Apocalipsis 11 - Nuevo Testamento Toba Sombrero Negro

Ñaa'me dos aqataĝanaĝayaqa

¹ Chane'eja jayem qoyanem jo'me ena'am ta'le coqota jo'ne naloqotenaĝanaĝat, qama'le jayem qo'yaĝatem da'me dojo': “Oñijeguem nayi qama'le analoqoten ñe'me tamenaĝaiqui jo'ne Dios loĝot, choqoga'me nec'atoĝonaĝala', qama'le nach'e ena'am jogaa'me jiyaĝa'u jo'ne uetedaue da'me 'nonaĝatedapegue joñe'me Dios, jach'e jogamaĝa eete'.

² Qalaĝaja ena'te analoqoten di'me tamenaĝaiqui najoĝoc, qa'a nach'edi jo'ne joote qoyanema jogaa'me jiyaĝa'u jo'ne qaya'te lepe'e', queda'me nach'egaua jo'ne pedelegue qomle jenjo' noic jo'ne ja 'nalegue da'me ja 'nonaĝachidegue chayovida'a qom nalo'taguet cuarenta y dos naa'me auoĝoyaqa.

³ Qama'le jamaĝalo'te qomle gaa'me dos 'yaqataĝanaĝanaqa jo'ne uo'oe gaa'me louo jo'ne napidalo'te, qaedi 'yaĝatetedac na'me 'yaqataĝanaĝac chayovida'a qom nalo'taguet da'me mil doscientos sesenta naa'me noloqo'ote.”

⁴ Naa'me naajo' dos aqataĝanaĝayaqa nach'enaua jo'ne ena'ama gaa'me ep'a 'me olivo, qama'le nach'e ena'ama jogaa'me dos coyadaĝanaqatel jo'ne oro. Nach'enaua jo'ne neteda'ña joga'me 'lachaqa' joñe'me Dios jo'ne Lejaliaĝanec jena'me aleua.

⁵ Qom 'uo ga'me jo'ne jetaque 'uo ga'me 'yeteque, qama'le naajo' na'yalo naa'me nedegaqa'te joga'me dole', qama'le e'n yavi'j ena'uac joga'me laute'upi, qama'le naq'aeta da'me qoyalat gamachaqaega jo'ne jetaque 'naĝa't joñaa'me.

⁶ Naa'me naajo' aqataĝanaĝayaqa yaqanate't ta'le yapadidiñe di'me piyem qaedi ja no't da'me cha'li maliaĝa 'yaĝatetedac da'me Dios 'laqataĝanaĝac, qama'le nach'e ena'am da'me yaqanate't ta'le e'n neleguemaĝata netauo' joga'me noĝop, choqoda'me e'n lachoĝodec jena'me aleua laje'pi, yauo'oe yodapecache da'me lapite'nayaĝaco, yema da'me 'viyelaĝalo'te q'aen, queda'me nach'eda jo'ne 'uo da'me 'lamaqatenataĝanaĝa'j.

⁷ Qalaĝaja qom male yoma't ena'uaque da'me 'laqataĝanaĝa'j, qama'le joñe'me jiyac polio' male nenoĝojeguem chiyaqañgui jaga'me limaĝañi jo'ne qaya'te loiquiaqa', qama'le paja'a da'me deuo'yalo, qama'le noma't chayovida'a da'me male yala't.

⁸ Chane'eja jogaa'me lapa'che dia'me joote yele'u nelagaĝachichidiñe, ueteda'ña ga'me naq'aeuo joga'me noic let'adaic, di'me jo'ne ua'ña joca'li ñe'me mach'e Qadejaliaĝanec da'me qoyep'enajeguem, di'me noic jo'ne lenaĝat qoyen Sodoma qama'le nach'e ena'am da'me lenaĝat laqaya qoyen Egipto.

⁹ Qama'le jena'me jiyaĝadipi jo'ne yodapecache naa'me 'lachaqa'te choqoda'me neqomyaĝac nataq'aen naa'me 'laqataqa, nach'e ena'am ena'uaque jogaa'me noyaqa jo'ne uo'oe, yema male yec'ate'n jogaa'me lapa'che dia'me, chayovida'a qom nalo'taguet tres gaa'me noloqo'ote choqoga'me laeñi ga'me nolo' laqaya, choqoda'me ja dajenataĝatem ta'le qoyijediñi.

¹⁰ Jogaa'me jo'ne 'lachaqa't jodi'me aleua ja 'yamaqate'n jodia'me Dios 'laqataĝanaĝanaqa, qa'a eetedapega nach'ediaua dia'me jo'ne chiyaqayilo da'me layaliaqa'. Chane'eja yataqata netotec da'me leleuaĝa' jodia'me, yauote da'me lamai'j nataq'aen yache't gaa'me leyalaqataĝanaĝa'j gaa'me laqaya'.

¹¹ Qalaĝaja qom yenoĝodegue jaa'me tres noloqo'ote nataq'aen jo'me laeñi jo'me nolo' laqaya, qama'le joñe'me Dios yajedelo'te jodia'me qaedi yitaĝa 'niyelaĝachidijeguem. Chane'eja yitaĝa ñidijeguem, qama'le ena'uaque jogaa'me jiyaĝa'u jo'ne yauata da'me dojo', male najaĝayelo da'me loqolanaqa'.

¹² Chane'eja jaa'me dos aqataĝanaĝayaqa domachita ga'me 'naqatac jo'ne chimaqapegue di'me piyem, jo'ne enaac: “¡Anec'achije'ma jena'me jenjo'!” Qama'le quetedaue jo'me piyem lo'oc da'me yec'adije'ma di'me piyem, qama'le jogaa'me laute'upi male yauata da'me dojo'.

¹³ Qama'le paja'a da'me 'uo jo'me nedaĝac let'adaic, qama'le di'me noic let'adaic ena'uaque gaa'me diez 'nachaqa'te male 'uo ga'me onolec jo'ne iyiñe, qama'le nach'e ena'ama joga'me jiyaĝadipi jo'ne yele'u nalo'taguet siete mil. Chane'eja jogaa'me jo'ne maliaĝa uo'oe male 'uo da'me loqolanaqa' qama'le 'nonaĝachidegue joñe'me Dios jo'ne ne'tague di'me piyem.

¹⁴ Qama'le yenoĝonegue jo'me p'ategue jo'ne qaya'te nayamaĝa, qalaĝaja ja uayaloĝoguet da'me novitequena ga'me laqaya jo'ne tres.

Qoyajediye jaga'me najeede jo'ne séptima

¹⁵ Ñe'me piyem le'ec laqaya jo'ne dajoyalo'te ñaa'me seis piyem laje' male yajediye jaga'me mach'e lajeede, qama'le qodomachiya ga'me nejamaĝa let'adaic jo'ne chimaqapegue di'me piyem jo'ne eetac: “Joñe'me jo'ne mach'e Qadejaliaĝanec Male nejaliaĝatelo'te yema jena'me aleua laje'pi Choqoñe'me Liquiyac joñe'me Qadet'a, Qama'le nach'eñe ñe'me jo'ne qaya'te ta'le loiquiaqa' da'me lejaliaĝa.”

¹⁶ Qama'le jogaa'me veinticuatro 'yaĝaicachidi jo'ne netañelo jogaa'me nejaliaĝaiqui' jo'ne neje'onaĝaiqui' da'me dajoteda'aguet joñe'me Dios, male naĝadi'ñejop chayovida'a da'me yedaĝateda'agueta naa'me latajoĝoco jena'me aleua, qama'le 'nonaĝachidegue joñe'me Dios,

¹⁷ da'me enapega't: “Am Qadejaliaĝanec, jo'ne am Qadet'a 'me qaya'te auaqalatac, Da'me am jo'ne nach'e eta't 'uo, nataq'aen da'me jalchi'ena am 'uo joca'li, Am janemaĝam da'me qadamaic, Qa'a nayi joote auaconeguet da'me adañoqotaĝanaĝac let'adaic Qama'le auen laloqo' da'me male anejaliaĝatelo'te jena'me aleua laje'pi.

¹⁸ Qa'a joga'me jiyaĝadipi jo'ne qaya'te lepe'e' male 'uo da'me nalimaĝa let'adaic; Qalaĝaja male yovita jena'me nolo' da'me a'uaĝa'n jogaa'me, Qom aua'uo da'me adec'atenaĝanaĝac jodia'me joote yele'u; Nataq'aen da'me auanema da'me nejetenague'j jogaa'me jo'ne mach'e adalemaĝaje'te jo'ne at'aqataĝanaĝanaqa, Choqoga'me mach'e ac'oqo'tepi jo'ne yataqatelo'te Nataq'aen yema jogaa'me jo'ne yataqata am 'nonaĝachidegue, Gamachaqaegaua jo'ne p'ajodaye, uotaĝa ja p'ajodaye; Nataq'aen da'me auala't jogaa'me jo'ne yolaĝachidegue jena'me aleua.”

Nauanaĝac jo'ne niyamaqataĝanaĝac

¹⁹ Chane'eja 'nouategue ga'me tamenaĝaiqui jo'ne loĝot joñe'me Dios 'me ne'tague di'me piyem, qama'le qoyauana jaga'me uetaue joga'me tamenaĝaiqui jo'ne lae't jogaa'me diez lamaĝajoĝonaĝaco joñe'me Dios, qama'le en naqalip nataq'aen 'uo ga'me nejamaĝa choqoga'me 'noĝoyaĝac; male deda jena'me aleua qama'le 'uo jaga'me loñi lat'edai jo'ne ena'am ta'le qadipi.