1 Pedro 3 - Nuevo Testamento Toba Sombrero Negro

Napaĝaguenague'j jogaa'me noua'

¹ Qama'le nach'e ena'am da'me ami yauo' jo'ne joote a'uoñi, 'noota qom auoqochiyalo jogaa'me lelnataĝaco gaa'me adouadi', qaedi qom uo'oe gaa'me jo'ne maliaĝa ja 'yamaqate'n da'me 'naqataĝanaĝac, qama'le nach'egaua jo'ne t'amaqatenataĝa'n qomle, yajouaĝat da'me yauata da'me aniyamaĝachela't da'me ami. Mate mane'e da'me qaya'te 'naqatac ta'le domachita,

² jogaa'me p'iida'a qomle ñe'me Dios qom yauata da'me at'oyaĝaqui jo'ne onaĝaic nataq'aen da'me a'nonaĝachiyegui joñe'me Dios.

³ Nach'e ena'ama jogaa'me a'netaqachidi', ena'te aueñi p'ajaye da'me auepaĝañedegue jogaa'me auauoyapiye jo'ne adi'yoĝodaqachidi' qama'le ena'am da'me a'netaĝaqui jo'ne yaguegue da'me li'yoĝodic, uotaĝa gaa'me a'netaqachidi' laqaya' jo'ne oro uotaĝa gaa'me aneuoĝoildi' jo'ne yaqaselecalo'te,

⁴ dite ga'me jo'ne p'auo, da'me uetaue na'me adai'lidi', 'me 'uo da'me 'lonaĝa jo'ne ja pal, nach'eda da'me at'oyaĝaqui 'me joĝodaic nataq'aen da'me 'uo da'me 'nemaĝac. Jenjo' jo'ne yataqatelegue, 'uo da'me lajo'viyaĝac let'adaic 'me 'yamaqaten ñe'me Dios.

⁵ Qa'a naq'aeta da'me 'netaĝa'j joca'li gaa'me yauodipi jo'ne yataqatelo'te, ca'li cha'li uo'oe dia'me jiyaĝa'u jo'ne toye's, queda'me yajouaĝat da'me p'iida'a joñe'me Dios nataq'aen da'me yoqocha'alo jogaa'me louadipi.

⁶ Qama'le naq'aeta da'me eeta joca'li jañe'me Sara, da'me yoqocha'a ñe'me Abraham nataq'aen da'me 'nonaĝachigui qama'le da'me yiyaĝana qama'le eet'oi: “Am yejaliaĝanec.” Qama'le nayi ena'am ta'le auovidi'iyaguet da'me ami lec'oqotelpi jadi'me Sara, qom auauoyi da'me chimaqachiñe nataq'aen da'me qaya'te ta'le at'oiya'aguet.

⁷ Qama'le naq'aeta da'me ami le'mi jo'ne joote a'uoñi, 'noota qom auayachiñe da'me aueloyeguet joda'me adouayaĝaqui, qama'le auañema da'me netelaĝac jo'ne mach'e loĝot, yajouaĝat da'me ja ena'am da'me 'lañaĝa'j jogaa'me yauo'. Nataq'aen 'noota qom qo'nonaĝachidegue gaa'me yauo', qa'a nach'e ena'ama da'me qoyiyaĝanalo qaedi ne'uaĝada'uo da'me nec'alaĝa jo'ne chiyaqayi da'me lichoĝodenataĝanaĝac ñe'me Dios. 'Noota qom naq'aeta da'me aueñe'teque qaedi qaya'te 'uo ga'me nauanegueta jogaa'me jo'ne mach'e anetamenaĝacodi'.

Napaĝaguenague'j yemeda joga'me p'etaqadaiquipi

⁸ Chane'eja, 'noota qom aueñi onolec da'me adelnataĝaqui, choqoda'me joĝodayaqa naa'me adai'lidi', nataq'aen da'me ami qopitaĝanaqataqayaqa, choqoda'me ami choĝodenataĝanaĝayaqa, nataq'aen da'me ja ami 'te 'yoĝodenaĝayaqa.

⁹ Ena'te a'viyelaĝachiyeguet ga'me ja no'en joga'me ja no'en jo'ne ami qo'yeteque, uotaĝa ga'me anejouenaguequi, dite da'me a'viyelaĝachiyeguet da'me adichoĝodenataĝanaĝaqui, qa'a joñe'me Dios ami yiyaĝanalo joca'li qaedi auacoñiyeguet da'me mach'e lichoĝodenataĝanaĝac.

¹⁰ Qa'a naa'me nedii's jo'ne qoyedidiñe joca'li eet'oi: “Joga'me jo'ne jetaque noqopita da'me 'noyaĝac Nataq'aen da'me tauelo jogaa'me noloqo'ote jo'ne machidiñe, 'Noota qom netela na'me lachaĝat qaedi ja 'yaĝatetac ga'me ja no'en Nataq'aen na'me nedegaĝat qaedi ja nenaĝategue ga'me noqovinaĝanaĝac.

¹¹ Nataq'aen 'noota qom ca'ae joga'me ja no'en Qama'le ya'uo da'me 'noota, Nataq'aen da'me yelaque da'me 'nemaĝac qama'le equegue.

¹² Qa'a joñe'me Jaliaĝanec netelalo jogaa'me jo'ne yataqatelo'te Nataq'aen da'me naquiaĝanalo gaa'me netamenaĝaco, Qalaĝaja nautenalo jogaa'me jo'ne 'yetetedac da'me ja no'en.”

¹³ ¿Jach'e jogamaĝa yaqanatet ta'le ami 'naĝa't, qom nach'e eta't da'me oquitalegue da'me a'vichetac da'me 'noota?

¹⁴ Qalaĝaja mate mane'e da'me yataqatelegue ga'me auauoyi, uotaĝa 'uo ga'me adachoĝodequi jo'ne ami yachalo'te. Qom naq'aeta qama'le ¡'noota qom ami made'tapolqa! Ena'te a'uoitapega gamachaqaega, nataq'aen da'me ena'te ami qolanaqayaqa.

¹⁵ Nach'edata da'me a'nonaĝachiyegui joñe'me Cristo mach'e Adejaliaĝanequi. Nataq'aen nach'e eta't aniyamaĝacheta't da'me a'uachiyegueta ena'uaque gaa'me jo'ne denataĝatapelegue da'me jo'ne adeuataqataĝanaĝaqui 'me joote ami uetauelo.

¹⁶ Qalaĝaja 'noota qom aueñe'tem ta'le qaya'te adi'yoĝodiqui nataq'aen da'me ami machidiñe. Nataq'aen da'me aueñi da'me adelnataĝaqui jo'ne 'uo da'me 'nemaĝac, qaedi gaa'me jo'ne ami ye'ue'tape yajouaĝat da'me auep'iiya'a joñe'me Cristo, mach'e nepocoĝolo'te jo' qomle naa'me mach'e 'laqataqa.

¹⁷ Chane'eja qom 'uo da'me adachoĝodequi, 'noota ta'le yajouaĝat da'me auauoyi da'me 'noota, qa'a naq'aeta da'me jo'ne 'yamaqaten joñe'me Dios. Qama'le ja ena'am da'me auauoyi da'me ja no'en.

¹⁸ Qa'a nach'e ena'am ñe'me Cristo 'uo da'me lachoĝodec ca'li yeleu, yajouaĝa't naa'me adoecodi', onolec da'me naloĝola't qama'le ja yitaĝa ta'le di'yoq. Ñe'me jo'ne qaya'te ta'le laviyaĝajet qalaĝaja nach'e ena'am 'uo da'me lachoĝodec q'aen yajouaĝat da'me ami loeco lo'ol, qaedi ami yauegalo joñe'me Dios. Qama'le ja qalaq da'me male pal da'me ch'e nejiyaĝauayaĝac ca'li yeleu, qalaĝaja yitaĝa 'niyelaĝajeguem queda'me 'uo da'me 'loyaĝac jo'ne ja di'yoq 'me qaya'te loiquiaqa'.

¹⁹ Qama'le naq'aeta da'me ec ca'li qaedi 'yaĝatema da'me nec'alaĝa jogaa'me nepaqa'li jo'ne necoñetae's,

²⁰ nach'egaua gaa'me qoleguetaĝanaĝayaqa jaa'me noloqo'ote joca'li 'uo ñe'me Noé. Joca'li ñe'me Dios yeuate'talo ga'me jiyaĝadipi ta'le uotaĝa 'niyelaĝadetot joñe'me, chayovida'a da'me qoye'et jaga'me nelicota lat'edai. Yem qama'le uo'oe ocho gaa'me jiyaĝa'u jo'ne nec'alaĝatedegue joca'li da'me qoyachiyoĝotedañgui ga'me noĝop.

²¹ Qama'le nach'ega ga'me noĝop male yelo'teguet da'me chilaĝanataĝanaĝac, jo'ne nach'e ena'am male chiyaqayi da'me ami qonec'alaĝatedegue. Qalaĝaja da'me chilaĝanataĝanaĝac ja naqaega ta'le yiyo na'me qado'oc, dite da'me qoyiyaĝanot ñe'me Dios qaedi en yoqovita na'me qadauel, yajouaĝat da'me qo'mi nec'alaĝatedegue joñe'me Jesucristo jo'ne 'niyelaĝajeguem joca'li.

²² Nach'eñe joñe'me Jesucristo joote yec'adije'ma di'me piyem qama'le nayi male neta'ña na'me yayaten joñe'me Dios, qama'le nejaliaĝatelo'te joga'me piyem laje'pi choqoga'me nepaqa'lpi laqaya' jo'ne te'me 'uo da'me lejaliaĝa'j nataq'aen da'me lañoqotaĝanaĝa'j.