1 Timoteo 1 - Nuevo Testamento Toba Sombrero Negro

Lep'iyenataĝanaĝac ñe'me Pablo

¹ Mach'e jayem Pablo, jayem Jesucristo lamaĝajec choqoda'me en jayem liquiyac joñe'me Dios qaedi ja'aĝa'tape jodaa'me lamaĝajoĝonaĝaco, jo'ne nach'eñe ca'li 'uaechiñe Qadec'alaĝaiqui choqoñe'me Cristo Jesús jo'ne mach'e naqaeñe jeuataqa'tac.

² Yamaic am janem, am Timoteo jo'ne yataqata am yalec queda'me aua'uo da'me yepe'e. 'Noota qom Dios mach'e Qadet'a nataq'aen ñe'me Qadejaliaĝanec Jesucristo am yanema da'me anichoĝodenataguec choqoda'me anecochaguec nataq'aen da'me at'emaĝac.

Pablo laloĝonataĝanaĝac da'me uo'oe jogaa'me napaĝaguenataĝanaĝaco jo'ne ja chimadichidiñe

³ Yitaĝa am je'elopec joga'me joote am ja'aĝatem quelqaya da'me jajoyi jodi'me aleua Macedonia qama'le jenaac: “Ch'e oue'ta jo' jena'me Éfeso,” qaedi auamaĝalo'te jogaa'me jiyaĝa'u jo'ne ja yataĝalo'te, queda'me ja 'noota ta'le dapaĝaguenataĝatec joga'me ch'e lelnataĝa'j jo'ne yataqachiñe ja no'en.

⁴ Nataq'aen ja 'noota ta'le 'yamaqate'n ga'me lepi'ic choqoga'me nejenaĝa'j, uotaĝa lajouaĝa'j jodia'me lapidi ca'li, qa'a naajo' najouaĝaco chiyaqayilo joga'me napetaĝac jo'ne yataqata ja no'en. Qom ja yauo'oe daa'me lamaĝajoĝonaĝaco joñe'me Dios, qama'le ja yaqanate't ta'le maqachaĝa yateto'n da'me onaĝaic lelnataĝac joñe'me.

⁵ Nataq'aen joga'me paquetapega jenjo' 'yelopaĝac: 'noota ta'le noqopitetapega't onolqa'tape jogaa'me, qa'a yataqata eja 'uo da'me loqopich'i jo'ne chiyaqayi ga'me mach'e lai'li jo'ne yataqata onaĝaic, chayovida'a da'me 'uo joga'me lepe'e' jo'ne yataqata eja.

⁶ Joote uo'oe gaa'me qadaqaya' jo'ne qolaĝadegue, queda'ae jena'me jenjo' onaĝaic ladic, qama'le ga'me en lejomaĝac yataqachiñe qaya'te chiyaqayi, qa'a jouaĝa't da'me lapetaĝa'j.

⁷ Nataq'aen maco nach'egaua jetaque dapaĝaguenataĝaneque daa'me Dios 'laqataqa, qalaĝaja nale doje'y qama'le yataqata ja yayate'n joga'me nenaĝatedegue, nataq'aen joga'me en yeloteguet nale dapaĝaguenataĝa'n, qalaĝaja yepetapegalo yataqata eja ga'me yauotedac.

⁸ Joote jayatenaq joga'me lamaĝajoĝonaĝac joñe'me Qadet'a yataqata onaĝaic, qom qoya'uo ga'me enaac nale.

⁹ Qa'a qo'mi qonetouenaĝanaĝaneque queda'me gaa'me lamaĝajoĝonaĝaco ñe'me Dios ja qoye'n nelo'talo nale gaa'me eetapega 'noote', dite da'me e'n yelo'talo jogaa'me maliaĝa ja yacoteguet joñe'me, uotaĝa gaa'me qaleuaĝayaqa, nataq'aen jogaa'me jo'ne ja p'iida'a joñe'me Dios, choqogaa'me 'yetedac da'me ja no'en, nataq'aen jogaa'me yataqata ja 'nonaĝachidegue joñe'me Dios, chayovida'a da'me ja t'oita, nataq'aen gaa'me jo'ne 'yeualaĝae'n nale da'me qadepe'e ladic, nataq'aen jogaa'me yala't jogaa'me let'al, nataq'aen yemeda jogaa'me lataĝanaĝayaqa nach'egaua qoyen nelo'talo naa'me naajo' namaĝajoĝonaĝaco,

¹⁰ nataq'aen jogaa'me quejeguetaĝayaqa, uotaĝa mach'ega uo'oe jogaa'me le'mi jo'ne 'uona't, nataq'aen uotaĝa yauo en loua jaga'me ena'am yauo laqaya, nataq'aen nale joga'me jiyaĝaua yeme'n neua'acapi, gaa'me pecayaqa, nataq'aen jogaa'me ja yataĝalo'te ga'me eetedapega yauote nale, nataq'aen jogaa'me ja yiyamaĝade'n da'me onaĝaic napaĝaguenataĝanaĝac.

¹¹ Nach'ena jenjo' napaĝaguenataĝanaĝac onaĝaic uetaue da'me 'nonaĝac nec'alaĝaiqui jo'ne Dios 'me ja 'nalegue jayem yamaĝalegue.

Lichoĝodenataĝanaĝac joñe'me Dios jo'ne yanem ñe'me Pablo

¹² Nach'e eta't janem da'me yamaic ñe'me Cristo Jesús mach'e Qadejaliaĝanec jo'ne nach'e eta't ya'uo 'yañaĝac, qa'a jouaĝat queda'me yataqata eja en jayem lamaĝajec, nataq'aen ya'uo di'me en 'yonatac jo'ne onaĝaic,

¹³ qa'ejole ca'li ja 'noe'n nale gaa'me ñenaĝatedegue jo'ne je'n yeloteda'a nale ñe'me Jesús, jecaa'tape jogaa'me lalemaĝaje'te nataq'aen da'me je'ue'tape, jeetapegalo ja 'noe'n. Qalaĝaja ñe'me Jesús yataqata jayem yichoĝoden, qa'a yajouaĝat da'me maliaĝa ja jep'iya'a joñe'me, nataq'aen yataqata ja jayaten joga'me jauotac, yataqata jejomac.

¹⁴ Qalaĝaja joñe'me Qadejaliaĝanec yataqachiñe t'adaic ga'me lichoĝodenataĝanaĝac jo'ne jayem yanem, qama'le yataqata 'uo da'me yepe'e jo'ne janem ñe'me, choqoga'me yoqopich'iyaĝac jo'ne onaĝaic, nach'eda jo'ne qo'mi uauelo qom jep'iyaqa joñe'me Qadec'alaĝaiqui Cristo Jesús.

¹⁵ Jenjo' yataqata eja, qama'le 'noota ta'le yema jep'iyaqa, queda'me Cristo Jesús nec'ata ca'li jena'me aleua qaedi nec'alaĝatedegue jogaa'me loeco lo'olpi, qama'le jayem tachigui da'me naqayem loeco lo'o t'adaic.

¹⁶ Qalaĝaja joñe'me Jesucristo yataqata jayem yichoĝoden, qama'le yaloĝon da'me lepagaĝac da'me jayem. Te'me ja jayem 'te no'en, qalaĝaja jetaque aueñeta qom yataqata jetaque ayoue da'me nec'alaĝa jo'ne qaya'te loiquiaqa'.

¹⁷ ¡'Noota qom nach'e eta't qa'nonaĝachigui joñe'me, nataq'aen jaloĝonaq da'me onaĝaic lejaliaĝa joñe'me mach'e Qadejaliaĝanec jo'ne ja pal, nataq'aen Jaliaĝanec jo'ne qaya'te nalo'oguet, ja qoyauana, nach'eñe onolec mach'e Qanedios! Jaja'a, nach'e naq'aeta da'me dojo'.

'Lelopaĝac ñe'me Pablo jo'ne yanem ñe'me Timoteo

¹⁸ Am yalec Timoteo, nayi am janem jenjo' 'yelopaĝac qaedi oquetalo'te jogaa'me 'laqataqa gaa'me qadaqaya' jo'ne am yachedalegue ca'li, qaedi yataqata eja joga'me at'onatac nale aueloiquitapegue' ga'me ja no'en.

¹⁹ Oquetalegue da'me adepe'e nataq'aen nach'e eta't auen onaĝaic ga'me adelnataĝac, qa'a uo'oe jogaa'me male ja yauote ga'me onaĝaic lelnataĝa'j, qama'le queda'e da'me lepe'e'.

²⁰ Daajo' yajouaĝat jaa'me Himeneo choqoñe'me Alejandro, qama'le naajo' jamaĝalo'te joñe'me payac Satanás, qaedi male yataqata yayate'n queda'me ja 'noota qom ch'e ye'uetedac joñe'me Dios.