2 Corintios 12 - Nuevo Testamento Toba Sombrero Negro

Daa'me lauanaĝanaĝaco joñe'me Pablo

¹ Qaya'te 'lomataĝanaĝac ga'me mach'ega 'nonaĝa'tape naa'me 'laqataqa, qalaĝaja youetaque ta'le ja'uo da'me dojo'. Chane'eja nayi ami ja'aĝatema ga'me yauanaĝanaĝac jo'ne jayem qoyanem, ga'me jo'ne Jaliaĝanec Jesucristo jayem yatetonaĝanec.

² 'Uo ñe'me jateton jo'ne jalchi'ena quetapegue' ñe'me Cristo, yenoĝodegue nayi catorce 'uoidi da'me qoyauegue di'me yataqachiñe p'ajeguem piyem. Ja jayaten ta'le nec'aletaye da'me qoyauec, uotaĝa ga'me lepaqal; Dios yayaten.

³ Qalaĝaja jayaten queda'me eja jo'me jojo' jiyaĝaua, uotaĝa lapat uotaĝa ch'e lepaqal —onolec ñe'me Dios yayaten—

⁴ qoyauega di'me piyem 'me qoyen 'lachaqa' jena'me qonec'alaĝategue, ua'a da'me domachiyalo gaa'me 'naqataqa jo'ne ja domachiyapegalo jo'ne ja qoyajeta ta'le gamachaqaega jiyaĝaua yadenaĝa't jogaa'me.

⁵ Jayem 'uo da'me ñi'yoĝodenaĝac da'me naq'aeta jiyaĝaua 'me jauana, qalaĝaja ja naqaeda ta'le mach'e jayem, qa'a jayem nach'edata jaqanatet ta'le ja'aĝa'tape da'me yachoĝolaĝaco.

⁶ Qa'ejo' da'me mach'e ñiyamaĝadetapela't ja naqaeda da'me nichiyoĝojoĝoc, qa'a ja'aĝatetac da'me eja 'me 'yoyaĝac. Qalaĝaja ja ja'uo da'me dojo' qa'a ja jetaque 'uo ga'me en lelnataĝac da'me ñapacapelegue da'me mach'e 'yoyaĝac uotaĝa da'me yojaĝac,

⁷ uotaĝa gaa'me Dios jayem yaloĝonalo 'me 'uo da'me 'lonaĝa'j. Qo'che' qaedi ja jayem 'te najaqachigui da'me ñi'yoĝodenaĝac, 'uo da'me jayem qoyanem 'me nayaliaĝac: ena'am ta'le Satanás jayem yejoguec jaga'me yaĝat jena'me yapat qaedi ya'uo yachoĝodec.

⁸ Tres jiyaĝatapecot ñe'me Dios qaedi naqat ga'me ya'uo yachoĝodec,

⁹ qalaĝaja Dios jayem 'yateguet: “Da'me yichoĝodenataĝanaĝac nach'edata 'me nalo'taguet yema 'me auouetaque. Da'me yañoqotaĝanaĝac naloĝonoue da'me nachoĝolaĝa.” Chane'eja jayem en ñi'yoĝodetapela't da'me qaya'te 'yañaĝac, qaedi da'me lañoqotaĝanaĝac ñe'me Cristo jayem di'yoĝom.

¹⁰ Nach'e ena'am jayem matac q'aen gaa'me yachoĝolaĝaco, da'me jayem qoyojouetac nataq'aen jayem qoyecaatac nataq'aen da'me uo'oe gaa'me youenaĝanaĝaco laqalaico 'me jayem nauateguet nale queda'me yataqachiñe jequegue ñe'me Cristo. Qa'a da'me chiyaqayi da'me jayem 'uañaĝaic q'aen nach'eda jatetoneguet da'me yachoĝolaĝac.

Pablo nach'e eta't uenate'talo jogaa'me lepi'iyaĝa'u

¹¹ Jayem ena'am ta'le je'n jalaĝayaqa't da'me 'yoyaĝac, qalaĝaja ami jayem auaviquiyigue da'me dojo' qaedi ja'uo. Jayem 'uo da'me jañoqotet ena'am gaa'me eetapela'ajalo namaĝa's p'ajodaye, chane'eja naqa'ami toqo' da'me jayem a'nonaĝachigui.

¹² Ga'me yachoĝodeco ñapogaĝadetegueta da'me ami jouetauelo, gaa'me di'yo't nañoqotaĝanaĝaco 'me ja qoyauanapegalo, nataq'aen gaa'me uo'oe jo'ne 'uo da'me 'lonaĝa'j jo'ne je't 'me chiyoqodayi da'me lañoqotaĝanaĝac ñe'me Dios, nach'edaua di'yoq q'ae'n da'me jayem yataqatelegue lamaĝajec ñe'me Jesús.

¹³ Jalgata onolec ga'me maliaĝa ja auauoyi, jo'ne joote yauote ga'me p'etaqadaiquipi: ¡ami ja jayem 'te alecochaĝanaĝañiyeguet ca'li jaga'me anaicauai! ¡Jayem avichoĝodeñi! Uotaĝa mach'e yaviyaĝajet queda'me ja ami 'te ja'aĝatema da'me dojo' qaedi jayem alecochiiya.

¹⁴ Nayi joote ñiyamaĝateta't qaedi ami jejapichiyalo nayi tres ami jec'atalo. Temaqaedita nayi ja ami 'te jiyaĝatapecoto qaedi jayem auañem jaga'me laicaua da'me jayem alecochiiya. Mach'e ami da'me jen p'ajaye q'aen, ja naqaga jaga'me laicaua; qa'a naqaegaua gaa'me net'al yapetetapega't nale jaga'me laicaua qaedi yanema jogaa'me c'oqo'te, ja naqaegaua gaa'me nec'oqo'te yauote da'me dojo' qaedi yanema gaa'me let'al. Qama'le ami mach'e yalaqapi.

¹⁵ Qama'le da'me jayem ja'amaqaten da'me yema jo'onataĝana ga'me jo'ne jauana, chayovida'a da'me mach'e 'yoyaĝac jo'onataĝanaĝa, da'me ami yecochiyalo. Da'me yataqachiñe jalcote ami joqopitalo, qama'te ami ¿toqoch'e ja yataqachiñe jayem adoqopichiya?

¹⁶ Da'me ami joote auayachiñe queda'me ja jetaque diyachitapiyelo naa'me adai'lidi' jouaĝat da'me jetaque jayem auañem jaga'me anaicauai. Qalaĝaja uo'oe gaa'me jo'ne eetedapega ja ñaqala'te da'me ami je'n ta'ñgui jaga'me yapogoqotaĝanaĝaiqui da'me ami joqovi'n.

¹⁷ Qalaĝaja ja ami 'te joqovi'n queda'me uo'oe gaa'me jiyaĝa'u 'me ami jedenaqatenalo.

¹⁸ Ca'li jojapegue' ñe'me Tito nataq'aen qadaqaya chiyaqauelo joga'me p'etaqadaiquipi qaedi ami yec'atalo, joga'me ja naqaeda ta'le yepitaqateda'a ga'me mach'e yauote qaedi ami ye'ue'n. ¿Qo'li ja eja da'me Tito nataq'aen jayem nedo'ta't da'me qadajoĝoc? ¿Qo'li ja nedo'ta't jodamaĝa qadelnataĝac da'me jenataqatapega da'me dojo'?

¹⁹ Uotaĝa auepíchitapega da'me ami ñachoĝodenaqatapegouelo qaedi qo'mi avichoĝodeñi, qalaĝaja ja naq'aeta. Qo'mi jouaqa'tot ñe'me Cristo, nataq'aen ñe'me Dios mach'e yayaten yema ga'me jo'ne ja'aĝataqatac. Ami qadaqaya'olqa, yema ga'me jo'ne joote je'etaq, ga'me joote jauoqo da'me ami yecochaĝalo, qaedi nichiquetajeguem da'me yataqachiñe auep'iiya'a ñe'me Cristo.

²⁰ Jo'oyapega nale jenate'ta qom ami jec'atalo da'me ami jejapichiyalo, qama'te jauana ga'me at'oyaĝaqui jo'ne ja ja'amaqaten, nataq'aen jayem auañiya ga'me 'yoyaĝac jo'ne ja naqaega ta'le jetaque auañiya. Jo'oyapega ta'le ami jejomalo'te da'me aueloquitapega't, uotaĝa aualemataitapega't, 'uo da'me 'yotaĝac, nachinataĝanaĝac, novidaqataĝanaĝac, 'yoĝodenaĝac nataq'aen qaya'te niyamaĝa ami uetauelo.

²¹ Nach'e ena'am jo'oyapega nale jenate'ta, qom ami jejapichiyalo, ñe'me Ñedios janomeguet q'aen da'me yepocoĝo jouaĝat ami jo'ne chayovida'a ñoyen, qa'a jouaĝat gaa'me qayoĝode' ami jo'ne ja yaĝadiñi gaa'me loeco jo'ne 'ye'tape nataq'aen da'me yauote ga'me ja no'en choqoda'me quetedalegue da'me nequejeguetaĝa nataq'aen gaa'me namanaĝanaĝaco 'me napaĝaguenalo.