1 Pedro 2 - Nuevo Testamento Toba Sombrero Negro

Joga'me noic dalaĝaic jo'ne Dios lec'oqo'tepi

¹ Chane'eja 'noota qom aĝañidiñi ena'uaque naa'me yodapecache jo'ne ja 'noe'n. Ena'te auoqovinaĝañetac, uotaĝa ta'le ja ami 'te yataĝalo'te, uotaĝa ta'le 'uo ga'me adep'aguenataĝanaĝaqui uotaĝa ga'me ade'uenaĝanaĝaqui.

² Ena'am ga'me notolec jo'ne yemta niyiñe netaque da'me lamaic jaga'me lochi', qama'le nach'e ena'am da'me ami, 'noota qom anechiyaque da'me lamaic da'me 'laqatac ñe'me Dios, qaedi ga'me jo'ne chiyaqayi en anichiquitajeguem nataq'aen da'me 'uo da'me adec'alaĝaqui,

³ qa'a joote auejomiyalegue da'me lamaic joñe'me Jaliaĝanec jo'ne yataqata onaĝaic.

⁴ Chane'eja anichiquii'uo nayi joñe'me Qadejaliaĝanec Jesús jo'ne ena'am ga'me qa' 'me yataqata nec'aletaye. Ga'me jiyaĝadipi 'yota'n ca'li joñe'me, qalaĝaja nach'eñe jo'ne Dios liquiyac nataq'aen da'me 'uo da'me lajo'viyaĝac let'adaic.

⁵ Nataq'aen da'me ami, ena'am ta'le ami qadi jo'ne nec'aletedaye, naqa'ami jo'ne 'lonataqa joñe'me Dios da'me 'noĝojeguem ga'me tamenaĝaiqui jo'ne ja 'nalegue, qaedi ami jo'ne ademii'teguet joñe'me Jesucristo male ami qoye'n letaĝayaĝanaĝanaqa ga'me jiyaĝadipi, da'me auajaqaedeuo joga'me najaqajecpi 'me ja di'yo't, nach'egaua jo'ne yataqata 'yamaqate'n joñe'me Dios.

⁶ Qo'che' nach'e ena'am 'yaĝatetedac naa'me nedii's jo'ne qoyedidiñe joca'li, eet'oi: “Male janañgui di'me laeñi di'me noic let'adaic jo'ne Sión Ñe'me jo'ne ena'am ga'me qa' 'me t'añiyapeguet ga'me emec, Nach'eñe jo'ne onaĝaic, mach'e yiquiyac, Qama'le ga'me jo'ne 'yamaqaten joñe'me qaya'te 'uo ga'me lepocoĝoc qomle.”

⁷ Ami jo'ne auep'iiya'a joñe'me yataqata a'uamaqachiñe da'me 'uo da'me lajo'viyaĝac let'adaic. Qalaĝaja uo'oe gaa'me jo'ne ja p'iida'a, qama'le yepaquichigui da'me 'yaĝatetedac jonaa'me nedii's jo'ne qoyedidiñe joca'li, eet'oi: “Ga'me qa' jo'ne 'yota'n jogaa'me onataĝanaĝayaqa, Male taue da'me neleguemaĝata ga'me qa' 'me t'añiyapeguet ga'me emec.”

⁸ Qama'le nach'e ena'am jenjo' 'naqatac laqaya eet'oi: “Nach'ena na'me qa' jo'ne en dapolegaĝa'n ga'me jiyaĝadipi, Na'me qa' jo'ne en 'naqadiñe jogaa'me.” Qa'a jogaa'me dapolegaĝa'n yajouaĝat da'me ja yoqochideta na'me 'naqataĝanaĝac. Qama'le nach'eda da'me jo'ne chiyaqayi da'me ne'uaĝanague'j.

⁹ Qalaĝaja ami yataqata ami liquiyaqa ñe'me Dios, nataq'aen ami qoye'n letaĝayaĝanaĝanaqa joga'me jiyaĝadipi da'me auajoyi'tot ñe'me nejaliaĝanec, nataq'aen da'me ami noic let'adaic jo'ne ja 'nalegue, ami jo'ne onolec noic jo'ne loĝot joñe'me Dios. Qama'le naq'aeta da'me jo'ne ya'uo joñe'me qaedi a'uaĝache'tape naa'me 'lonataqa jo'ne onaĝayaqa, ñe'me jo'ne ami yachiyoĝotauelo ga'me 'lalaĝa qaedi male ayoue da'me onaĝaic yoqochiñe jo'ne chiyoqo'ot joñe'me.

¹⁰ Da'me ami joca'li ja jalchi'ena ta'le ami noic laje', qalaĝaja nayi male ami noic jo'ne Dios lec'oqo'tepi. Joca'li ñe'me Dios cha'li ja ami 'te yichoĝode'n, qalaĝaja nayi male yataqata ami yichoĝode'n.

Yataqachiñe a'uonataĝañiyot ñe'me Dios

¹¹ Ami yaqaya'olqa, ami jo'ne aueñiya'ama jogaa'me ja 'lachaqa'tena 'me ch'e oquitalegue jenjo' aleua, ami ñachoĝodenoto da'me ena'te auauoyi ledaqa't naa'me lamaico ga'me anejiyaĝauayaĝaqui jo'ne deloiquitedapegue' da'me at'oyaĝaqui.

¹² A'nañaĝachiyec da'me 'noota qom ovitauelo jogaa'me ja p'etaqadayaqa, qaedi jogaa'me, mate mane'e uo'oe gaa'me 'laqataqa nayi da'me e'n ami laute'u, qama'le ena'am ta'le naqa'ami jo'ne te'me ja 'noe'n da'me at'onataqadi', qalaĝaja qom yauata ga'me 'noota jo'ne auauoyi qama'le 'nonaĝachidegue joñe'me Dios qom yovita ga'me nolo' jo'ne p'ategue, qom qonaloqote'n naa'me mach'e 'lonataqa onolqa'tape jena'me jiyaĝadipi.

Da'me qoyoqocha'alo jogaa'me nejaliaĝanaqa

¹³ Auoqochiyalo ena'uaque jogaa'me jaliaĝanaqa jo'ne ch'e jiyaĝa'u, yajouaĝat da'me adoqopichiya joñe'me Jaliaĝanec: auoqochiya ñe'me jaliaĝanec jo'ne Roma le'ec, qa'a nach'eñe jo'ne yelolo'te yema ga'me jiyaĝadipi,

¹⁴ qama'le nach'e ena'ama gaa'me jaliaĝanaqa jo'ne lamaĝa's joñe'me, qaedi ye'uaĝa'n gaa'me jo'ne ja no'en da'me 'lonata'j, nataq'aen qaedi 'nonaĝachiguilo jogaa'me jo'ne yauote da'me chimaqachiñe.

¹⁵ Qa'a naq'aeta da'me loequenataĝanaĝac ñe'me Dios: qom auauoyi da'me chimaqachiñe, qama'le jogaa'me jo'ne qaya'te layatenaĝanaĝac nataq'aen jogaa'me chiyoĝo's qaya'te ladi'j ta'le ami dachinataĝalo'te.

¹⁶ Aniyamaĝachela't qa'a ja ami 'te necoñetae's, qalaĝaja ena'te aueñetapega da'me auachiyoĝochiyaye da'me ami uojotedañi male auaqanachichi ta'le auauoyi da'me jo'ne ja no'en. Nach'edata da'me aniyamaĝachela't qa'a ami lalemaĝaje'te joñe'me Dios.

¹⁷ Auañema yema da'me aviyamaĝache'tape, nataq'aen yataqata adoqopichiyalo jogaa'me adaqayadi', choqoda'me a'nonaĝachiyegui joñe'me Dios, nataq'aen auoqochiiya ñe'me Roma le'ec jo'ne nejaliaĝatelo'te yema joga'me jiyaĝadipi.

Napaĝaguenague'j jogaa'me nalemaĝaje'te

¹⁸ Ami nalemaĝaje'te, 'noota qom auomachiyalegue joga'me mach'e adejaliaĝanequi da'me yataqata a'nonaĝachiyegui, ena'te auajamaĝachi jogaa'me 'noote'.

¹⁹ Qa'a joñe'me Dios yataqata yichoĝoden ga'me jo'ne napogaĝadeneguet da'me lachoĝodec qoyen, yajouaĝat da'me jetaque yiyamaĝaden ñe'me Dios, mate mane'e da'me lachoĝodec ja chiyaqayi ga'me ja no'en ta'le ya'uo.

²⁰ Qama'le qom naq'aeta da'me 'uo da'me ane'uaĝanaguequi queda'me auauoyapiye gaa'me ja 'noe'n, ¿jach'e ga'me adajo'viyaĝaqui da'me anapogaĝadeñi choqoda'me a'nañaĝachela't? Qalaĝaja qom 'uo da'me adachoĝodequi yajouaĝat da'me auauoyi da'me 'noota, nataq'aen da'me anapogaĝadeñi qama'le a'nañaĝachela't, nach'eda jo'ne 'yamaqaten joñe'me Dios.

²¹ Qa'a naqaeda da'me 'uo da'me ami qoyiyaĝanalo, qa'a ñe'me Cristo 'uo da'me lachoĝodec yajouaĝat joda'me ami, qama'le qoyaloĝon da'me nach'eñe jo'ne jetaque qoyadenaĝat qaedi qota'ya da'me ladic.

²² Joñe'me Cristo qaya'te 'uo ga'me loec nataq'aen qaya'te ta'le 'uo ga'me yoqovi'n.

²³ Mane'e joca'li qoyejouetac, qalaĝaja ja 'yiyelaĝateguet joga'me nejouenaguec. Mane'e joca'li qoya'uo da'me lachoĝodec, qalaĝaja ja deloiquitac, dite da'me yaloĝona joñe'me Dios qaedi yec'aten, qa'a nach'eñe jo'ne qaya'te nepaten.

²⁴ Qa'a nach'eñe ñe'me Cristo jo'ne qo'mi nep'aĝanegueta ca'li yachi'y naa'me qadoeco qama'le ga'me lapat qoyachalegue jaga'me sodoso, qaedi da'me qo'mi male qolaqa'e da'me qadoiquiyaĝac qama'le jouaqaue da'me nec'alaĝa jo'ne ja 'nalegue. Joñe'me Cristo uo'oe ca'li jogaa'me yedidiñe qaedi ami nec'alaĝatedegue.

²⁵ Qa'a da'me ami joca'li aueñiya'ama gaa'me 'naĝanaĝatel jo'ne yejoma'ape, qalaĝaja nayi joote a'niyelaqaeya joñe'me Cristo, jo'ne ami netelalo qama'le ena'am ga'me 'naĝanaĝate nouatoqo't jo'ne nach'e eta't da'me nelotaye qaedi ami yelo'ogueta.