Apocalipsis 12 - Nuevo Testamento Toba Sombrero Negro

Joga'me jiyac polio' jo'ne nautena jaga'me yauo

¹ Qama'le 'uo jo'me di'yoq jo'ne 'nanec let'adaic 'me ua'ague di'me piyem: 'uo jaga'me yauo jo'ne qoyen neuoĝoi jañe'me ajeua, choqoñe'me auoĝoic ne'toto naa'me lapia'te, nataq'aen jaga'me cop'a jo'ne netaye jo'me laqaic nalo'taguet doce naa'me uaqachiñil jo'ne netedalegue.

² Jaga'me yauo joote qo'uaĝai, qama'le 'yalaqatapeguem da'me layaliaĝac da'me yajouaĝat da'me jetaque c'oe.

³ Mane'e da'me yem da'me dojo', qama'le yitaĝa 'uo jo'me 'nanec laqaya jo'ne ua'ague di'me piyem: 'uo ga'me jiyac polio', jo'ne ena'am ta'le ñaĝadiaq da'me 'loyaĝac jo'ne tomaĝadaic. Uo'oe gaa'me siete laqai'go choqogaa'me diez gaa'me lepeel, qama'le onolqa'tape naa'me laqai'go uo'oe naa'me noqop'al.

⁴ Jena'me lauenec yauelegue onolec ga'me lae jena'me uaqachiñipi jo'ne nalo'taguet tres naa'me lael jo'ne netedot di'me piyem, qama'le yajaĝachi'ña jena'me aleua. Qama'le jo'me ñaĝadiaq polio' male neta'ña ga'me dajoya'ña jaga'me yauo jo'ne jetaque c'oe, qaedi yalic ga'me lec'oĝot da'me yemta niyiñe.

⁵ Qama'le jaga'me yauo male c'oe, 'uo ñe'me lec'oĝot jo'ne le'em, joñe'me jo'ne qoyanem qomle da'me lañoqotaĝanaĝac let'adaic qaedi nejaliaĝatelo'te ena'uaque joga'me aleua laje'pi. Qampaja'a da'me qodoĝotaĝanec ñe'me c'oĝot qama'le qoyauegot joñe'me Dios da'me dajoyalegue qoyen da'me nejaliaĝaiqui jo'ne neje'onaĝaiqui.

⁶ Qama'le jaga'me yauo dajooyi, yec'ata di'me aleua lae jo'ne totapega't, 'me joote Dios yaqataĝata't qaedi naqaedi 'me ue'ta da'me yiqui'yaĝatac, chayovida'a ga'me mil doscientos sesenta noloqo'ote.

⁷ Yem da'me dojo', qama'le 'uo ga'me nalada't di'me piyem, qa'a joñe'me piyem laje'pi lejaliaĝanec Miguel choqoga'me piyem laje'pi jo'ne nejoĝonaqapi nauteta ñe'me ñaĝadiaq polio' qama'le deloiquitapegue', qama'le ñe'me ñaĝadiaq polio' nataq'aen jogaa'me piyem laje'pi laqaya' jo'ne mach'e lalemaĝajetpi yataqata deloiqui'tape,

⁸ qalaĝaja ja yaqanate't ta'le domataĝa'n. Chane'eja male qaya'te 'lachaqa't di'me piyem jogaa'me,

⁹ qama'le qoyamaĝaye ñe'me jiyac let'adaic jo'ne ena'am ta'le ñaĝadiaq da'me 'loyaĝac, nach'eñe ñe'me nanaic jo'ne 'uaechiñe 'uo joca'li jo'ne lenaĝat da'me Payac nataq'aen lenaĝat laqaya da'me Satanás, jo'ne yoqovi'n yema ga'me aleua laje'pi. Ñe'me Satanás nataq'aen ena'uaque jogaa'me mach'e lalemaĝajetpi male qonajaĝadi'ña jena'me aleua.

¹⁰ Qama'le jomachiya ga'me 'naqatac jo'ne yejam 'me chimaqapegue di'me piyem jo'ne eetac: “¡Nayi joote novitequena da'me lec'alaqataĝanaĝac ñe'me Qanedios; Male di'yoq da'me lañoqotaĝanaĝac qaedi nejaliaĝatelo'te yema ga'me aleua laje'pi, Nach'e ena'am male di'yoq da'me mach'e lejaliaĝa ñe'me Liquiyac! Qa'a joote qoyamaĝaye ñe'me lauteua' gaa'me mach'e qadaqaya'olqa, Ñe'me jo'ne yemeda naa'me noloqo'ote choqogaa'me pi'yaĝadi da'me ya'uo da'me latenataĝanaĝac jo'ne yaloĝona ñe'me mach'e Qanedios.

¹¹ Da'me lomataĝanaĝa'j jogaa'me qadaqaya'olqa chiyoĝotayi jaga'me letauo' joñe'me 'Naĝanaĝate Lec'oĝot, jaga'me letauo' jo'ne naliñi qoyen ca'li yeleu, Choqonaa'me 'naqataqa jo'ne 'yaĝate'tape. Ja t'oita da'me qoyalatalo'te, Dite da'me najetede'eguet da'me leleuaqa'.

¹² Chane'eja ¡ami made'tape, yema da'me ami jo'ne oñe'tague di'me piyem! Qalaĝaja ami choĝodayaqolqa, ami jo'ne oñeta'ña jena'me aleua nach'e ena'ama ami jo'ne oñetañgui joga'me noĝop let'adaic, Qa'a ñe'me payac ami nenochi'ñalo. ¡Ami nautenalo, najaĝaye da'me lalemataic, Qa'a yayaten da'me male na'ta da'me loiquiaqa'!”

¹³ Ñe'me ñaĝadiaq polio', mane'e ca'li yauana da'me qonamaĝa'ña jena'me aleua, qama'le yecanac jañe'me yauo jo'ne 'uo ga'me lec'oĝot.

¹⁴ Qalaĝaja jaga'me yauo qoyanema gaa'me dos uole laua' jo'ne jalco'l, qaedi yaqanatet da'me uayo, qama'le yec'ata ga'me mach'e 'lachaqa' jo'ne ua'ague joga'me aleua 'me totapega't, qaedi male qaya'a ga'me neta'ña joga'me nanaic polio', di'me jo'ne ua'a da'me qoyiqui'yaĝatac chayovida'a da'me nalo'taguet tres naa'me 'uoidi choqoga'me laeñi joga'me uo'e laqaya.

¹⁵ Ñe'me nanaic polio' nolec ga'me noĝop chayovida'a da'me ya'uo ga'me ñache qaedi yayoĝonegue jaga'me yauo,

¹⁶ qalaĝaja jena'me aleua lecochiya jañe'me yauo, qama'le 'youachigui jena'me nedegaĝat, qama'le yeuoĝonañi ga'me ñache jo'ne chiyaqayi na'me nedegaĝat ñe'me ñaĝadiaq polio'.

¹⁷ Qama'le naqaeda 'me chiyaqayi da'me ma'ejama'le 'uo da'me lalemataic ñe'me ñaĝadiaq polio', yataqata nautena jañe'me yauo, qama'le ec qaedi deloiquitapegue'to jogaa'me yauo lec'oqo'te laqaya', naqaegaua jo'ne yoqochideta daa'me lamaĝajoĝonaĝaco joñe'me Dios, nataq'aen da'me yataqata quetede'egue na'me lapaĝaguenataĝanaĝac joñe'me Jesús.

¹⁸ Qama'le ñe'me ñaĝadiaq polio' male ueta'ña di'me lae joga'me noĝop let'adaic.