2 Corintios 2 - Nuevo Testamento Toba Sombrero Negro

¹ Qo'che' cha'li ja ja'uo 'te yejapichaĝac laqaya da'me ami jec'atalo, qaedi ja totelo'te q'ae'n.

² Qa'a qom ami je'n totelo'te q'ae'n, qama'le ¿jach'e jogamaĝa jayem yanem da'me yamaic, qom ja naqa'ami, queda'me ami je'n totelo'te q'ae'n?

³ Qo'che' ami jedenaqatenalo ga'me yediijec, naq'aeta ga'me ja'uo ca'li, qa'a ja jetaque ami jec'atalo qaedi ja jayem 'te a'vichiyigue da'me jayem totelegue, jo'ne naqa'ami chiyaqayilo da'me yamaic. Yataqachiñe jayateta queda'me ami ena'am adoĝochi da'me mach'e yamaic,

⁴ qalaĝaja ca'li ami jedenaqatenalo ga'me yediijec, yataqachiñe jayem totelegue, lichigui jena'me yeuel chayovida'a ñoyetac. Ja jetaque ami totelo'te q'ae'n, qalaĝaja eja jetaque auayachiñe da'me yataqata jalcote da'me ami joqopitalo.

Jichoĝodenaq ga'me jo'ne ja no'en da'me qo'mi 'yeteque

⁵ Da'me dojo' 'uo ja jetaque yaguegue q'aen, qalaĝaja ga'me jiyaĝaua jo'ne chiyaqayi da'me jayem totelegue nach'edi yovideta da'me nach'e ena'am ami totelo'te ena'uaque ami.

⁶ Qalaĝaja qayoĝode' ami joote nalo'taguet ga'me auañem 'me ena'am ta'le ne'uaĝanaguec ga'me jiyaĝaua.

⁷ Nayi 'noota qom avichoĝodeñi nataq'aen alecochiiya qaedi machiñe q'aen, qa'a uotaĝa yeleuapeguem da'me jalcote totelegue nataq'aen netotepela't.

⁸ Qo'che' ami ñachoĝodenoto qaedi aualoĝoñiya da'me yitaĝa adoqopichiya.

⁹ Jaga'me yediije jo'ne ami jedenaqatenalo nach'edata da'me jetaque jayaten qom oqui'teguelo nataq'aen auoqochiiyalo daa'me yoqotenaĝanaĝaco.

¹⁰ Chane'eja, gamachaqaega 'uo ga'me ami 'yeteque ja no'en qama'le avichoĝodeñi, nach'e ena'am jayem jichoĝoden. Qama'le jichoĝoden qom 'uo ga'me lejamaĝataĝac jo'ne nalo'taguet da'me qoyichoĝodenec. Ja'uo da'me dojo' qa'a jouaĝat ami nataq'aen jenaq qa'naĝatoqo't ñe'me Cristo,

¹¹ qaedi ja yepitaqatenac ga'me qo'mi 'yeteque ñe'me Satanás, qa'a joote yataqachiñe jatetona' naa'me ja 'noe'n lelnataĝaco.

Da'me jalayaĝac jena'me jenjo' 'nonataĝanaĝac

¹² Ca'li jec'ata di'me noic jo'ne Tróade qaedi ja'aĝatetac da'me onaĝaic 'laqataĝanaĝac ñe'me Cristo, yataqachiñe qo'youategue ga'me yadic qaedi jepitaqatenac da'me je'et da'me 'lonatac ñe'me Jaliaĝanec.

¹³ Qalaĝaja ja machiñe q'aen na'me yeuel, queda'me ja jauana ñe'me qadaqaya Tito. Qo'che' jep'iye'tape da'me jeca'ae ca'li jogaa'me, qama'le jec'ata di'me aleua jo'ne Macedonia.

¹⁴ Jalcote janem da'me yamaic ñe'me Dios queda'me qo'mi yapetede'uo da'me lomataĝanaĝac ñe'me Cristo, nataq'aen queda'me qo'mi yanema da'me ja'aqataĝanaqatapema ena'uaque gaa'me ale'u lael da'me 'laqataĝanaĝac qaedi naq'aeta da'me ena'uaque yateto'n ñe'me Cristo. Ja'aĝataqatac da'me onaĝaic 'naqataĝanaĝac ena'am ta'le jelagaĝataĝalegue ena'uaque gaa'me ale'u lael ga'me jama da'me laetayaĝac ena'am ga'me yoĝoqui jo'ne davioĝon.

¹⁵ Qa'a naqaqo'mi jenaqa'am ga'me jama da'me laetayaĝac jo'ne nach'e Cristo yanem ñe'me Dios, qama'le yataqata uayoĝonegue da'me laetayaĝac, yovida'yalo jogaa'me joote nec'aledegue nataq'aen jogaa'me maliaĝa uetedaue da'me lejomaĝa'j.

¹⁶ Qalaĝaja gaa'me ja p'iida'a ñe'me Cristo, jenaqa'am ga'me laeta jo'ne dalataĝanac; gaa'me qonec'alaĝatedegue qamqa'me, jenaqa'am ga'me laeta jo'ne chiyaqayi da'me 'noyaĝac. Qama'le ¿jach'e ga'me yaqanatet ta'le yepaque'teguelo yauo'oe da'me dojo' 'nonatac jo'ne qo'mi yamaĝalo'te ñe'me Dios?

¹⁷ Qo'mi ja naqaeda ta'le jauoqo lajo'vi da'me 'laqataĝanaĝac ñe'me Dios, jo'ne qayoĝode' naq'aeta da'me yauote; ja naq'aeta, dite da'me Dios qo'mi yauanalo queda'me qaya'te jenaq lale'gue da'me ja'aqataĝanaqatac, qa'a nach'eñe ñe'me Dios qo'mi lamaĝa's nataq'aen qa'a yataqachiñe qademe'teguet ñe'me Cristo.