Apocalipsis 14 - Nuevo Testamento Toba Sombrero Negro

Ñe'me 'Naĝanaĝate Lec'oĝot nataq'aen jogaa'me Dios liquiyaqa

¹ Yem da'me dojo' qama'le yitaĝa jelojeguem, qama'le jauana ñe'me 'Naĝanaĝate Lec'oĝot da'me petalegue ga'me qajoĝonaĝa jo'ne lenaĝat da'me Sión. Qama'le uo'oe gaa'me naequetedapegue' jo'ne ciento cuarenta y cuatro mil ga'me jiyaĝadipi, gaa'me jo'ne qoyedetalo'te jana'me nepe da'me lenaĝat joñe'me 'Naĝanaĝate Lec'oĝot choqoda'me lenaĝat ñe'me Let'a.

² Yem qama'le jomachiya ga'me nejamaĝa jo'ne chiyaqaje'ma di'me piyem jo'ne ena'am ga'me noĝop ladic qom 'uo ga'me nayeñe, nataq'aen ena'am da'me qajoĝonaĝa 'loĝoyaĝac, nataq'aen ena'am da'me lejamaĝa ga'me jiyaĝadipi jo'ne jalcote 'me viquinaĝanaĝaiquipi nale yiviquiñelo ga'me liviquil.

³ Qama'le t'onaĝa'tape, 'yotedac da'me nalac jo'ne dalaĝaic, da'me dajoteda'uo jaga'me Dios lejaliaĝaiqui jo'ne je'onaĝaiqui, qama'le dajoya'agueta jogaa'me cuatro yejidi jo'ne nec'aletedaye choqogaa'me 'yaĝaicachidi. Yataqata ja qoyayaten da'me dojo' nalac, mach'e e'n niyaqa'alo joga'me ciento cuarenta y cuatro mil jiyaĝadipi jo'ne joote qonec'alaĝatedegue, qoyachiyoĝotauelo jogaa'me neteda'ña jena'me aleua.

⁴ Naqaenaua jo'ne jamaĝaiquipi, jo'ne ja 'nalegue da'me 'loyaĝa'j; qama'le nach'e eta't da'me quetedapegue' ñe'me 'Naĝanaĝate Lec'oĝot, ta'ya ga'me ta'ya. Naa'me naajo' jo'ne joote qonec'alaĝatedegue, qoyachiyoĝotauelo jogaa'me jiyaĝa'u, qama'le 'uaetede'eguet da'me qoyen najaqaje's jo'ne qoyanem ñe'me Dios choqoñe'me 'Naĝanaĝate Lec'oĝot.

⁵ Ja qodomachiya gamachaqaega noqovinaĝanaĝac ta'le nenaĝatedegue, qa'a nach'enaua qaya'te laviyaĝaje't.

Da'me 'laqataĝanaĝa'j ñaa'me tres piyem laje'

⁶ Yem qama'le jauana jo'me piyem le'ec laqaya da'me uayotapelegue di'me piyem laeñi, jo'ne yachitac da'me 'naqataĝanaĝac jo'ne nach'e eta't ja pal, qaedi 'yaĝatema yema joga'me jiyaĝadipi jo'ne neteda'ña jena'me aleua, jo'ne yodapecache naa'me 'laqataqa nataq'aen jogaa'me noyaqa choqogaa'me neqomyaĝaco.

⁷ Qama'le netenec da'me 'laqatac jo'ne eetac: “At'oiya'aguet ñe'me Dios qama'le a'nonaĝachiyegui joñe'me, qa'a male yovita da'me laloqo' da'me ya'uo lec'atenaĝanaĝac. Anetameñiyot ñe'me jo'ne ya'uo di'me piyem nataq'aen jena'me aleua nach'e ena'am joga'me noĝop let'adaic choqoga'me noĝop jo'ne natetajeguem.”

⁸ Qama'le yec'atalegue ñe'me piyem le'ec laqaya jo'ne eetac: “¡Yataqata qonolaĝachiñe nayi di'me noic let'adaic jo'ne lenaĝat da'me Babilonia! Di'me jo'ne en taĝaiquipi yemeda joga'me aleua laje'pi, da'me en taĝayaqa q'aen ga'me lataĝa jo'ne lequejeguetaĝa, ¡male qoyapalaĝat nayi!”

⁹ Qama'le yitaĝa equegue ñe'me piyem le'ec laqaya jo'ne tercero, jo'ne en yejam da'me 'laqatac jo'ne eetac: “Qom 'uo ga'me netamenot ñe'me jiyac polio' uotaĝa jaga'me mach'e lequi'i, nataq'aen da'me yaje'tem da'me qoyetet jaga'me en 'nanaĝaijete jo'ne nalegue q'aen jana'me nepe uotaĝa na'me louaq,

¹⁰ nach'ega jo'ne niyomigui qoyen ga'me lataĝa jo'ne lalemataic ñe'me Dios. Ena'am ta'le qaya'te lale'gue da'me le'uaĝanaĝanaĝac joñe'me, qama'le qoyen da'me layaliaĝac ga'me jiyaĝaua da'me yaviyeque ga'me dole', nataq'aen ga'me azufre jo'ne yataqata edetañgui, nataq'aen da'me dajo'tagueta ñaa'me piyem laje' jo'ne ja 'nalo'te choqoñe'me 'Naĝanaĝate Lec'oĝot.

¹¹ Jana'me nemala' jo'ne layaliaĝac qoyen nach'e eta't da'me nenoĝojeguem, qaya'te loiquiaqa', qama'le gaa'me pi'yaĝadi choqogaa'me noloqo'ote qaya'te 'nomataĝaiqui' jogaa'me jo'ne netametot ñe'me jiyac polio' uotaĝa jaga'me lequi'i, nataq'aen jogaa'me jo'ne yacoteguet jaga'me 'lanaĝanaqate jo'ne uaye da'me lenaĝat.”

¹² ¡Male qoyauana da'me eeta da'me napogaĝadenaĝa'j ga'me Dios lec'oqo'tepi, nach'egaua jo'ne yoqocha'alo naa'me lamaĝajoĝonaĝaco ñe'me Dios nataq'aen da'me ja yaĝadiñi da'me yataqata p'iida'a ñe'me Jesús!

¹³ Qama'le jomachiya ga'me nejamaĝa jo'ne chiyaqaje'ma di'me piyem jo'ne eetac: “Auediñe da'me yataqata made'tape jogaa'me yele'u jo'ne chiyoqo'tegue nayi male yele'tedot joñe'me Qadejaliaĝanec.” Qama'le 'yateguet joñe'me Dios Lepaqal, enaac: “Naq'aeta da'me dojo', qa'a male 'nomatedegue, joote yem da'me lachoĝode'j, qama'le nach'e eta't di'yo't da'me 'lonataqa jogaa'me.”

¹⁴ Yem da'me dojo' qama'le yitaĝa jelojeguem, qama'le jauana jo'me piyem lo'oc jo'ne pagaĝaic, qama'le 'uo ñe'me netalegue jo'me piyem lo'oc jo'ne ena'am ta'le naqaeñe 'me Jiyaĝaua Lec'oĝot. Jena'me laqaic 'uo ga'me noqop'a jo'ne oro, nataq'aen lajoqot'a ga'me ledaĝanaĝat jo'ne yaec.

¹⁵ Qama'le nenoĝonegue ga'me piyem le'ec laqaya jo'ne chiyaqaue na'me tamenaĝaiqui jo'ne na'ague di'me piyem, qama'le neten da'me dojapegue' ñe'me jo'ne netalegue ga'me piyem lo'oc: “¡Avichaĝañi na'me adedaĝanaĝat, qama'le auaqataĝan, qa'a male yovita da'me laloqo' da'me qonaqat jena'me jala jo'ne uetalegue jena'me aleua, qa'a male yajoq!”

¹⁶ Qama'le joñe'me jo'ne netalegue ga'me piyem lo'oc en napojeguem jena'me aleua da'me yichaĝañi ga'me ledaĝanaĝat, qama'le yapotenat ga'me jala jo'ne chiyaqalegue jena'me aleua.

¹⁷ Yem qama'le 'uo ga'me piyem le'ec laqaya jo'ne chiyaqaue na'me tamenaĝaiqui jo'ne na'ague di'me piyem, jo'ne nach'e ena'am yachitac ga'me mach'e ledaĝanaĝat jo'ne yaec.

¹⁸ Qama'le yitaĝa 'uo ga'me piyem le'ec laqaya jo'ne chiyaqaue ga'me c'atoĝonaĝala', nach'ega jo'ne yaqanatet da'me yelolegue ga'me dole', qama'le netenec da'me 'laqatac da'me yiyaĝana ga'me jo'ne yachitac ga'me ledaĝanaĝat jo'ne yaec, eetac: “¡Avichaĝañi na'me adedaĝanaĝat, qama'le auen yichaĝadegue gaa'me lichidiqui jo'ne na'ñalo joga'me uva jala jo'ne uetalegue jena'me aleua, qa'a joote yi jena'me uva jala!”

¹⁹ Joñe'me piyem le'ec male yichaĝalegue da'me ledaĝanaĝat jena'me aleua, qama'le yichaĝadegue jogaa'me lichidiqui joga'me uva jala jo'ne ueta'ñalo jogaa'me nanaĝanaqa'te jena'me aleua. Chane'eja da'me yem da'me qoyichaĝadegue gaa'me uva lichidiqui, qama'le qoyachañguilo jaga'me limaĝañi jo'ne lae't qoyen da'me qoyolaĝachigui joga'me uva jala da'me qoyen dolayi yema, qama'le nach'aga da'me chiyaqayi da'me jo'ne 'nanec 'me lalemataic joñe'me Dios.

²⁰ Jaga'me lae't da'me qoyolaĝachigui joga'me uva jala qoyen p'adegue joga'me noic let'adaic, nach'ana jo'ne chiyaqayi jaga'me netauo' lat'edai 'me yedaje'malo naa'me naqa' leque'te joga'me pegadipi, qama'le nalo'taguet trescientos kilómetros ga'me jo'ne laguelegue jaga'me netauo'.