquetedapega, chayovida'a da'me e'n jale'tague, qama'le yali'j jena'me mach'e lapat, chayovida'a da'me male yachedaue ga'me dole' da'me qoyigoue.

¹⁷ Ñe'me Dios nach'eñe jo'ne en lelnataĝa'j jogaa'me nejaliaĝanaqa jo'ne yachauelo gaa'me lai'li jogaa'me, qaedi male ye't ga'me jo'ne mach'e 'yamaqaten joñe'me. Chane'eja jogaa'me 'yamaqate'n da'me yanema da'me lañoqotaĝanaĝa'j ñe'me jiyac polio', chayovida'a qom yepaquichigui yema da'me jo'ne joote 'yaĝatetac joñe'me Dios.

¹⁸ Jaga'me yauo jo'ne auana, nach'añe jo'ne noic let'adaic 'me nejaliaĝatelo'te yemeda jogaa'me nejaliaĝanaqa 'me uetedalegue jena'me aleua.”