Apocalipsis 15 - Nuevo Testamento Toba Sombrero Negro

Jogaa'me siete piyem laje' choqogaa'me siete napite'nayaĝaco

¹ Yitaĝa jauana di'me piyem da'me 'uo jo'me 'nanec laqaya jo'ne let'adaic choqoda'me 'uo da'me lichic let'adaic: qa'a uo'oe jogaa'me siete piyem laje' choqogaa'me napite'nayaĝaco 'me siete 'me p'atedegue, qama'le nach'egaua jo'ne en yovida'a da'me en loiquiaqa' da'me lalemataic joñe'me Dios.

² Nach'e ena'am jauana jaga'me qa'em lat'edai jo'ne yataqata chichiñe joga'me noĝop jo'ne yaleeguet ga'me dole' lauaq. Qama'le ga'me na'ña jaga'me qa'em lat'edai uo'oe ga'me jiyaĝadipi, naqaegaua jo'ne noma't ca'li ñe'me jiyac polio' choqoga'me jo'ne mach'e lequi'i, nach'eñe ñe'me jiyac polio' jo'ne 'uo ga'me naloqotenec jo'ne lenaĝat q'aen.

³ Qama'le t'onaĝa'tape jogaa'me, 'yotedac da'me lalac ñe'me Moisés choqoda'me lalac ñe'me 'Naĝanaĝate Lec'oĝot jo'ne eetac: “Let'adayaqa naa'me auauo'oe, Nataq'aen da'me onaĝayaqa ena'uaque naa'me at'onataqa, Am Jaliaĝanec Dios jo'ne qaya'te auaqalatac; Eja da'me chimaqategue da'me adadiquiyaĝac nataq'aen da'me yataqatelegue, Am Lejaliaĝane'j ena'uaque ga'me jiyaĝadipi jo'ne neda'ña jena'me aleua.

⁴ Am Jaliaĝanec, ¿jach'e jogamaĝa yaqanatet ta'le ja am 'te t'oiya? ¿Jach'e jogamaĝa ja am 'te 'nonaĝachichigui? Qa'a naqa'am jo'ne am Onolec da'me ja am 'te 'nalegue; Ena'uaque naa'me noyaqa let'adayaqa na'taquena qomle, Qama'le am 'nonaĝachidegue, Qa'a da'me adec'atenaĝanaĝac joote aualoĝon Nataq'aen da'me qonauachigui yema.”

Gaa'me yomaĝaiqui' jo'ne siete

⁵ Qama'le yenoĝodegue daa'me daajo' jo'ne uo'oe, male jec'aten di'me piyem, qama'le jauana da'me 'nouategue ga'me tamenaĝaiqui jo'ne na'ague di'me piyem, ga'me jo'ne yoqoteguet da'me 'namaqatenataĝanaĝac jo'me lae't qoyen.

⁶ Ga'me tamenaĝaiqui chiyoqodaue jogaa'me siete piyem laje' 'me nachidac gaa'me siete napite'nayaĝaco, yatedañe gaa'me louo jo'ne lino, choqoda'me yaqasele'j nataq'aen da'me yoqovite', choqoga'me nejataĝaiqui jo'ne oro 'me yovidaje'malo naa'me letoguel.

⁷ Qama'le 'uo ga'me onolec gaa'me cuatro yejidi jo'ne nec'aletedaye, yanapeema gaa'me onole'tape jogaa'me yomaĝaiqui' jogaa'me siete piyem laje', gaa'me yomaĝaiqui' jo'ne oro, nach'egaua jo'ne najaĝayelo da'me lalemataic joñe'me Dios, ñe'me jo'ne nach'e eta't da'me nec'aletaye nataq'aen da'me ja pal.

⁸ Qama'le ga'me tamenaĝaiqui male najaĝaye jana'me nemala' jo'ne chiyaqayi da'me 'lonaĝa let'adaic joñe'me Dios choqoda'me lañoqotaĝanaĝac, qama'le qaya'te ta'le yaqanatet da'me taue joga'me, chayovida'a qom nimichijeguem yema gaa'me napite'nayaĝaco jo'ne li'ya'j jogaa'me siete piyem laje'.