2 Corintios 5 - Nuevo Testamento Toba Sombrero Negro

Joga'me 'lachaqa' joñe'me Dios

¹ Yataqachiñe jayatenaq queda'me jenaqa'am ga'me emec jo'ne ch'e nomachaĝaiqui, jo'ne yovita ga'me nolo' nale qonejoyeñe joga'me. Qalaĝaja 'uo ga'me qat'achaqa' di'me piyem, jo'ne ja ch'e jiyaĝaua 'lonatac nataq'aen ja yitaĝa pal, qa'a nach'eñe ñe'me Dios 'lonatac.

² Queda'me cha'li jouaqa'ta jena'me aleua, 'uo da'me qadediajoĝo ga'me qat'achaqa' laqaya jo'ne nale'en jonaqa'ña qomle.

³ Jayatenaq qom jonaqa'ña di'me male qo'mi machidiñe q'ae'n, qa'a male qo'mi qonetelalo, ja qo'mi 'te jale'taguelo.

⁴ Tamaliaĝa cha'li jouaqataue jena'me qat'emec 'me nach'ena qadapat, 'uo da'me qo'mi totelo'te nataq'aen qadeliñi. Ja naqaeda ta'le jetaque qadeleu, dite da'me jepagaqatapega ta'le qoyeleguemaĝat da'me toijec qat'oyaĝac, qaedi da'me qat'oyaĝac qoyen ta'ya ga'me 'noyaĝac nec'aletaye 'me ja yitaĝa pal.

⁵ Qama'le ñe'me Dios nach'eñe qo'mi yaqataĝata'ajalo qaedi jaconaĝaguet da'me dojo' qo'mi qoyeleguemaĝa't, qama'le queda'me qo'mi yanema ñe'me Lepaqal 'me ja 'nalegue, nach'eda en di'yoq da'me naq'aeta qomle da'me ya'uo.

⁶ Qo'che' nach'e eta't qo'mi made'tape. Jayatenaq queda'me qom cha'li qo'mi netayelo da'me qanejiyaĝauayaĝac, maliaĝa qaya'a ñe'me Jaliaĝanec.

⁷ Qalaĝaja yataqata jep'iyaqa joñe'me, mate mane'e ja jauanaĝa.

⁸ Ja lichiguilo naa'me qadai'li, mate mane'e jepagaqa'tapega ta'le qolaqa'e da'me qanejiyaĝauayaĝac qaedi jec'otaĝa ñe'me Jaliaĝanec qama'le nale'en jouaqa'tajop.

⁹ Qo'che' nach'e eta't joqochaĝa joñe'me, qom cha'li jouaqa'tena, uotaĝa qom qolaqa'ena nach'e ena'am.

¹⁰ Qa'a ena'uaque qo'mi jajoyaqa'aguet qomle ñe'me Cristo, jo'ne nach'eñe qanec'atenoqo't. Nach'eñe nimitapiye qomle gaa'me qat'onataqa, qama'le qo'mi yanema ga'me qanejetenaguec qom qadalo'taguet, uotaĝa qo'mi yanema ga'me qane'uaĝanaguec.

Cristo qo'mi yovidaĝateda'a da'me ena'am ta'le qanaigaĝaua ñe'me Dios

¹¹ Qa'a joote jayatenaq queda'me 'noota ta'le joqochaĝa joñe'me Dios nataq'aen da'me 'ñonaĝataĝaye. Qo'che' ja'aedenaqatac da'me ñauegaĝala'ajalo jo' gaa'me jiyaĝa'u laqaya' qaedi nach'e ena'am p'iida'a joñe'me. Ñe'me Dios yataqachiñe qo'mi yateto'n, qama'le jepaquetapega ta'le nach'e ena'am da'me ami yataqachiñe qo'mi auatetoñi'.

¹² Da'me qo'mi, ja naqaeda ta'le jetaque ami ñi'yoĝodenaqatapelo'te, dite da'me jepagaqatapega ta'le 'uo ga'me auachiyoĝochiyaye jo'ne ena'am ta'le qo'mi ani'yoĝodeñitapiyelo. Qama'le naq'aeta da'me auayachiñe ta'le a'uachiyegueta gaa'me jo'ne eetapela'ajalo p'ajodaye, qama'te ja ejoda.

¹³ Qom aueñetapega qo'mi jalaĝayaqa, nach'eda naq'aeta qa'a jetaque jo'onataĝanaĝauo'o ñe'me Dios. Qalaĝaja qom ja naq'aeta ga'me qo'mi auec'achiñiyeque, qama'le nach'eda naq'aeta qaedi ami ua'ajopa ga'me adiyamaĝaqui.

¹⁴ Joda'me loqopich'i ñe'me Cristo napacalegue da'me qat'oyaĝac. Jayatenaq queda'me ena'uac nep'aĝanegueta ca'li yeleu ñe'me, chane'eja ena'am ta'le ena'uaque qo'mi joote qadeleu.

¹⁵ Chane'eja qom Cristo yeleu queda'me qo'mi nep'aĝanegueta, qama'le 'noota qom da'me qat'oyaĝac ja yitaĝa ena'am ta'le mach'ega nec'aletaye, dite ñe'me Cristo, jo'ne yeleu ca'li nataq'aen 'niyelaĝajeguem qaedi qo'mi yanema da'me qat'oyaĝac jo'ne dalaĝaic.

¹⁶ Chiyoqotelegue nayi ja yitaĝa jenaĝa lajo'vi ga'me ch'e qadec'atenaĝanaĝac jo'ne aleua le'ec. Mate mane'e naq'aeta ga'me jec'atenaĝac ca'li ñe'me Cristo, male ja yitaĝa jauoqo da'me dojo'.

¹⁷ Nayi yataqachiñe qademe'teguet ñe'me Cristo, qo'mi jo'ne dalaĝaic da'me qa'netaguec. Ñe'me Dios male ja yitaĝa qo'mi yec'ateneque ga'me toijec qat'oyaĝac, dite da'me qo'mi yanema da'me qaedi jaconaĝaguet da'me dalaĝaic qat'oyaĝac.

¹⁸ Yema da'me dojo' chiyoĝoguet ñe'me Dios; joca'li ena'am ta'le qadauteua ñe'me Dios, qalaĝaja nayi Cristo qo'mi yovidaĝateda'a da'me ena'am ta'le ñaigaqatapegue' ñe'me Dios. Nataq'aen qo'mi yanema da'me dojo' qat'onataĝanaĝac qaedi ga'me jiyaĝadipi qoye'n naequetedapegue' joñe'me.

¹⁹ Chane'eja ja'aĝataqatac da'me dojo' onaĝaic 'naqataĝanaĝac yema jena'me aleua: ñe'me Cristo nach'eñe chiyaqayi da'me qoyapalaĝa't jodaa'me qadoeco, nataq'aen ena'uac yanema da'me 'nemaĝac.

²⁰ Chane'eja nach'e qo'mi lamaĝa's ñe'me Cristo qaedi ja'aĝataqatac joñe'me, nataq'aen ena'am ta'le nach'eñe ñe'me Dios ami nachoĝodetapecoto qaedi anaquiaĝañiya da'me qat'aqataĝanaĝac. Qama'le ñe'me Cristo qo'mi 'yelopeque da'me ami ñachoĝodenaqatapecoto qaedi auacoñiyeguet da'me 'lemaĝac ñe'me Dios jo'ne ami yanema.

²¹ Ñe'me Cristo yataqata qaya'te loec ca'li, qalaĝaja Dios 'yetem da'me ena'am ta'le loeco lo'o, qaedi Cristo qo'mi yovidaĝateda'a da'me ena'am ta'le qaya'te qadejamaĝataĝac.