1 Juan 5 - Nuevo Testamento Toba Sombrero Negro

Ga'me p'iya'a joñe'me Dios, nomat da'me ja no'en

¹ Ena'uaque jogaa'me jo'ne p'iida'a queda'me Jesús mach'e Dios Liquiyac, nach'egaua mach'e Dios lec'oqo'tolqa. Nataq'aen gamachaqaega jo'ne noqopita ga'me net'a, nach'e ena'am noqopitalo jogaa'me lec'oqo'te ga'me.

² Chane'eja, qom qadoqopita joñe'me Dios, nataq'aen qom jauoqo'oe daa'me jo'ne qo'mi yamaĝalo'te, qama'le jayatenaq queda'me nach'e ena'am qadoqopitalo ena'uaque jogaa'me jo'ne lec'oqo'tepi joñe'me Dios.

³ Nach'eda queda'me ta'le qadoqopita ñe'me Dios, qama'le jiyamaĝata' jodaa'me lamaĝajoĝonaĝaco. Nataq'aen jodaa'me lamaĝajoĝonaĝaco yataqata ja dajali',

⁴ qa'a ena'uaque jogaa'me jo'ne Dios lec'oqo'tolqa joote noma't da'me ja no'en: qama'le da'me qadepe'e qo'mi yanema da'me ñomataq da'me ja no'en.

⁵ Ena'uaque jogaa'me jo'ne p'iida'a queda'me Jesús mach'e Lec'oĝot ñe'me Dios, nach'egaua jo'ne noma't da'me ja no'en.

⁶ Joda'me lovidaĝaquena joñe'me Jesucristo 'nanec qoyen joga'me noĝop ca'li qonachilaĝan, nataq'aen jaga'me letauo' naliñi qoyen ca'li qoyalat; ja nach'egata ga'me noĝop, dite da'me nach'e ena'am noĝop nataq'aen letauo'. Joñe'me Dios Lepaqal nach'eñe jo'ne dechoqotaĝanec da'me dojo', nach'eñe jo'ne yataqata eja.

⁷ Qa'a naajo' tres jo'ne mach'e choqotaĝanaĝayaqa:

⁸ joñe'me Dios Lepaqal, nataq'aen ga'me noĝop chaqaga'me letauo' joñe'me Jesús; naajo' tres ena'am da'me onolec qa'a nalotapega't.

⁹ Nale jaconaĝagueta daa'me 'laqataĝanaĝaco jogaa'me jiyaĝadipi, qalaĝaja da'me 'laqataĝanaĝac joñe'me Dios yataqata napacalegue ena'uac; chane'eja yataqata jaconaĝaguet dojo' 'laqataĝanaĝac joñe'me Dios jo'ne dechoqotaĝanec joñe'me Lec'oĝot.

¹⁰ Joga'me jo'ne p'iya'a joñe'me Dios Lec'oĝot yachitaue ga'me lauel da'me dojo' Dios 'laqataĝanaĝac; ga'me jo'ne ja p'iya'a joñe'me Dios qamqa'me en pecaic joñe'me, qa'a ja p'iya'a da'me 'laqataĝanaĝac joñe'me queda'me dechoqotaĝanec joñe'me Lec'oĝot.

¹¹ Qama'le dojo' da'me Dios 'laqataĝanaĝac: queda'me qo'mi yanema da'me qat'oyaĝac jo'ne yataqatelegue, nataq'aen dojo' qat'oyaĝac chiyaqayi joñe'me Lec'oĝot.

¹² Joga'me jo'ne ue'tajop joñe'me Dios Lec'oĝot, nach'e ena'am yauana da'me dojo' 'loyaĝac, qalaĝaja ga'me jo'ne ja ue'tajop joñe'me Dios Lec'oĝot, ja yauana joda'me 'loyaĝac.

¹³ Ami jo'ne auep'iiya'a joñe'me Dios Lec'oĝot, ami jamaĝalo jenjo' yediijec qaedi auanomitelegue queda'me ami ua'ajopa da'me at'oyaĝaqui jo'ne yataqatelegue.

Da'me qonetamelo'te jogaa'me loeco lo'olpi

¹⁴ 'Uo da'me qadeuataqataĝanaĝac joñe'me Dios, qa'a jayatenaq queda'me qom 'uo ga'me jo'ne jiyaĝanaqaque, qom naq'aeta da'me loequenataĝanaĝac joñe'me, qama'le qo'mi naquiaĝanalo.

¹⁵ Nataq'aen qom naq'aeta da'me jayatenaq queda'me ñe'me Dios naquiaĝanalo jodaa'me qanetamenaĝaco, qama'le nach'e ena'am jayatenaq queda'me joote qo'mi yanema ga'me jo'ne jiyaĝanaqaque.

¹⁶ Qama'le qom jauanaĝa ga'me qadaqayolec da'me yejamaĝatalegue da'me ya'uo ga'me loec jo'ne maqachaĝa ja yovidaĝa'ta da'me leleuaĝa, 'noota qom ñetamenaĝalegue, qaedi Dios yanem da'me netouenaĝac ga'me qadaqayolec. Qom naq'aeta ga'me loec 'me ya'uo jo'ne maqachaĝa ja yovidaĝa'ta da'me leleuaĝa, qama'le Dios yataqachiñe yanem da'me netouenaĝac. Qalaĝaja, 'uo ga'me loe'j gaa'me jiyaĝadipi jo'ne eja yovidaĝa'ta da'me leleuaĝa, qama'le naqaega loe'j jo'ne ja jaqanatetaq ta'le ñetamenaĝalegue.

¹⁷ Yema gaa'me ja chimadichidiñe mach'e ja no'en. Qalaĝaja uo'oe gaa'me loeco joga'me jiyaĝadipi jo'ne maqachaĝa ja yovidetaĝateda'a da'me leleuaĝa.

Jesús mach'e Lec'oĝot joñe'me Dios jo'ne eja

¹⁸ Yataqachiñe jayatenaq queda'me ena'uaque gaa'me Dios lec'oqo'tolqa ja maliaĝa quetalo'te gaa'me loeco, dite ñe'me Dios Lec'oĝot netelalo jogaa'me qama'le ñe'me payac ja yaqanatet ta'le 'uo ga'me 'yeteque.

¹⁹ Nataq'aen jayatenaq queda'me yataqachiñe qo'mi Dios lec'oqo'tolqa, nataq'aen queda'me yema jogaa'me jiyaĝadipi jo'ne ja 'noe'n uetedalegue da'me lañoqotaĝanaĝac ñe'me payac.

²⁰ Nach'e ena'am jayatenaq queda'me ñe'me Lec'oĝot joñe'me Dios joote naequena, qama'le qo'mi yanema da'me qadetadenataĝanaĝac qaedi yataqachiñe jatetonaq joñe'me Dios jo'ne eja. Nataq'aen 'noota qom 'ñañaĝataĝala't da'me qolaqatalegue ñe'me jo'ne yataqata eja, naq'aeta da'me qolaqatalegue Lec'oĝot Jesucristo. Naqaeñe mach'e Dios yataqata eja, jo'ne qo'mi yanema da'me qat'oyaĝac jo'ne yataqatelegue.

²¹ Ami yalaqapi, achiya'agueta jo' naa'me qonetamenapecoto jo'ne ja ejoda.