2 Ts 2 - Nuevo Testamento Toba Sombrero Negro

Gaa'me noloqo'ote qom 'niyelaq joñe'me Jaliaĝanec

¹ Qama'le nayi, ami yaqaya'olqa, ga'me 'liyelaĝajoĝoc joñe'me Qadejaliaĝanec Jesucristo, uotaĝa ga'me nolo' jo' qomle male jouaqa'tajop joñe'me, ami ñachoĝodenoqoto

² da'me ena'te aueñetapega aĝañiñi jena'me jenjo' auenachitapega. Nataq'aen ena'te at'oiyi qom 'uo ga'me jetaque ami yoqochoqote't, qom eetapega nach'eñe ñe'me Dios Lepaqal yayatenaĝanaĝanec da'me joote yovita ga'me laloqo' da'me novi' ñe'me Jaliaĝanec, uotaĝa ta'le 'uo ga'me 'yaĝatem da'me dojo', uotaĝa yauana ga'me nediijec jo'ne eetapega mach'e qat'onatac.

³ Ena'te auajeñetem ta'le 'uo ga'me ami yoqovi'n. Ga'me nolo' cha'li ja novi', qa'a male 'uaeñe 'uo ga'me nalada't jo'ne p'ategue, qom yataqata qonautena joñe'me Dios, qama'le di'yo'quena ñe'me jiyaĝaua jo'ne etaĝaloĝoic, jo'ne qoyamaĝa'ña qomle ga'me napa'lpi 'lachaqa'.

⁴ Jenjo' jiyaĝaua jo'ne ja no'en, naqaena jo'ne yataqata nautena joñe'me Dios, chayovida'a eetapega deuodaĝanec yema joga'me loĝot joñe'me Dios. Nataq'aen nejaliaĝatoue qomle jena'me jenjo' tamenaĝaiqui jo'ne 'lemec joñe'me Dios, male naqaeñe eetapega nach'eñe ñe'me Dios.

⁵ Anetoviñetac jena'me jenjo' joote ami ja'aĝatapema ca'li maliaĝa ami jouetauelo.

⁶ Nataq'aen joote auayachiñe jena'me jenjo' 'lonatac jena'me ja no'en, naqaena ga'me nauequetañe ga'me jiyaĝaua, qaedi male ja 'noota ga'me en 'lonatac.

⁷ Qa'a da'me 'netaĝaloĝoc jo'ne ja di'yoq ca'li, male t'onataĝatac, qalaĝaja ch'e yeuate'ta da'me qonaqat ñe'me jo'ne 'nelaĝatetañe.

⁸ Chane'eja qom male qaya ñe'me 'nelaĝatetañe, qama'le yataqata di'yoq joñe'me jo'ne yataqata ja no'en. Qalaĝaja joñe'me Qadejaliaĝanec Jesús yapalaĝat qomle, yalatec na'me layat jo'ne na'ya na'me nedegaĝat da'me yepetetot ga'me, nataq'aen qom di'yoq da'me 'lonaĝac joñe'me Jesús ena'am ta'le qonolaĝachiñe joñe'me jo'ne ja no'en.

⁹ Jenjo' qovinaĝanaĝaic male di'yoq da'me yataqata Satanás lecochaĝaua, male yataqata 'uo ga'me lañoqotaĝanaĝac, nataq'aen uo'oe gaa'me e'n di'yo't jo'ne 'nanaqa choqogaa'me ja qoyauanalo jo'ne noqovinaĝanaĝaco.

¹⁰ T'onataĝana yema gaa'me letaĝaloĝoco qaedi yoqovi'n jena'me jiyaĝadipi jo'ne uetedaue da'me lejomaĝa'j, nach'egaua jo'ne yataqata ja 'yamaqate'n da'me eja, ja yacoteguet ca'li jena'me jenjo' 'naqataĝanaĝac jo'ne chiyoqo'ot joñe'me Jesucristo 'me nec'alaĝa.

¹¹ Chane'eja joñe'me Dios yataqata yaje'tema da'me cha'li nejaliaĝatoue joga'me noqovinaĝanaĝac, chayovida'a da'me yataqata qo'yamaqaten da'me 'lonatac joñe'me qovinaĝanaĝaic,

¹² qaedi jogaa'me male qoye'n tadoue da'me ne'uaĝanague'j let'adaic, yema jogaa'me jo'ne ja yacoteguet da'me eja, dite da'me quetedapegue' da'me ja chimaqachiñe.

'Noota qom yataqata jep'iyaqa joñe'me Dios

¹³ Qalaĝaja da'me qo'mi nach'e eta't janemaĝam da'me qadamaic joñe'me Dios jouaĝat da'me ami. Dios yataqata ami noqopitalo nataq'aen nach'eñe da'me ami yiyaĝanalo ca'li, qaedi ja oviyaue joga'me nachoĝodec jo'ne na'ta. Ami yiyaĝanalo ca'li en ami nayelo joñe'me Nepaqal, qaedi male ami qoye'n lalemaĝaje'te joñe'me, nataq'aen da'me auacoñiyeguet da'me 'naqatac jo'ne 'yaĝatetac da'me yataqatelegue.

¹⁴ Dios ami yiyaĝanalo ca'li jouaĝat da'me yataqata auacoñiyeguet jena'me jenjo' onaĝaic 'naqataĝanaĝac jo'ne ami ja'aĝataĝama ca'li, qaedi nataq'aen male oviyaue da'me 'lonaĝac ñe'me Qadejaliaĝanec Jesucristo.

¹⁵ Qama'le nayi, ami yaqaya'olqa, 'noota qom a'nañaĝachela't, ena'te aĝañiñi da'me auep'iiya'a joñe'me Dios, nataq'aen ena'te auapalaĝache'ta joga'me qadapaĝaguenataĝanaĝac uotaĝa ga'me qadediije ca'li ami janemaĝama.

¹⁶ Ñe'me Dios jo'ne Qadet'a yataqata qo'mi noqopitalo chayovida'a da'me qo'mi yanema joda'me qat'añaĝac nataq'aen da'me qadeuataqataĝanaĝac jo'ne chiyoqo'ot da'me lichoĝodenataĝanaĝac joñe'me, nataq'aen joñe'me Qadec'alaĝaiqui Jesucristo,

¹⁷ ñachoĝodenoqoto joñaa'me qaedi e'n jaqachiguilo naa'me adai'lidi' da'me adamaiqui, nataq'aen qaedi ami yanema da'me at'añaĝaqui, qaedi nach'e eta't a'uaĝachetac jena'me jenjo' 'noota nataq'aen da'me yataqata a'vichi na'me.