2 Timoteo 3 - Nuevo Testamento Toba Sombrero Negro

Ga'me 'uo qom yovideta jogaa'me p'atedegue noloqo'ote

¹ 'Noota ta'le auayaten jena'me jenjo', queda'me gaa'me noloqo'ote p'atedegue, yataqata 'uo jo' qomle ga'me laqalai'j jena'me jiyaĝadipi,

² qa'a male uo'oe qomle gaa'me jiyaĝa'u jo'ne ch'e noqopitela'ajalo, quetedapegue' loqopich'i jaga'me laicaua, 'yoĝodenaĝayaqa, otanaĝanaĝayaqa, nataq'aen 'uenaĝanaĝayaqa. Male ja naquiaĝanalo jogaa'me let'al, yataqata chiyoĝo's, nataq'aen male jetaque yapalaĝa't da'me qadepe'e.

³ Naqaegaua jiyaĝa'u jo'ne qaya'te loqopich'i, nataq'aen qaya'te lichoĝodenataĝanaĝac, male qovinaĝanaĝayaqa, nataq'aen ja yaqanate't ta'le ja yauote ga'me lamanaĝanaĝa'j, yataqata qaleuaĝayaqa, male nauteta da'me 'noota.

⁴ Male yeme'n ga'me layi, qa'a qaya'te yetetapega, nataq'aen najaqachiguilo da'me ni'yoĝodenaĝa'j, nataq'aen da'me queteda'ague ga'me ch'e lelnataĝa'j, qama'le ja yelotedac ñe'me Dios.

⁵ Nalaĝayelo da'me eetedapega 'uo ga'me lepe'e', qalaĝaja yataqata yoqolegue't da'me qadepe'e ladic. Ena'te ta'le ch'e cholic da'me aualegouelo naa'me naajo' jiyaĝa'u,

⁶ qa'a naajo' jiyaĝa'u naqaenaua tadoue nale ga'me ja 'lemec qaedi yoqovi'n gaa'me choĝodailole yauo' jo'ne yataqata uetedaue da'me loe'j nataq'aen en jalcote en lamai'j ga'me gamachaqaega,

⁷ nach'agaua gaa'me yauo' da'me 'uo da'me jetaque yayate'n qalaĝaja da'me yataqata eja ja yaqanate't ta'le yayate'n.

⁸ Qama'le naa'me naajo' jiyaĝa'u ena'ama jodia'me Janes choqodi'me Jambrés ca'li nauoteteda ñe'me Moisés, qama'le nach'e ena'ama naa'me naajo' jiyaĝa'u nauoteteda da'me yataqata eja. Nach'egaua jiyaĝa'u jo'ne ja 'noe'n naa'me lai'li, nataq'aen joote qoyajaĝadegue jena'me jenjo' qadepi'iyaĝac.

⁹ Qalaĝaja ja qaya'yelo jo' qomle, qa'a jouaĝat da'me jo' qomle male yema da'me qonoma'alo da'me yataqata chiyoĝo's naa'me, ena'ama jodia'me dos jiyaĝa'u ca'li nauoteteda ñe'me Moisés.

Da'me p'ategue 'lelopaĝac ñe'me Pablo

¹⁰ Qalaĝaja da'me am, joote auaconegueta yemeda daa'me yapaĝaguenataĝanaĝaco, nataq'aen da'me auadenaĝat da'me 'yoyaĝac nataq'aen ga'me jetaque ja'uo nale, da'me yepi'iyaĝac, da'me ñapogaĝadenaĝac, da'me yoqopich'i nataq'aen da'me qoyen 'yañaĝac qaedi yema jalo'oguet nale.

¹¹ Nataq'aen auayaten da'me eeta da'me ñe'uaĝanaguec choqoda'me yachoĝodec, ena'ama jogaa'me jayem qo'yeteque ca'li joue'ta di'me noic jo'ne Antioquía, nataq'aen di'me Iconio choqodi'me Listra. ¡Yataqata t'adaic da'me qoyen yachoĝodec! Qalaĝaja yataqachiñe jayem lecochiya ñe'me Jaliaĝanec, yema jayem nec'alaĝate'guejop.

¹² Yataqata eja da'me dojo', gaa'me jetaque uedaue da'me dojo' jo'ne jetaque quetegue joñe'me Cristo Jesús, qomle male qoyecaa'tape yajouaĝat da'me dojo';

¹³ qalaĝaja jogaa'me qaleuaĝayaqa jo'ne pecayaqa, lama'aja da'me qoyachedaue; doqovinaĝa'tape nale, qalaĝaja ena'ama ch'e qoyoqovi'tape.

¹⁴ Qalaĝaja da'me am, 'noota qom nach'e eta't a'nañaĝatec joga'me joote auayaten jo'ne auen eja. Joote auateto'n gaa'me jo'ne am yapaĝague'n:

¹⁵ anetouetac ca'li am jaqayi, joote auayaten jaga'me Dios 'laqataqa lae't, jo'ne nach'aga am yaloĝo'tague ga'me jetaque aua'uo, nataq'aen male am yauedoue da'me nec'alaĝa jo'ne qaya'te loiquiaqa', jouaĝat da'me yataqata auep'iya'a ñe'me Cristo Jesús.

¹⁶ Qa'a yemeda naa'me Dios 'laqataqa yataqata uetedaye da'me 'lañaĝac ñe'me, nataq'aen yataqata 'uo ga'me chiyaqayi nale qodapaĝaguenataĝaneque, nataq'aen yaqanatet ta'le en qodaloĝonataĝana da'me qadepe'e, chayovida'a male qoloqochiyaĝanaĝanec ga'me jiyaĝaua qaedi male 'uo ga'me nejiyaĝauayaĝac yataqachiñe chimaqategue,

¹⁷ qaedi ga'me Dios nejoĝonec jalcote 'uo da'me layatenaĝanaĝac qaedi male yataqata yaqanatet ta'le ye'et yema ga'me 'noota.