1 Timoteo 4 - Nuevo Testamento Toba Sombrero Negro

Gaa'me napaĝaguenataĝanaĝaco jo'ne ja chimadichidiñe

¹ Qalaĝaja joñe'me Dios Lepaqal yataqata 'yaĝatetac queda'me naa'me naajo' p'atedegue noloqo'ote uo'oe jogaa'me nematec da'me lepe'e', qama'le equeguelo gaa'me nepaqa'li jo'ne qovinaĝanaĝayaqa, nataq'aen gaa'me napaĝaguenataĝanaĝaco jo'ne chiyoqo'oto ñaa'me payagodipi.

² Male yauo'oe 'laqataqa jogaa'me jiyaĝa'u jo'ne ja yataĝalo'te, nataq'aen yataqata pecayaqa, nataq'aen gaa'me lai'li yataqachiñe qaya'te nometeguet ta'le uotaĝa nepoco't joga'me 'yetedac.

³ Naajo' jiyaĝa'u male uo'oe gaa'me ja yaje'n da'me 'uonat, nataq'aen uo'oe gaa'me ja yaje'n gaa'me niqui'yaqa'te. Qalaĝaja Dios ye't ca'li yemeda gaa'me niqui'yaqa'te qama'le yanema nale jogaa'me c'oqo'te qaedi yali'j qama'le yate'm da'me lamai'j nale. Nach'egaua lec'oqo'te jo'ne yateto'n da'me eja,

⁴ qa'a jayatenaq queda'me yema joga'me Dios 'lonatac yataqachiñe onaĝaic, qama'le ja 'noota ta'le qoyeguem, mac da'me jaconaĝaguet qama'le janemaĝam da'me qadamaic joñe'me Dios,

⁵ qa'a jonaa'me 'laqataqa ñe'me Dios choqoga'me mach'e qanetamenaĝac nach'enaua yataqachiñe e'n chimadichidiñe gaa'me niqui'yaqa'te.

Da'me 'noota ta'le ya'uo ñe'me Timoteo

⁶ Qom auapaĝaguenataĝaneque naa'me naajo' namaĝajoĝonaĝaco jogaa'me adaqaya', qama'le am yataqata eja nataq'aen onaĝaic lamaĝajec joñe'me Cristo Jesús. Qa'a nataq'aen yataqata aue'n ejoda naa'me 'naqataqa jo'ne en t'añi da'me qadepe'e, nach'enaua jo'ne joote oquetapegue'to 'me napaĝaguenataĝanaĝaco jo'ne yataqata onaĝayaqa.

⁷ Ena'te aua'uo 'laqataqa jogaa'me ch'e nojaĝaco jo'ne ja 'noe'n uotaĝa ch'e jenaĝac ja no'en, mac da'me auen da'me nichoĝodenataĝanaĝac chayovida'a aua'uo joga'me Dios yiyamaĝaden.

⁸ Qa'a jayatenaq qom jiyaĝaua nach'e eta't da'me ni'yetac male yataqata 'noota da'me nejiyaĝauayaĝac, qalaĝaja da'me Dios loqopich'i yema uauelo jogaa'me p'iida'a, male yataqata jouaqaue joda'me 'noyaĝac jo'ne yataqata onaĝaic, naa'me naajo' noloqo'ote chayovida'a qom jovitaĝague joñe'me.

⁹ Jenjo' yataqata eja, qama'le 'noota ta'le yema jep'iyaqa.

¹⁰ Qama'le nayi nach'eda 'uo da'me qat'onatac nataq'aen qadeloiquiaĝac, qa'a jouaĝat da'me janemaĝam da'me qadeuataqataĝanaĝac joñe'me Dios jo'ne ja pal, jo'ne nach'eñe mach'e Lec'alaĝaiqui yema jena'me jiyaĝadipi, qama'le yataqata nec'alaĝatedegue jogaa'me jo'ne p'iida'a joñe'me.

¹¹ Naa'me naajo', 'noota ta'le yataqata auamaĝalo'te nataq'aen auapaĝaguenataĝaneque.

¹² At'oiya'aguet qom uo'oe gaa'me ja am 'te 'yamaqate'n queda'me am yaloĝo'n da'me am nejoqolec, mac da'me auaconeguet da'me onaĝaic anejiyaĝauayaĝac, qaedi yataqata am yelodelegue gaa'me Dios lec'oqo'te, qa'a jouaĝat da'me onaĝaic adojaĝac choqoda'me at'oyaĝac, chayovida'a da'me adoqopich'i, da'me t'adaic adepe'e, nataq'aen da'me yataqata am yauata da'me am jiyaĝaua jo'ne yataqata qaya'te auepita'a jena'me aleua.

¹³ Qama'le qom maliaĝa ja am 'te jovita, auen at'onatac da'me auojapelegue ga'me Dios 'laqatac, nataq'aen male yataqata a'uañaqate't gaa'me adaqaya' nataq'aen aualoĝotayelo.

¹⁴ Ena'te auen qaya'ye joñe'me Dios am yanem mach'e Lepaqal ca'li am qo'yaĝatem jogaa'me 'yaĝaicachidi jo'ne am netamedelegue nataq'aen am yacodedelegue ca'li.

¹⁵ Qama'le 'noota ta'le yataqata analoqote'n naa'me naajo' 'yaqataqa qama'le yataqata anichiquetaye, qaedi yema am qoyec'aten da'me anapacalo'te jogaa'me adaqaya'.

¹⁶ Yataqata anetelela't nataq'aen aviyamaĝatetac da'me adapaĝaguenataĝanaĝac nale auanema gaa'me adaqaya'. Qama'le qom nach'e eta't da'me aua'uo da'me dojo', male yataqata nec'alaĝa am ue'tajop, nataq'aen jogaa'me jo'ne am naquiaĝata, nach'e ena'am tadoue ga'me nec'alaĝa.