2 Corintios 3 - Nuevo Testamento Toba Sombrero Negro

Dios yadalaĝat ga'me qadadic qaedi jaqanatetaq ta'le jec'otaĝa joñe'me

¹ Da'me ñenaĝataĝaye yema da'me dojo', ja naqaeda da'me mach'e ñaĝata da'me ñiyamaĝadenaqatapela't. Nach'e ena'am ja jauoqo'oe ga'me qadediijel jo'ne uedalegue da'me qa'naĝatapela't, nataq'aen ja ami 'te jamaĝajoĝolo'te da'me auauoyapiye naa'me adediijel qaedi jaqanatetaq ta'le jec'otaĝalo ga'me jiyaĝa'u laqaya'. Uo'oe ga'me naq'aeta da'me yauote qa'a youetedaque da'me dojo', qalaĝaja qo'mi ja naq'aeta.

² Qom ga'me jiyaĝadipi jetaque qo'mi yi'yoĝode'tape, nach'edata da'me ami qoyec'ate'n, qama'le da'me qaniyamaĝadenataguec naqa'ami chiyaqayilo, jo'ne ena'am ta'le ami qadediijel jo'ne qoyachauelo naa'me qadai'li. Qama'le jaga'me nediije qaya'te laqalaic ta'le yauata ena'uaque ga'me jo'ne jetaque yauata.

³ Cristo nach'eñe yediñe; yem qama'le qo'mi janaĝaye. Da'me onaĝaic liyamaĝac da'me at'oyaĝaqui 'me Cristo ami yanema, nach'eda ami yec'ateneque jogaa'me da'me yauata. Male ja qoyedelegue ga'me qa' dite naa'me qadai'li, uotaĝa jaga'me nedaĝanaqate jo'ne 'uo ga'me li'i, dite ñe'me Lepaqal ñe'me Dios jo'ne nec'aletaye.

⁴ Queda'me jep'iyaqa ñe'me Dios, ena'uac da'me dojo' yataqachiñe eja jo'ne chiyaqayi ñe'me Cristo.

⁵ Ja naqaeda ta'le mach'e qo'mi jaqanatetaq qadalo'oguet je'etaq ga'me mach'e qadoĝot; ja naq'aeta, dite da'me yema ga'me je'etaq nach'eñe ñe'me Dios chiyoĝoguet.

⁶ Nayi Dios qo'mi yaqataĝata'ajalo da'me yiyamaĝateta'ajalo qaedi jaqanatetaq ta'le ja'aĝataqatac da'me dalaĝaic yamaĝataĝac jo'ne qo'mi yanema joñe'me. Dojo' dalaĝaic yamaĝataĝac ja chiyaqayilo gaa'me namaĝajoĝonaĝaco, dite ñe'me Lepaqal joñe'me Dios. Qa'a da'me namaĝajoĝonaĝaco yepoleguelegue da'me leleuaĝa ga'me jiyaĝaua loeco lo'o, qalaĝaja ñe'me Lepaqal ñe'me Dios qamqa'me yanegue da'me 'noyaĝac.

⁷ Dios yedelo'te ca'li gaa'me qadi da'me yedidiñe gaa'me lamaĝajoĝonaĝaco, qama'le yanema ñe'me Moisés. Mate mane'e gaa'me namaĝajoĝonaĝaco 'yaĝatetedac da'me qadeleuaĝa qa'a jouaĝa't joga'me qadoeco, jojo' nolo' yataqachiñe p'ajaye ca'li, chayovida'a da'me 'uo da'me laqaselegaĝac ga'me latajoĝoc ñe'me Moisés ca'li. Nataq'aen ga'me laqaselegaĝac yataqachiñe 'uo da'me 'lañaĝac qama'le ga'me israelpi ja yaqanate't ta'le dajoeda'aguet ñe'me Moisés ta'le yec'ate'n. Qalaĝaja ga'me lauaqayaĝac ja cop'a ca'li paja'a yitaĝa pal.

⁸ Qalaĝaja yataqata yaguegue ga'me lauaqayaĝac qom qo'yaĝatetac da'me dalaĝaic yamaĝataĝac, nach'eda da'me jo'ne chiyaqayi ñe'me Lepaqal ñe'me Dios 'me ja 'nalegue.

⁹ Queda'me p'ajaye ga'me nolo' ca'li qoyadegue gaa'me namaĝajoĝonaĝaco jo'ne 'yaĝatetedac da'me qadeleuaĝa, qama'le yataqachiñe p'ajaye da'me qo'yaĝatetac da'me qo'mi qo'yaneque da'me qaya'te qadaviyaĝajet.

¹⁰ Qama'le ¡yataqachiñe p'ajaye, napacalo'te ga'me 'lonaĝa'j daa'me namaĝajoĝonaĝaco!

¹¹ Chane'eja, queda'me 'uo da'me li'yoĝodi'j daa'me namaĝajoĝonaĝaco jo'ne ua'edi yovidalegue qoyapalaĝat, ¿qo'li ja p'ajaye da'me li'yoĝodic da'me onaĝaic 'naqataĝanaĝac jo'ne 'yaĝatetac da'me nec'alaĝa 'me ja 'naidena'a?

¹² Yema da'me dojo' yataqachiñe jenaĝa eja, chane'eja ja qat'oyalegue da'me ja'aĝataqatac.

¹³ Ja jadenaĝataq di'me Moisés, jo'ne yapadelegue ga'me ualoq ga'me latajoĝoc qaedi ga'me israelpi ja yauachidigui da'me ta'ta't da'me laqaselegaĝac ga'me latajoĝoc.

¹⁴ Jogaa'me ja yayate'n da'me dojo'. Chayovida'a nayi, nale yec'ate'n naa'me nedii's jo'ne 'yaĝa't da'me 'uaechiñe yamaĝataĝac, ena'am ta'le 'uo ga'me ualoq jo'ne yapadelegue da'me layatenaĝanaĝa'j. Yataqata ja yaqanate't ta'le yayate'n, qa'a nach'eñeta ñe'me Cristo 'me yaqanatet ta'le yayatenaĝaneque.

¹⁵ Qo'che' chayovida'a nayi, nale yec'ate'n gaa'me ledii's di'me Moisés, ja yayate'n, ena'am ta'le yapadelegue ga'me ualoq ga'me letadenataĝanaĝa'j.

¹⁶ Qalaĝaja qom 'uo ga'me 'viyeloqot ñe'me Jaliaĝanec, qama'le yiyaĝanaque da'me nichoĝodenataguec, male yovida'a da'me yayaten. Ena'am ta'le qonaqa't ga'me ualoq jo'ne yapadetalegue da'me letadenataĝanaĝa'j.

¹⁷ Qa'a ñe'me Jaliaĝanec nach'eñe ñe'me Dios Lepaqal 'me ja 'nalegue; ga'me ue'ta ñe'me Lepaqal 'me ja 'nalegue, 'uo da'me 'nemaĝac.

¹⁸ Qama'le qo'mi ja qo'mi 'te netayelo ga'me ualoq jo'ne yapadelegue na'me qadatajoĝoc. Jenaqa'am ga'me c'atenaĝanaĝaqui jo'ne yaloĝon da'me 'lonaĝac ñe'me Jaliaĝanec, nach'eñe neleguemaĝat da'me qat'oyaĝac qama'le ñichigaqa'ta da'me jenaqa'am joñe'me, yajouaĝat da'me qo'mi t'onataĝanouelo ñe'me Lepaqal 'me ja 'nalegue.