1 Timoteo 5 - Nuevo Testamento Toba Sombrero Negro

Ga'me naloqotenaĝanaĝac jo'ne jetaque yauote gaa'me p'etaqadayaqa

¹ Ena'te anetenec da'me at'aqatac nale auojapegue' ga'me 'yaĝaicachigui, mac da'me 'noota ta'le alecochiya, uotaĝa aualoĝona da'me 'noota, ena'am ta'le adet'a; qama'le jogaa'me joĝodipi, 'noota ta'le aue'n adaqaya'.

² Qama'le nach'e ena'am jaga'me 'yaĝaina', aue'tem jaga'me adat'e; qama'le gaa'me q'añolel, nach'e ena'am aue'tema gaa'me adaqaya', qaya'te auen lale'gue da'me adaqayayaĝac.

³ Alecochiyalo jogaa'me p'ail jo'ne qaya'te yachiyoĝoteda'ague ga'me necochague'j.

⁴ Qalaĝaja jaga'me p'ai jo'ne uo'oe gaa'me c'oqo'te uotaĝa laua', 'noota ta'le naqaegaua 'uaediñe joote yayate'n ga'me qoyen 'lonata'j da'me lecochiyalo ga'me layi, qa'a ca'li jañe'me yataqata ami noqopitalo, qama'le jena'me jenjo' yataqata Dios yiyamaĝaden.

⁵ Jaga'me yataqata p'ai jo'ne onola, joote yanem da'me leuataqataĝanaĝac ñe'me Dios, qama'le ja yaĝañi da'me nachoĝodenaĝac, chayovida'a lajelaĝanaĝac yemeda naa'me noloqo'ote, nataq'aen pi'yaĝadi.

⁶ Qalaĝaja jaga'me p'ai jo'ne ja en 'te yataĝalegue da'me nejiyaĝauayaĝac, joote qaya'te nec'alaĝa ta'le ue'tajop.

⁷ Chane'eja 'noota qom auamaĝalo'te da'me dojo', qaedi gaa'me p'ail male qaya'te lejamaĝataĝa'j.

⁸ Qalaĝaja qom 'uo ga'me ja netela ga'me qoyen loĝot, uotaĝa ja netela ga'me mach'e layi, male joote nemanec ga'me lepe'e nataq'aen yataqata qoyen 'naja napacalo'te jogaa'me ja p'iida'a da'me 'noota.

⁹ Jena'me lenaĝat jaga'me p'ai 'noota ta'le qoyediñe qom joote yauana gaa'me sesenta 'uoidi, nataq'aen yauo onolec ga'me loua.

¹⁰ Nataq'aen yataqata qoyayaten da'me onaĝaic 'lonataĝanaĝac ca'li: qom yataqata netelalo jogaa'me c'oqo'te, nataq'aen da'me 'uo da'me loqopich'i nale qodejapichiya, nataq'aen da'me joote yataqata yichoĝode'n gaa'me Dios lec'oqo'tepi, chayovida'a da'me lecochiyalo nale jogaa'me 'uo da'me lachoĝode'j, nataq'aen nach'e eta't yauo'oe gamachaqaegaua 'lonataqa jo'ne 'noote'.

¹¹ Cha'li ena'te qoyediñe ga'me lenaĝat jaga'me p'ai jo'ne ja yauana gaa'me sesenta 'uoidi, qa'a jona'li 'yaĝai, qama'le 'uo qomle da'me lamaic qaedi yitaĝa uo'on. Qo'che' ca'e ñe'me Cristo,

¹² qa'a male nojouaĝatela't da'me nepaten ga'me laqataĝac ca'li ami dojetapegue'to.

¹³ Male ena'ama gaa'me ja namaidiñe, quetayilo gaa'me 'nachaqa'te, yataqata choĝolaĝail —ja onolec da'me choĝolaĝail, nataq'aen male qovinaĝanaĝail—, eetedapega yema yayate'n, nenaĝatedegue ga'me ja chimadichiñe.

¹⁴ Chane'eja jepaquetapega ta'le jogaa'me p'ail jo'ne jona'li 'yaĝainadi', 'noota ta'le yitaĝa yauote gaa'me loua', qama'le yitaĝa uo'oe gaa'me c'oqo'te, nataq'aen male 'uo ga'me mach'e 'lachaqa'yaĝa'j jo'ne qoyen 'lonata'j, qama'le qaya'te en ladic gamachaqaega ga'me nojaĝac jo'ne ja no'en nale chiyoqo'ot ñe'me payac.

¹⁵ Qa'a jouaĝat da'me joote uo'oe jogaa'me p'ail jo'ne joote queda'e da'me lepe'e', male quetegue ñe'me Satanás.

¹⁶ Qom 'uo jaga'me yauo p'etaqadai jo'ne ami uetauelo, 'noota ta'le nach'añe lecochiya jaga'me p'ai jo'ne mach'e 'lachaqadiaĝaua, qaedi ja yemalegue na'me tamenaĝaiqui lecochaĝac, qaedi na'me tamenaĝaiqui lecochiyalo gaa'me p'ail jo'ne yataqata qaya'te yachiyoĝoteda'ague ga'me louenaĝanaĝac.

¹⁷ Gaa'me 'yaĝaicachidi jo'ne yataqata yiyamaĝatetedac nale joga'me tamenaĝaiqui 'lonatac, nach'egaua 'noota ta'le yataqata qoye'n p'ajodaye: jogaa'me aqataĝanaĝayaqa uotaĝa paĝaguenataĝanaĝayaqa jo'ne 'yaĝa'tape naa'me Dios 'laqataqa.

¹⁸ Qa'a da'me Dios 'laqatac eetac: “Ena'te auojomoue nedegaĝat necoñetaĝaiqui ga'me uaca qom auapiaĝalegue ga'me trigo nale aviyota'a ga'me lo'oc.” 'Laqatac laqaya jo'ne enaac: “Ga'me jiyaĝaua jo'ne onataĝanaĝaic, qoyejeten nale yomat ga'me 'lonatac.”

¹⁹ Ena'te auoqoch'a ga'me nep'aguenaguec ga'me 'yaĝaicachigui qom qaya'te yauachigui, dite qom uo'oe gaa'me dos uotaĝa tres jiyaĝa'u jo'ne eetedapega yauata joga'me 'uo.

²⁰ Jogaa'me maliaĝa yauotedac loec, 'noota ta'le auamaĝadegue qaedi yataqachiñe qonauachigui jena'me jenjo', qama'le gaa'me p'etaqadayaqa maqachaĝa t'oita.

²¹ Da'me yaqataĝac am janem nayi queda'me yataqata qo'mi yec'ate'tape joñe'me Dios choqoñe'me Jesucristo nataq'aen jogaa'me ja 'nalo'te piyem laje', qaedi yataqata oquetapegue'to naa'me yamaĝajoĝonaĝaco. Qama'le ena'te aua'uo adiquiyac uotaĝa adoqopich'i ta'le onolec ga'me auanem.

²² Qom jetaque aua'uo ga'me adecochaĝaua, cha'li ena'te paja'a auacolegue, dite qom yataqata analoqoten, qaedi ja am 'te yajouaĝat jo' qomle ga'me loec, qa'a uotaĝa ja yataqatelegue ga'me. Yataqata at'oiyalegue.

²³ Jayaten da'me 'uo da'me adapite'na jo'ne auec'on nale jana'me adeta'am, qama'le nale aniyom ena'te auajamaĝat ga'me noĝop, 'noota ta'le yaleque'taguet joga'me vino.

²⁴ Uo'oe gaa'me loeco gaa'me jiyaĝa'u jo'ne yataqata joote di'yo't, qalaĝaja gaa'me laqaya' jo'ne te'me ja di'yo't mach'e qoyaloĝonalo qom'te.

²⁵ Nataq'aen jogaa'me 'yetedac jena'me 'noota: uo'oe gaa'me 'lonataqa jo'ne di'yo't, qalaĝaja jogaa'me ja di'yo't jo'ne nataq'aen 'noote', 'uo ga'me nolo' qom qoyecodelo'te qama'le yemta di'yo't.