Apocalipsis 10 - Nuevo Testamento Toba Sombrero Negro

Ñe'me piyem le'ec jo'ne lajoqot'a jajo'me nede

¹ Yem qama'le jauana jo'me piyem le'ec laqaya jo'ne 'uo da'me lañoqotaĝanaĝac, naquetaue jo'me piyem lo'oc da'me nenochiñe chiyaqaje'ma di'me piyem, na'me laqaic uetalegue jo'me uosac choqoda'me yaqaselec jo'me latajoĝoc ena'am ta'le ajeua lauaq, nataq'aen naa'me lotetadi ena'am ta'le dole'te qom noĝoneje'melo jena'me lauaq.

² Lajoqot'a jajo'me nede jo'ne 'nouatetaye, qama'le yachetañgui jo'me lapia' jo'ne yayaten joga'me noĝop let'adaic, qama'le jo'me 'nemaq yachetalegue jena'me lañaĝa.

³ Qama'le en yejam da'me 'lalaĝac, qama'le ena'am ta'le jauaĝaic da'me 'loĝoyaĝac; mane'e ca'li 'yalaq, qama'le en qodomachiya da'me 'laqata'j gaa'me siete 'loĝoyaĝaco jajo'me qajoĝonaĝa.

⁴ Mane'e ca'li yem da'me doje'y gaa'me siete 'loĝoyaĝaco jajo'me qajoĝonaĝa, qama'le da'me jayem te'me jetaque jediñe, qalaĝaja 'uo ga'me 'naqatac jo'ne jomachiya 'me chimaqapegue di'me piyem, jo'ne jayem enapega, eet'oi: “Ena'te auen di'yoq joda'me auomachiya jo'ne 'yaĝatetedac jaa'me siete 'loĝoyaĝaco jajo'me qajoĝonaĝa, qama'le ena'te auediñe.”

⁵ Chane'eja jo'me piyem le'ec jo'ne jauana da'me nechatetalegue di'me noĝop choqona'me aleua, nodijeguem jo'me louaq jo'ne yayaten da'me yacoje'mec di'me piyem

⁶ qampaja'a da'me 'naĝatot joñe'me jo'ne nach'e eta't da'me nec'aletaye, joñe'me jo'ne 'lonatac di'me piyem choqona'me aleua nataq'aen joga'me noĝop let'adaic nataq'aen ena'uaque jogaa'me uo'oe jo'ne uedetot jodi'me piyem, qama'le eetac: “Male qaya'te ledaqa' da'me 'uo ga'me qodajo'ta,

⁷ dite da'me male yovita da'me laloqo' da'me dajedaĝan ñe'me piyem le'ec jo'ne séptimo, qom male yepaquichigui da'me ja di'yoq jo'ne loequenataĝanaĝac joñe'me Dios, 'me nach'e ena'am joote 'yaĝatema jogaa'me mach'e lalemaĝaje'te jo'ne 'laqataĝanaĝanaqa.”

⁸ Da'me 'naqatac jo'ne joote jomachiya 'me chimaqapegue di'me piyem, yitaĝa jayem dojapegue', qama'le jayem enapega, eet'oi: “Oc nayi qama'le auaconeguet jaga'me nede jo'ne 'nouatetaye, 'me lajoqot'a ñe'me piyem le'ec jo'ne nechatetalegue di'me noĝop choqona'me aleua.”

⁹ Chane'eja jec'ata jo'me piyem le'ec qaedi jiyaĝane'uo da'me jayem yanem jajo'me nede, qama'le jayem 'yateguet: “Auaconeguet qama'le auachaue na'me anedegaĝat qaedi aualic, qa'a ena'am ga'me ma'ague li'i da'me jama, qalaĝaja jana'me adeta'am male 'uo jo' qomle da'me lichemaĝa.”

¹⁰ Chane'eja jaconeguet jajo'me nede jo'ne lajoqot'a ñe'me piyem le'ec qama'le jalic. Chane'eja na'me ñedegaĝat male en jama, ena'am ta'le ma'ague li'i da'me lamaic, qalaĝaja mane'e da'me yem da'me jalic qama'le en chem q'aen jana'me yeta'am.

¹¹ Yem da'me dojo' qama'le jayem qo'enapega: “'Noota qom yitaĝa a'uaĝatetac da'me 'laqataĝanaĝac joñe'me Dios jo'ne dalaĝaic, a'uaĝatema gaa'me noyaqa jo'ne qayoĝode' choqoga'me jiyaĝadipi jo'ne yodapecache naa'me 'laqataqa, nataq'aen ena'uaque gaa'me neqomyaĝaco, nach'e ena'ama gaa'me nejaliaĝanaqa.”