2 Corintios 6 - Nuevo Testamento Toba Sombrero Negro

¹ Da'me qo'mi male je'etaq ga'me 'lonatac ñe'me Dios; qo'che' ami ñachoĝodenaqatapecoto qaedi ena'te aualajaĝañiya yema da'me loqopich'i ñe'me Dios jo'ne ami yaloĝonalo.

² Gaa'me nedii's jo'ne Dios 'laqataqa eet'oi: “Ga'me nolo' jo'ne laloqo' q'aen qama'le am ñaquiaĝana; Ga'me nolo' jo'ne 'uo da'me nec'alaqataĝanaĝac qama'le am yecochiya.” Chane'eja ¡anaquiaĝañiya! Ga'me nolo' 'me laloqo' q'aen joote novida'aquena. ¡Nayi mach'e laloqo' da'me ami qonec'alaĝatedegue!

'Nenaguec ñe'me Pablo queda'me t'onataĝaneuo'o ñe'me Dios

³ 'Noota qom qaya'te eetapela't 'yotan da'me qat'onatac. Qo'che' 'ñañaĝataq qaedi ja jaloĝonaq gamachaqaega ja no'en ga'me qo'mi qoyec'ateneque.

⁴ Yema ga'me jauoqo nale, jaloĝonaq queda'me qo'mi lamaĝa's ñe'me Dios, nataq'aen 'uo da'me qanapogaĝadenaĝac da'me yema ñeualaĝaenaĝaguet. Jalcote 'uo da'me qadachoĝodec nataq'aen jalcote gaa'me qadaqalaico choqodaa'me qadouenaĝanaĝaco. Joote qo'mi qoye'uaĝaneque jaga'me 'uaĝanaĝanaqate.

⁵ Qo'mi qoyamaĝadoue nale jaga'me coñetaĝanaĝaiqui, ua'edi jouaqataue ga'me qo'mi qoyalimaĝa'n qama'le ja no'en ga'me qo'mi qo'yeteque. Yataqachiñe jalcote da'me qat'onataĝanaĝac, uaĝa'aegue da'me ja jo'ochaq nataq'aen qaya'te jaliguinaq.

⁶ Temaqaedi da'me uo'oe ena'uaque naa'me naajo', qalaĝaja jaloĝonaq da'me qaya'te lale'gue da'me qat'oyaĝac, jatetonaq da'me eja, 'uo da'me qadapogaĝadec nataq'aen qo'mi qopitaĝanaqataqayaqa. Ñe'me Dios Lepaqal 'me ja 'nalegue uetaue da'me qat'oyaĝac nataq'aen qadoqopita da'me eja.

⁷ Queda'me 'uo da'me qadañoqotaĝanaĝac 'me qo'mi yanema ñe'me Dios, male ja'aĝataqatac joda'me 'naqataĝanaĝac jo'ne yataqatelegue. Nale uo'oe ga'me qadaqalaico qama'le jajoyaqa'agueta, qama'le ena'am ta'le je'euoĝonaqatapecot da'me qat'oyaĝac 'me yataqatelegue queda'me je'etaqatac nataq'aen nach'e eta't ñenaĝataĝaye ga'me jo'ne chimaqachiñe.

⁸ 'Uo ga'me ua'a maqachaĝa qo'mi qo'nonaĝachiguilo, qalaĝaja 'uo ga'me ua'a qo'mi qo'yota'n nataq'aen ja no'en ga'me qo'mi qo'yeteque. 'Uo ga'me ua'a onaĝaic ga'me qa'nenaguec, nataq'aen 'uo ga'me ua'a ja no'en ga'me qa'nenaguec. Mate mane'e ja'aĝataqatac da'me eja, qo'mi qo'enapegalo qovinaĝanaĝayaqa.

⁹ Mate mane'e yataqachiñe qo'mi qoyateto'n, qalaĝaja qo'mi qo'yeteque da'me ena'am ta'le qo'mi yaqa'alo. Nach'e eta't qo'mi dajo'toto da'me qadeleuaĝa, qalaĝaja maliaĝa qadec'aletaye. Qo'mi qoye'uaĝa'n, qalaĝaja ja qo'mi 'te qoyala't.

¹⁰ Ena'am ta'le qo'mi totelo'te, qalaĝaja nach'e eta't qo'mi made'tape. Ena'am ta'le qo'mi choĝodache, qalaĝaja qayoĝode' gaa'me jenaĝa neuoyaĝadi. Ena'am ta'le qaya'te jauanaĝa, qalaĝaja joote yema jauanaĝa.

¹¹ Ami yaqaya'olqa Corinto laje' 'me p'etaqadaiquipi, yataqachiñe qaya'te lale'gue da'me qadojaĝac nale ami jojaqatapegue'to, nataq'aen 'nouatedaye naa'me qadai'li.

¹² Qo'mi jalcote ami qadoqopitalo, qalaĝaja ami ja aualoqoichichigui da'me a'viyelaĝachiyeguet qaedi qo'mi auañema da'me adoqopich'i.

¹³ Chane'eja ami ñachoĝodenoto, ena'am ta'le jayem adet'ai: ¡'noota qom jayem adoqopichiya, nach'e naq'aeta da'me ami joqopitalo!

Jogaa'me ja nalo'ta't 'me necoñeda't

¹⁴ 'Noota qom qaya'te gamachaqaega aualequiyoue 'me 'lonataqa gaa'me jo'ne ja quetegue ñe'me Cristo. Ga'me 'noota ja qoyaqanatet ta'le qoyapeteneguet ga'me ja no'en. Nach'e ena'am ja yaqanatet ta'le 'uaĝayet ga'me yoqochiñe ga'me 'lalaĝa.

¹⁵ Ja naqaeda ta'le Cristo nataq'aen payac 'uo da'me neuotena't, nataq'aen ñe'me jo'ne quetapegue' ñe'me Cristo ja yiyaĝanaĝatapec laqaya ga'me jo'ne ja ena'am.

¹⁶ Qo'mi mach'e 'lemec ñe'me Dios jo'ne nec'aletaye, nataq'aen ta'le Dios qo'mi uetauelo, qama'le ja jenaĝa qadeloĝot ga'me ch'e nequi'i. Qa'a mach'eñe ñe'me Dios enaac: “Jouetauelo jenjo' yalaqapi nataq'aen jequetauelo jogaa'me. Jayem Nedios qama'le yalaqapi qomle jogaa'me.”

¹⁷ Qo'che' nach'e ena'am enaac ñe'me Jaliaĝanec: “'Noota qom auachiyoqoitouelo jogaa'me da'me oquiya'ae. Ena'te auepochi gamachaqaega jo'ne paĝachigui, Qama'le ami jaconegueta.

¹⁸ Jayem Adet'ai qomle qama'le ami yalaqapi qomle nataq'aen yalelpi. Dojo' jayem ja'aeñi, jayem Anedios 'me ñapacalegue ena'uac.”