1 Corintios 8 - Nuevo Testamento Toba Sombrero Negro

Niqui'yaqa'te jo'ne joote qoyiyota'alo 'me qoyanema nale ga'me qop'iya'alo jo'ne ch'e 'nonataqa

¹ Nayi ja'ateguet da'me jayem auenachiyec ga'me lapat jo'ne joote qoyanema gaa'me qop'iyapegalo jo'ne ch'e 'nonataqa. Yataqachiñe eja da'me dojo' 'naqatac: “Ena'uaque qo'mi jayatenaq da'me jo'ne yataqata eja.” Qalaĝaja da'me nayatenaĝanaĝac 'yetem ga'me jiyaĝaua da'me ma'te 'yoĝodenaĝaic; joda'me noqopich'i qamqa'me 'yañaqatet joga'me.

² Qom 'uo ga'me nepetapela't da'me 'uo ga'me layatenaĝanaĝac, maliaĝa ja yayaten ga'me jo'ne yataqachiñe ye'et.

³ Qalaĝaja gamachaqaega jo'ne noqopita ñe'me Dios, ñe'me Dios yataqachiñe yateton joga'me.

⁴ Chane'eja da'me qoyalic ga'me lapat jo'ne joote qoyanema nale ga'me qonetametapecoto nequi'il: jayatenaq queda'me qaya'te gamachaqaega lajo'viyaĝac ga'me nequi'i jo'ne uetalegue jena'me aleua, nataq'aen jaldata da'me onolec ñe'me Dios, qaya'te laqaya.

⁵ Eja queda'me uo'oe gaa'me jo'ne eetedapega naqaegaua di'yo't jo'ne uedo'ot di'me piyem nataq'aen uedalegue jena'me aleua 'me 'uo da'me lañoqotaĝanaĝa'j jo'ne nach'egaua qonetamenoto,

⁶ qalaĝaja qo'mi qamqa'me jayatenaq queda'me 'uo ñe'me Dios jo'ne onolec, mach'e Qadet'a jo'ne 'netoqo't ena'uaque gaa'me uo'oe, nataq'aen qo'mi yanema da'me qat'oyaĝac jeloqot'ot joñe'me. Nach'e naq'aeta queda'me onolec ñe'me Jaliaĝanec Jesucristo nach'eñe necochoqo't ñe'me Dios joca'li ye'et jena'me aleua nataq'aen ena'uaque gaa'me uo'oe, qama'le da'me qo'mi joda'me qat'oyaĝac chiyoĝoguet joñe'me.

⁷ Qalaĝaja uo'oe gaa'me jo'ne maliaĝa ja yayate'n da'me dojo'. Uo'oe gaa'me maliaĝa uetauelo da'me loe'j 'me toijec da'me netamenoto gaa'me ch'e nequi'il, chayovida'a nayi maliaĝa uenateteda'a gaa'me nequi'il nale yali'j ga'me lapat jo'ne joote qoyen najaqajec. Chane'eja queda'me qaya'te 'lañaĝac da'me letadenataĝanaĝa'j, jogaa'me eetapela'ajalo 'naĝa't ga'me lapat jo'ne yali'j.

⁸ Qalaĝaja da'me chiyaqayi da'me Dios qo'mi yaconegueta ja yajouaĝat ga'me jo'ne jaliguinaq; ja naqaeda ta'le qo'mi lama'ajoda ja 'noe'n ta'le jaliguinaq, uotaĝa yataqachiñe qo'mi 'noote' ta'le jaliguinaq.

⁹ Qalaĝaja 'noota qom at'oiya'aguet ta'le naqa'ami chiyaqayilo da'me a'naĝachi ga'me adaqayai jo'ne maliaĝa qaya'te 'lañaĝac da'me latetonaĝanaĝac, qa'a jouaĝat da'me auayotelegue da'me aualiqui ga'me lapat jo'ne joote najaqajec.

¹⁰ Qa'a am jo'ne 'uo da'me adayatenaĝanaĝac onetaue ga'me tamenaqa' 'me na'ña ga'me nequi'i da'me aueque'e, qama'te am yauana ga'me adaqaya 'me qaya'te 'uo da'me 'lañaĝac, ¿qo'li ja jetaque am naya'a ga'me qaedi nach'e ena'am yalic ga'me lapat jo'ne joote qoyen najaqajec?

¹¹ Chane'eja jouaĝat da'me adayatenaĝanaĝac, ga'me adaqaya jo'ne qaya'te 'lañaĝac da'me latetonaĝanaĝac male yejomac, jo'ne nach'e ena'am Cristo nemeguet ca'li yeleu.

¹² Nach'eda naq'aeta da'me aua'uo adoec jo'ne anautena ñe'me Cristo, queda'me nauteta gaa'me adaqaya' da'me yauote loe'j nataq'aen 'naĝa't da'me letadenataĝanaĝa'j jo'ne maliaĝa ja t'añi.

¹³ Chane'eja, qom ga'me jalic chiyaqayi da'me ya'uo loec ga'me yaqaya, qama'le 'noota da'me ja yitaĝa jalic ga'me lapat, qaedi ja yitaĝa chiyaqajeguem ga'me yaqaya.