1 Pedro 4 - Nuevo Testamento Toba Sombrero Negro

¹ Chane'eja joñe'me Cristo 'uo ca'li da'me lachoĝodec qoyen da'me nejiyaĝauayaĝac, qama'le da'me ami 'noota qom nach'e ena'am oqui'tegue da'me jo'ne ami qoyamaĝalo'te. Qa'a joga'me jo'ne neualaĝae'ye' da'me qoyen lachoĝodec da'me nejiyaĝauayaĝac, nach'ega male ja en 'te lajo'vi naa'me loeco,

² qaedi male ja que'teguelo naa'me ch'e lamaico da'me nejiyaĝauayaĝac. Nach'edata da'me male yauotac da'me jo'ne chiyaqayi da'me loequenataĝanaĝac joñe'me Dios, nayi yemeda naa'me noloqo'ote.

³ Qayoĝode' jaa'me noloqo'ote da'me nach'e ena'am a'viche'tape jogaa'me uo'oe jo'ne 'lonataqa joga'me jo'ne ja p'etaqadaiquipi, queda'me ovitauelo daa'me namanaĝanaĝaco choqogaa'me namaico jo'ne ja 'noe'n, nataq'aen da'me neualaĝayaĝac choqoda'me 'notaĝa, qaya'te loiquiaqa' da'me yomaĝac, nataq'aen da'me qonetametapecot gaa'me nequi'il 'me ja qoyaje'n.

⁴ Qalaĝaja nayi da'me male ja aualequechiñe da'me napacalo'te ja 'noe'n q'ae'n da'me nejiyaĝauayaĝa'j jogaa'me ja p'etaqadayaqa; qo'che' jogaa'me male loualeteguet qama'le ami ye'ue'tape.

⁵ Qalaĝaja gaa'me male taida'a da'me 'yaĝadetem yema joga'me 'yetetedac joñe'me Jesucristo, nach'eñe jo'ne joote niyamaĝateta't qaedi naloqote'n joga'me jiyaĝadipi jo'ne nec'aletedaye choqodia'me joote yele'u.

⁶ Qa'a nach'e ena'am qo'yaĝatema ca'li da'me 'naqataĝanaĝac jo'ne onaĝaic dia'me jiyaĝadipi jo'ne joote yele'u joca'li, qaedi da'me 'loyaĝa'j jo'ne ja di'yoq nach'e ena'am yaqanatet da'me nec'aletaye, da'me ena'am da'me mach'e 'loyaĝac joñe'me Dios, mate mane'e joca'li uetedalegue jena'me aleua joote 'uo da'me nec'atenague'j, jo'ne ena'am da'me taida'a yema joga'me jiyaĝadipi.

Alecochiiyalo jogaa'me adaqayadi'

⁷ Male qoyoqo'ta ga'me loiquiaqa't ena'uaque jogaa'me uo'oe. Chane'eja da'me ami 'noota qom aneloyitaye nataq'aen da'me ena'te aualajaĝañita da'me anetamenaĝaqui.

⁸ Nataq'aen yaguegue qomle da'me yataqata anoqopichiyapega't, qa'a da'me noqopich'i yaqanatet ta'le yapalaĝa't jalcote naa'me nepatenaĝanaĝaco.

⁹ Yataqata aueloyegueta yema jogaa'me adaqayadi' qom yec'adeta joga'me at'achaqadi', qama'le ena'te aueñi ja 'noe'n naa'me at'aqataqadi' qom auojeyapegue'to jogaa'me.

¹⁰ Nataq'aen joote auacoñiyegueta gaa'me leyalaqataĝanaĝaco joñe'me Dios, onolqa'tape da'me ami. Chane'eja 'noota qom a'uonataĝañiya qaedi yataqata alecochiiyalo gaa'me adaqayadi', qa'a yataqata auayachiñe da'me aueloyiye jena'me yodapecache jo'ne lichoĝodenataĝanaĝaco joñe'me Dios.

¹¹ Qom 'uo ga'me yayaten da'me t'aqataĝan, qama'le 'noota qom 'yaĝatema gaa'me 'laqataqa joñe'me Dios. Nach'e ena'am qom 'uo ga'me laqaya jo'ne lecochiyalo gaa'me laqaya', qama'le 'noota qom yapoteneguet da'me 'lañaĝac jo'ne yanem joñe'me Dios. Yema ga'me 'noota jo'ne a'vichetac, 'noota qom a'vichi qaedi male nach'e ena'am qo'nonaĝachigui joñe'me Dios, yajouaĝat da'me nach'eñe joñe'me Jesucristo jo'ne loĝot da'me 'noyaĝac choqoda'me nañoqotaĝanaĝac jo'ne ja pal. Jaja'a, nach'e naq'aeta da'me dojo'.

Namaic jo'ne chiyaqayi da'me nachoĝodec

¹² Ami yaqaya'olqa, ena'te adoualiya'a ga'me anapiyenaguequi jo'ne ami novitalo, 'me ena'am ga'me dole' jo'ne ami yaviyaĝa't, da'me uotaĝa ami uañelo ga'me jo'ne ja qoyauana ca'li.

¹³ Nach'edata da'me ami made'tape, yajouaĝat da'me nach'e ena'am ami ua'ajopa daa'me lachoĝodeco joñe'me Cristo, qaedi nach'e ena'am najaĝaye da'me adamaiqui qom yataqachiñe di'yoq da'me 'lonaĝa joñe'me da'me yitaĝa novitequena jo' qomle.

¹⁴ 'Noota qom ami made'tapolqa qom 'uo ga'me ami ye'ue'tape yajouaĝat da'me ademii'teguet joñe'me Cristo, qa'a da'me 'lonaĝa ñe'me Dios Lepaqal nach'e eta't ami uetauelo.

¹⁵ Da'me ami, qom 'uo da'me adachoĝodequi, 'noota qom ja chiyaqayi da'me naqa'ami jo'ne ami lataĝanaĝayaqa, uotaĝa ta'le ami cachaĝayaqa, uotaĝa ta'le auauoyi gamachaqaega ga'me ja no'en, uotaĝa ta'le anedeñiya'a gamachaqaega jo'ne ja adoĝochi.

¹⁶ Qalaĝaja qom 'uo da'me adachoĝodequi yajouaĝat da'me ami p'etaqadayaqa, 'noota qom ena'te adepocoqoilegue, dite da'me a'nonaĝachiyegui joñe'me Dios queda'me yataqata ami lec'oqo'tepi joñe'me.

¹⁷ Nayi male yovita da'me laloqo' da'me 'uo da'me nec'atenague'j jogaa'me jo'ne mach'e lec'oqo'tepi joñe'me Dios. Qama'le naq'aeta da'me male 'uo da'me qanec'atenaguec da'me qo'mi, qama'te ¿jach'e jogamaĝa eeta da'me loiquiaqa't jogaa'me ja yoqochideta na'me 'laqataĝanaĝac joñe'me Dios?

¹⁸ Naa'me nedii's jo'ne qoyedidiñe joca'li, eet'oi: “Te'me 'uo da'me laqalai'j gaa'me yataqatelo'te ta'le qonec'alaĝatedegue. Qama'le, ¿jach'e jogamaĝa eeta ga'me loiquiaqa't jogaa'me qaya'te lepe'e' choqoga'me loeco lo'olpi?”

¹⁹ Chane'eja jogaa'me jo'ne choĝodache yajouaĝat da'me yauote da'me jo'ne chiyaqayi da'me loequenataĝanaĝac joñe'me Dios, 'noota qom nach'e eta'ajalo quetedalegue da'me 'noota jo'ne 'yetetedac, qama'le yep'aĝado'ot joñe'me Dios da'me 'loyaĝac jo'ne mach'e 'lonatac, qa'a joñe'me yataqata yepaquetelegue ga'me enaac.