1 Timoteo 3 - Nuevo Testamento Toba Sombrero Negro

Namaĝajoĝonaĝaco jo'ne yelo'talo gaa'me yelolo'te gaa'me p'etaqadayaqa

¹ Da'me dojo' yataqata eja: ga'me jetaque yelolegue ga'me Dios c'oqo'tepi, qama'le yataqata onaĝaic da'me dojo' jo'ne en 'lonatac.

² Qama'le ga'me jiyaĝaua jo'ne 'lonatac jena'me jenjo', 'noota ta'le qaya'te lejamaĝataĝac. 'Noota qom jiyaĝaua jo'ne onole jaga'me loua, yataqata joĝodaic, nataq'aen loqotenaĝanaĝaic, nataq'aen uategaĝaic ga'me ja yelo'teguet ga'me 'lonatac. 'Lonatac laqaya 'noota ta'le yelo'oguet ga'me jiyaĝadipi qom yec'adeta ga'me 'lachaqa'; nataq'aen yataqata yayaten da'me lapaĝaguenataĝanaĝac.

³ 'Noota qom ja lataĝa lae't, uotaĝa ta'le ja dodinataĝanac, dite da'me yataqata qopitaĝanaqataqaic, napogaĝadeneguet ga'me ja no'en, nataq'aen ja en 'te p'ajaye jaga'me laicaua.

⁴ 'Noota qom nach'eñe yelolegue ga'me 'lachaqa', qaedi gaa'me c'oqo'te yataqachiñe machaqayaqa nataq'aen onaĝayaqa loec.

⁵ Qalaĝaja qom ga'me jiyaĝaua ja yaqanatet da'me yelolegue ga'me 'lachaqa', qama'le ¿teua'atoqo' yaqanatet da'me netela ga'me Dios lec'oqo'tepi?

⁶ Nataq'aen ga'me jiyaĝaua jo'ne qoyen laje da'me Dios 'lonatac, 'noota qom ja yemta ya'uo da'me lepe'e, qaedi qaya'te 'uo ga'me 'yoĝodenaĝac nale jena'me jiyaĝadipi, qa'a qom en p'ajaye da'me ni'yoĝodela't, qama'le ja nomeguet da'me ja no'en, qama'le taue ga'me ne'uaĝanaguec, qa'a nach'e ena'am joca'li qoye'uaĝan ñe'me payac Satanás, yajouaĝat da'me mach'e li'yoĝodenataĝanaĝac.

⁷ Nataq'aen 'noota ta'le yataqata qouatec'a yema jena'me jiyaĝadipi, chayovida'a jogaa'me ja p'iida'a da'me 'noota, qaedi ja qoyachalegue da'me ne'uaĝanaĝanaĝac, uotaĝa male payac yoqovin da'me 'lonataĝanaĝac.

Da'me mach'e qoyen yelo'talo gaa'me necochaĝa'u

⁸ Nach'e naq'aeta gaa'me necochaĝa'u, 'noota ta'le jiyaĝa'u jo'ne onaĝayaqa loec. 'Noota qom jiyaĝa'u jo'ne ja pecayaqa, nataq'aen ja lataĝa lete', nataq'aen ja ch'e naquitetedapega da'me nejetenague'j.

⁹ 'Noota qom nach'eda da'me quetede'egue naa'me 'naqataqa jo'ne nach'enaua Dios qo'mi yaloĝonalo ca'li, chayovida'a yataqata en yoqovichiguilo naa'me lai'li.

¹⁰ Gaa'me jo'ne jetaque qoyen necochaĝa'u, 'noota ta'le 'uaediñe 'uo joga'me napiyenague'j, qama'le qom qaya'te nauateguet, qama'le male yemta qoyen necochaĝa'u.

¹¹ Nataq'aen jogaa'me yauo' jo'ne jetaque uedaue jena'me jenjo', 'noota ta'le yauo' jo'ne onaĝayaqa loec, ja 'noota ta'le quejaĝail, 'noota ta'le yataqata joĝodail, uotaĝa yataqata ejoda nale 'uo ga'me yauote.

¹² Joga'me necochaĝaua, 'noota ta'le onole jaga'me loua, nataq'aen yataqata yelolo'te jogaa'me c'oqo'te nataq'aen ga'me 'lachaqa'.

¹³ Qa'a jogaa'me necochaĝa'u jo'ne yiyamaĝatetedac ga'me 'lonataĝanaĝa'j, male 'uo da'me qoyec'atenec da'me yataqata ejoda, chayovida'a da'me male ja uatequeda'a da'me 'yaĝatetedac joda'me lepi'iyaĝac jo'ne yachiyoĝotedo'ot joñe'me Cristo Jesús.

Da'me yataqachiñe eja ta'le qoyachaue da'me qadepe'e

¹⁴ Yamaic ta'le paja'a am jauana, qalaĝaja 'uaeñe auaconeguet janjo' yediije

¹⁵ qaedi qom jayem copa'teguet, yataqata joote auayaten ga'me aua'uo nale ouauelo jogaa'me Dios lec'oqo'tepi, jo'ne nach'enaua c'oqo'tepi 'me 'nonaĝachidegue joñe'me Qanedios jo'ne ja pal, nataq'aen naqaenaua jo'ne neteleta nataq'aen de'uotalegue nale jena'me yataqata eja.

¹⁶ Qaya'te noqoleguetaĝanaĝac da'me jenjo' 'lonataĝanaĝac jena'me jenjo' qadepe'e ladic jo'ne yataqata t'adaic nataq'aen onaĝaic: Cristo naequena ca'li qaedi yadenaĝat da'me qanejiyaĝauayaĝac, qalaĝaja onolec joñe'me da'me qoyen yataqata eja joñe'me Lepaqal, nataq'aen yema joga'me piyem laje' yauata ca'li. Qama'le qo'yaĝatema yema gaa'me jiyaĝadipi, nataq'aen jena'me aleua laje'pi 'yamaqaten da'me dojo', nataq'aen da'me joote qoyavije'ma di'me 'lachaqa' joñe'me Dios.