2 Corintios 4 - Nuevo Testamento Toba Sombrero Negro

Jogaa'me 'yaĝatetedac ñe'me Jesucristo

¹ Qo'che' ja qadoual, qa'a ñe'me Dios jo'ne choĝodenataĝanaĝaic qo'mi 'yelopeque jenjo' 'nonatac.

² Qaya'te gamachaqaega ta'le janomaĝaguet da'me qadepocoĝo, uotaĝa joĝotaqatapiñi ga'me qat'onatac. Ja jauoqo da'me ta'le joqovinaq ga'me jiyaĝadipi uotaĝa jaeyaĝanaq da'me 'laqataĝanaĝac ñe'me Dios. Ja naq'aeta, dite da'me nach'eñe ñe'me Dios qa'naĝatoqo't queda'me onolec da'me eja ñenaĝataĝaye. Qo'che' ena'uaque qo'mi qop'eteque.

³ Gaa'me jo'ne ja yaqanate't ta'le yayate'n da'me onaĝaic 'naqataĝanaĝac jo'ne ja'aĝataqatac, nach'egaua jo'ne ja nec'aledegue.

⁴ Da'me onaĝaic 'naqataĝanaĝac qo'mi 'yaĝatema da'me 'lonaĝac ñe'me Cristo, nataq'aen Cristo p'ayet da'me qo'mi yaloĝonalo da'me 'lonaĝac joñe'me Dios. Dojo' 'naqataĝanaĝac ena'am jaga'me coyadaĝanaqate da'me laqaselegaĝac; qalaĝaja gaa'me jo'ne ja p'iida'a ja yaqanate't da'me yec'ate'n, qa'a ñe'me Satanás ja yaje'tema.

⁵ Nale japaĝaguenataĝanaq ja mach'e qo'mi ñapaĝaguenaqatapela't. Ja naq'aeta, dite da'me ja'aĝataqatac queda'me Jesucristo mach'e Qadejaliaĝanec, nataq'aen naqaqo'mi ami ñechataqata'ñijopa da'me ami yecochaĝalo, qa'a qolaĝague joñe'me Jesucristo.

⁶ Ca'li Dios ye'et jena'me aleua, enaac: “'Noota qom 'uo da'me laqaselegaĝac ga'me yoqochiñe jo'ne nayi 'uo ga'me 'lalaĝa.” Qama'le ca'li qo'mi yaje'tema da'me jayatenaq da'me onaĝaic 'naqataĝanaĝac, nach'e ena'am yecoyadelegue da'me qadetadenataĝanaĝac, qaedi male jatetonaq da'me 'lonaĝac ñe'me Dios 'me chiyoqotelegue na'me latajoĝoc ñe'me Cristo.

⁷ Ca'li Dios qo'mi yanema da'me onaĝaic 'naqataĝanaĝac, nach'eda neuoyaĝac onaĝaic jo'ne uetaue da'me qat'oyaĝac, jenaqa'am jaga'me taĝaiqui 'me ch'e aleua, qaedi yaloĝon da'me dojo' nañoqotaĝanaĝac jo'ne chiyaqayi ñe'me Dios, qama'le ja naqaqo'mi ta'le mach'e chiyaqayilo queda'me ja qo'mi 'te t'añi'y.

⁸ Qo'che' mate mane'e qayoĝode' gaa'me laqalaico jo'ne jaĝauelo, qalaĝaja ja qadoual. Uo'oe gaa'me mach'e jachetataqatapalo, qalaĝaja ja japalaĝataqa'ta da'me qat'emaqata.

⁹ Qo'mi yachoĝode'tape ga'me jiyaĝadipi, qalaĝaja Dios ja qo'mi 'te yegue'm. Qo'mi yejaĝadiñe, qalaĝaja ja qo'mi 'te yapalaĝa't.

¹⁰ Gamachaqaega jec'otaĝa, da'me qat'oyaĝac nach'e eta't jachoĝojoqotac da'me leleuaĝa ñe'me Jesús, qaedi nach'e ena'am da'me 'loyaĝac ñe'me qo'mi di'yoĝoma.

¹¹ Qa'a qo'mi, queda'me maliaĝa qadec'aletaye, nataq'aen queda'me joqochaĝa joñe'me, nach'e eta't qo'mi dajo'toto da'me qadeleuaĝa, qaedi da'me 'loyaĝac joñe'me nach'e ena'am di'yoĝoma da'me qat'oyaĝac jo'ne ja t'añi.

¹² Chane'eja, mate mane'e yeleeta da'me qat'oyaĝac, qalaĝaja ami, male auacoñiyeguet da'me at'oyaĝaqui 'me dalaĝaic.

¹³ Daa'me nedii's jo'ne qoyedidiñe ca'li eet'oi: “Jep'iya'a ca'li ñe'me Dios, qo'che' nayi male jojetac.” Qo'mi nataq'aen jep'iyaqa ñe'me Dios, qo'che' ja'aĝataqatac da'me onaĝaic 'naqataĝanaĝac.

¹⁴ Qa'a jayatenaq qom qadeleu, Dios qo'mi 'niyelaĝachidijeguem, nach'e naq'aeta da'me 'yetem ca'li ñe'me Jesús, qama'le nach'e ena'am ami da'me 'niyelaĝachidijeguem, qama'le jec'otaĝa ñe'me qomle.

¹⁵ Ena'uac da'me dojo' 'uo qaedi chiyaqayi da'me liyamaĝac joda'me at'oyaĝaqui, qa'a qom qayoĝode' gaa'me yacoteguet da'me loqopich'i ñe'me Dios nataq'aen da'me lichoĝodenataĝanaĝac ñe'me, qama'le uoja'aegaua qayoĝode' yate'm da'me lamai'j ñe'me qomle nataq'aen yatetoteguet da'me 'lonaĝac ñe'me.

¹⁶ Qo'che' ja qadoual. Mate mane'e ga'me qadapat ena'am ta'le nemetapiñi, qalaĝaja ñe'me qadepaqal nach'e eta't nichique'tague da'me nadalaĝac.

¹⁷ 'Uo ga'me qalaqa't jo'ne qo'mi 'uaĝayeta nale qalaĝaja nach'enaua uo'oe jo'ne ja let'adayaqa, nataq'aen ja nale'en uo'oe jogaa'me. Ena'am ta'le qadamaic janemaĝam joga'me qa'a Dios qo'mi e'n najaqachiguilo da'me 'lonaĝac jo'ne ja yitaĝa yem nale'en 'uo: 'lonaĝac jo'ne yataqachiñe let'adaic nataq'aen onaĝaic.

¹⁸ Qa'a qo'mi ja jenaĝa diyachitapiyelo naa'me qadai'li qa'a jouaĝat ga'me 'uo jo'ne ualegue da'me qat'oyaĝac nayi, qa'a ja cop'a qom qaya. Dite da'me qanedotela't jouaĝat ga'me di'yoĝom da'me qat'oyaĝac qomle da'me daja' piyem. Nayi ja jayatenaq ga'me 'noyaĝac qomle; da'me eja jayatenaq queda'me ja yitaĝa 'naidena'a qomle.