1 Timoteo 6 - Nuevo Testamento Toba Sombrero Negro

¹ Gaa'me jiyaĝa'u jo'ne onataĝanaĝayaqa, jalcote 'noota qom yataqata lecochiyalo gaa'me lejaliaĝanaqa uotaĝa yichoĝode'n nale, qaedi ja qoye'uetac joda'me lenaĝat ñe'me Dios, uotaĝa da'me qadapaĝaguenataĝanaĝac.

² Nataq'aen qom p'etaqadaic ga'me adadipa, yataqata auanem da'me adoqopich'i choqoda'me adichoĝodenataĝanaĝac, qa'a jenjo' mach'e adaqaya da'me 'uo ga'me adepe'e. Mac da'me a'uetec da'me yataqata alecochiya, qa'a jenjo' at'onatac nataq'aen qoyen 'lonatac, chiyaqa'alo jiyaĝa'u jo'ne p'iida'a ñe'me Dios, chane'eja 'noota ta'le yataqata aviyamaĝatetac ga'me aue'et. Daa'me daajo' 'noota qom yataqata auapaĝaguenataĝaneque nataq'aen auamaĝajoĝolo'te.

Da'me yataqata eja neuoyaĝac

³ Qom 'uo ga'me dapaĝaguenataĝaneque gaa'me mach'e lelnataĝaco jo'ne ja 'yamaqate'n da'me napaĝaguenataĝanaĝac jo'ne yataqata eja 'me chiyoqo'ot joñe'me mach'e Qadejaliaĝanec Jesucristo, chayovida'a ja yeuaten da'me mach'e qadepe'e ladic,

⁴ jenjo' jiyaĝaua yataqata 'yoĝodenaĝaic jo'ne yataqata qaya'te yayaten. 'Uo da'me loec da'me eetapega ja ena'ama gaa'me laqaya' da'me eetapega yema yayaten ga'me yelo'tagueta naa'me 'naqataqa; qama'le naqaena jenjo' chiyaqayi da'me nep'aguenataĝanaĝac, nojouena't, chayovida'a da'me male ja 'namaqatena't,

⁵ nataq'aen 'uo ga'me neloiquiaĝac jo'ne qaya'te loiquiaqa', qa'a male uo'oe gaa'me jiyaĝa'u jo'ne yaledeuo, eetedapega 'uo ga'me layatenaĝanaĝa'j, jiyaĝa'u jo'ne yataqata ja yateto'n da'me eja, nataq'aen naajo' eetedapega 'uo ga'me lepe'e', qalaĝaja nach'egaua ch'e yachiyoĝotedayi da'me leuoyaĝac jena'me 'noota ladic.

⁶ Yataqata 'noota da'me nepe'e ladic, eja nach'ega joga'me chiyaqayi da'me neuoyaĝac; qalaĝaja qoyiyamaĝaden qom jiyaĝaua nach'e eta't matac, 'nonaĝachigui joga'me ja let'adaic ga'me yauana.

⁷ Qa'a ca'li ñiyaĝañe, qaya'te ga'me qadi'yac, nataq'aen qomle qadeleu, qaya'te ga'me jachoĝojoq.

⁸ Qom 'uo ga'me jaliguinaq nataq'aen 'uo ga'me qadeuo lael, qama'le 'noota ta'le yataqata qo'mi made'tape.

⁹ Qalaĝaja jogaa'me jetaque neuoyaĝadi, yataqata ja naloteguet joda'me napiyenague'j, qama'le tadoue joga'me 'lonaĝanaĝaiqui joñe'me ja yataĝalegue, male ja onolec ga'me yepiteda'a, chayovida'a qom yataqata ja no'en. Qama'le nach'eda da'me dojo' yajouaĝa't gaa'me jiyaĝadipi da'me tadoue ga'me lachoĝode'j let'adaic nataq'aen jena'me neleuaĝa.

¹⁰ Qa'a da'me qoyen p'ajaye jana'me laicaua nach'eda chiyaqayi yema joga'me ja no'en. Qama'le joote uo'oe jogaa'me jo'ne e'n p'ajodaye jaga'me laicaua, qama'le yajouaĝa't da'me queda'e da'me lepe'e', nataq'aen joote yauata t'adaic lachoĝode'j.

Da'me onaĝaic 'lonataĝanaĝac da'me qadepe'e

¹¹ Qalaĝaja da'me am Dios nejoĝonec, 'noota ta'le oca'ae naa'me naajo' ja qoyiyamaĝade'n. Nach'e eta't auen yataqatelegue da'me anejiyaĝauayaĝac, auen yelo'ta joñe'me Dios, nataq'aen aua'uo da'me adepe'e, auaconeguet da'me adoqopich'i, da'me am 'uañaĝaicolec nataq'aen da'me yataqata am joĝodaic.

¹² Nach'e eta't aueloiquitapegue'to jogaa'me adoeco qa'a yataqata 'uo da'me adepe'e, nataq'aen qaedi ja anepaten da'me nec'alaĝa jo'ne qaya'te loiquiaqa'. Nach'ena jenjo' ca'li Dios am yiyaĝana, qama'le nayi yataqata eja da'me adepe'e jo'ne joote qoyec'atetac.

¹³ Qama'le da'me lec'atenaĝanaĝac ñe'me Dios jo'ne naqaeñe ya'uo 'loyaĝac yema ga'me uetalegue jena'me aleua, choqoñe'me Jesucristo jo'ne yataqata ja t'oiya'aguet ca'li joñe'me Poncio Pilato da'me 'yaĝatem da'me eja, qama'le nayi am jamaĝalegue

¹⁴ da'me oque'tegue jenjo' jo'ne am jaloĝona, ena'te aua'uo lale'gue, qaedi qaya'te adaviyaĝajet nataq'aen qaedi qaya'te a'naqataguec jo'ne ja no'en, chayovida'a qom yitaĝa 'niyelaq joñe'me Qadejaliaĝanec Jesucristo.

¹⁵ Male yovita qomle ga'me nolo' qom ñe'me Dios en di'yoq jena'me jenjo', qa'a naqaeñe onolec Jaliaĝanec jo'ne qaya'te loiquiaqa'; yataqata napacalo'te jogaa'me jaliaĝanaqa jena'me aleua, nataq'aen yataqata nejaliaĝatelo'te jogaa'me.

¹⁶ Nach'eñe onolec jo'ne qaya'te nalo'oguet, nataq'aen ga'me lejaliaqa' 'uo joga'me edañgui jo'ne nach'ega netaue, nataq'aen qaya'te yaqanatet ta'le davi'teguet. Maliaĝa qaya'te jiyaĝaua ta'le yauana joñe'me, nataq'aen ja qoyaqanatet qom qoyetapega qoyauana. Qama'le ¡'noota ta'le nach'eñe yelo'tot da'me qo'nonaĝachigui choqoda'me let'adaic lejaliaĝa! Jaja'a, nach'e naq'aeta da'me dojo'.

¹⁷ Qama'le jogaa'me 'uo da'me leuoyaĝa'j jena'me jenjo' aleua, a'uaĝatema qaedi ja 'yoĝodenaĝayaqa nataq'aen ja e'n 'te p'ajodaye ga'me yauata, qa'a da'me neuoyaĝac qaya'te chiyaqayi, mac da'me 'noota ta'le yate'm da'me leuataqataĝanaĝa'j joñe'me Dios jo'ne naqaeñe nale chiyoqo'ot yema joga'me jouenaqatac, qama'le en jalcote nale, qaedi yataqata qo'mi made'tape.

¹⁸ Nataq'aen a'uaĝatema qaedi yauote da'me 'noota, qa'a da'me onaĝayaqa 'lonataqa ena'am ta'le yataqata neuoyaĝaco. Nataq'aen 'noota ta'le ja jemataqayaqa, nataq'aen onaĝaicaloec.

¹⁹ Qama'le da'me leuoyaĝa'j jalcote da'me necochaĝac gaa'me noloqo'ote jo'ne nate', nataq'aen qom p'iida'a da'me qoyaloĝonalo male yaqanate't da'me nataq'aen tadoue da'me nec'alaĝa jo'ne qaya'te loiquiaqa'.

Da'me p'ategue lapaĝaguenataĝanaĝac ñe'me Pablo

²⁰ Am yaqaya Timoteo, yataqata adetela da'me dojo' am qoyanem jo'ne am qo'yamaqatenec. Ena'te anaquiaĝanalo jogaa'me jiyaĝa'u jo'ne ja 'noe'n gaa'me 'laqataqa, jo'ne ye'uetedac joñe'me Dios nataq'aen yataqata ochichiguilo. Nach'egaua eetapela'ajalo yatenaĝanaĝayaqa, qalaĝaja ja naq'aeta.

²¹ Joote uo'oe gaa'me e'n 'lonataĝanaĝac jena'me jenjo' nayatenaĝanaĝac jo'ne ja no'en, qama'le queda'e da'me onaĝaic nataq'aen da'me qadepe'e ladic. 'Noota qom Qadejaliaĝanec ami yanema da'me lichoĝodenataĝanaĝac.