1 Timoteo 2 - Nuevo Testamento Toba Sombrero Negro

Da'me jo'ne 'noota ta'le yauote nale yema't gaa'me jiyaĝa'u

¹ Chane'eja cha'li ami je'elopeque da'me anachoĝodeñilo'te yema ga'me jiyaĝadipi, anetameñilo'te jogaa'me, auajelaĝañilo'te choqoda'me auañem adamaiqui ñe'me Dios queda'me netelalo ena'uac.

² Nataq'aen anetameñilo'te nale gaa'me p'ajodaye nataq'aen jogaa'me jaliaĝanaqa, qaedi 'uo da'me qat'achaqa'yaĝac 'me 'noota, uotaĝa qo'mi yataqata machidiñe, choqoda'me 'uo da'me qadepe'e chayovida'a onaĝaic da'me qadoec.

³ Qa'a da'me dojo' yataqata 'noota nataq'aen 'yamaqaten joñe'me Qadet'a mach'e Qadec'alaĝaiqui

⁴ jo'ne yataqata paquetapega da'me qonec'alaĝatedegue yema gaa'me jiyaĝadipi nataq'aen yataqata qoyateton da'me eja jo'ne chiyoqo'ot ñe'me.

⁵ Qa'a jayatenaq queda'me qaya'te Dios laqaya jo'ne p'ajaye, nataq'aen onolec ga'me jiyaĝaua jo'ne qadetaĝayaĝanaĝanec uotaĝa dauegaqataĝanot joñe'me Dios, nach'eñe ñe'me Cristo Jesús,

⁶ jo'ne nemela't qaedi qoyalat ca'li, qama'le naqaeñe chiyaqayi joga'me nec'alaĝac da'me yema da'me qo'mi, nataq'aen joote yaloĝon ca'li uetalegue jaga'me sodoso male yauana jena'me jiyaĝadipi.

⁷ Nach'ena jenjo' qoyen ja'aĝatetac uotaĝa jayem aqataĝanaĝaic naa'me naajo' 'naqataqa, qama'le jayem yamaĝalo joga'me ja judiopi qaedi japaĝaguetapeque gaa'me ejoda jo'ne 'laqataĝanaĝaco joñe'me Jesús. Jenjo' jo'ne ja'aĝatetac yataqata eja, ja joqovinaĝatac.

⁸ Chane'eja, nale yema'a't gaa'me p'etaqadayaqa, 'uaediñe jepaquetapegalo ta'le gaa'me le'mi nodidijeguem naa'me loua' da'me yauote ga'me netamenaĝa'j. 'Noota qom yoqovichiguilo gaa'me lai'li, nataq'aen 'noota ta'le ja dalemata'y nataq'aen ja dapete'tape.

⁹ Qama'le nayi jogaa'me yauo', nale yaidiñe gaa'me leuo lael, 'noota ta'le yacoteguet da'me yataqata yauo 'netaĝac, qama'le ja ne't qaedi uotaĝa qoyec'ate'n, yiyamaĝate'tape da'me 'netaĝa'j. Ja 'noota qom gaa'me yauo' uotaĝa ja onolec ga'me ee'tec ga'me layoĝot da'me ja onolec ga'me yanaye, uotaĝa yaidiñe ga'me oro jo'ne uasec, uotaĝa loqola jo'ne ja qoyauanapegalo, nataq'aen Dios ja yiyamaĝaden qom yaidiñe gaa'me leuo lael jo'ne yataqachiñe lajo'vi'y.

¹⁰ Qom jaga'me yauo jetaque ya'uo ga'me onaĝaic 'netaĝac, 'noota ta'le en onaĝaic ga'me en yelo'teguet, qa'a nach'eda da'me eeta da'me 'netaĝac jaga'me yauo jo'ne eetapela't 'nonaĝachigui ñe'me Dios.

¹¹ Nale qoyapaĝague'n gaa'me yauo', 'noota ta'le yataqata naquiaĝata qama'le yauote, qama'le male quetede'egue joga'me domachita;

¹² nataq'aen ja jaje'tema gaa'me yauo' ta'le dapaĝaguenataĝa'n, uotaĝa eetapega napacalo'te jogaa'me le'mi; 'noota ta'le ch'e 'yemadete'.

¹³ Qa'a ca'li ñe'me Dios 'uaeñe ye'et ñe'me Adán, cop'a ca'li qama'le yemta ye'et jañe'me Eva;

¹⁴ nataq'aen ñe'me Adán ja naqaeñe jo'ne qoyoqovin ca'li, mac jañe'me yauo, qama'le ca'li qoyoqovin taue da'me loec jo'ne ja no'en.

¹⁵ Qalaĝaja jaga'me yauo qonec'alaĝategue nale qo'uaĝai, chayovida'a da'me c'oe, qom yataqata en chimaqategue ga'me lepe'e choqoga'me loqopich'i, qom joĝodai nataq'aen qom yiyamaĝatetac da'me nejiyaĝauayaĝac.