1 Corintios 7 - Nuevo Testamento Toba Sombrero Negro

Qom a'uoñi, 'noota qom a'nonaĝachiyeguilo naa'me adouadi'

¹ Nayi male ja'ateguet ga'me quelqaya jayem anedaĝañiya. Eja, 'noota qom ga'me jiyaĝaua ja yepotetapega gamachaqaega yauo.

² Qalaĝaja, queda'me 'uo da'me nequejeguetaĝa, qama'le 'noota ta'le onolqa'tape uo'oe naa'me loua', nataq'aen onole'tape yauo uo'oe gaa'me mach'e loua'.

³ Qama'le ñe'me jiyaĝaua 'noota qom yataqachiñe yelo'teguet jaga'me mach'e loua, nach'e naq'aeta jañe'me yauo 'noota qom yelo'teguet ga'me mach'e loua.

⁴ Qa'a jaga'me yauo male ja loĝot da'me mach'e 'loyaĝac, dite ñe'me loua ena'am ta'le loĝot, nach'e naq'aeta ñe'me jiyaĝaua ena'am ta'le ja loĝot da'me mach'e 'loyaĝac, dite jaga'me loua male loĝot.

⁵ Chane'eja gaa'me joote noua' 'noota qom ja nematedapiye nale da'me 'loyaĝa'j queda'me yataqachiñe qoyeloĝonaĝa'ta. Qalaĝaja qom ga'me jiyaĝaua nataq'aen jaga'me loua joote nayatena't queda'me cha'li uo'oe gaa'me noloqo'ote da'me nemana't, qaedi yemeda'a da'me netamenaĝa'j jogaa'me, qom yenoĝonegue ena'uac qama'le yemta yitaĝa uaĝata't jogaa'me, qaedi ñe'me payac ja ami 'te noma't, qa'a ja cop'a da'me aue'yaĝañiya'aguet da'me auepochiya jaga'me yauo.

⁶ Qalaĝaja ja ami 'te jamaĝalo'te ta'le auauoyi da'me dojo', dite da'me ami jaje'tema.

⁷ 'Yamaqatenataĝanaĝac ta'le ena'uaque jayem aueñiya'am, qalaĝaja yodapecache gaa'me jo'ne Dios ami yeyala'aque: uo'oe gaa'me joote Dios yeyala'aque qaedi 'uo ga'me lajoĝo'j nataq'aen gaa'me laqaya' ga'me lajoĝo'j laqaya.

⁸ Ami jo'ne jamaĝayaqa nataq'aen ami p'ayaqa: yataqachiñe 'noota ta'le ja yitaĝa a'uoñi, ena'am da'me jayem.

⁹ Qalaĝaja, qom ja adaloyeguet da'me anejiyaĝauayaĝaqui lamaic, qama'le 'noota da'me yitaĝa a'uoñi, qa'a ja 'noota qom ovitapeguet da'me at'onáĝaqui lamaic.

¹⁰ Ami jo'ne joote a'uoñi, ami jamaĝalo'te dojo' namaĝajoĝonaĝac jo'ne ja mach'e yoĝot, dite ñe'me Jaliaĝanec: am yauo, ena'te aueguem ñe'me adoua.

¹¹ Qalaĝaja qom aueguem, qama'le nach'e aueta't am onole, uotaĝa a'viyelaĝa ñe'me adoua. Nataq'aen am jiyaĝaua, ena'te auamaĝaye jaga'me adoua.

¹² Nataq'aen ami ja'aĝatema dojo' jo'ne ja 'laqatac ñe'me Jaliaĝanec ca'li: qom 'uo ga'me adaqayai jo'ne p'etaqadaic 'uo jaga'me loua jo'ne ja p'etaqadai, qalaĝaja jaga'me jetaque que'tot da'me ue'tajop joñe'me, qama'le 'noota qom ja yaĝañi uotaĝa ta'le jetaque yeguem jaga'me.

¹³ Nataq'aen gamachaqaega adaqayai jo'ne p'etaqadai jaga'me, 'uo ga'me loua jo'ne ja p'etaqadaic, qalaĝaja ñe'me jiyaĝaua jetaque que'tot da'me ue'tajop jaga'me, qama'le jaga'me 'noota ta'le ja yamaĝaye uotaĝa ta'le yataqachiñe yeguem.

¹⁴ Qa'a ga'me jiyaĝaua jo'ne ja p'etaqadaic yovida'ya da'me liyamaĝadenataĝanaĝac ñe'me Dios qa'a yajouaĝat da'me uaĝayet jaga'me yauo jo'ne p'etaqadai; nach'e naq'aeta jaga'me yauo jo'ne ja p'etaqadai yovida'ya da'me liyamaĝadenataĝanaĝac ñe'me Dios qa'a yajouaĝat da'me necoñeteguet joga'me p'etaqadaic. Qom ja naq'aeta, qama'le gaa'me ac'oqo'chedi' ena'am ta'le qaya'te niyamaĝadenatague'j, qalaĝaja yataqata Dios e'n ja 'nalo'te jogaa'me.

¹⁵ Qalaĝaja qom ñe'me jo'ne ja p'etaqadaic jetaque yeguem qaedi ca'e jaga'me loua jo'ne p'etaqadai, 'noota da'me ec. Qom naq'aeta qama'le jaga'me p'etaqadai male ja qopacapegue' qaedi ue'tajop ga'me jo'ne qaya'te lepe'e. Nach'e naq'aeta qom jaga'me jo'ne ja p'etaqadai jetaque ca'e ga'me loua jo'ne p'etaqadaic, 'noota da'me ec, qa'a Dios ami yiyaĝanalo qaedi 'uo da'me at'emaĝaqui.

¹⁶ Qa'a, am yauo, ¿qo'li naqaeda ta'le auayaten da'me uotaĝa anec'alaĝategue qomle ga'me adoua? Nataq'aen am jiyaĝaua, ¿qo'li naqaeda auayaten da'me uotaĝa anec'alaĝategue qomle jaga'me adoua?

'Noota ta'le auauoyi ga'me jo'ne Dios yepaquetapega

¹⁷ Qalaĝaja, 'noota ta'le onolqa'tape ja yaĝanegue da'me jalchi'ena 'loyaĝac jo'ne Jaliaĝanec yanem nataq'aen nach'edata 'nañaĝatec ga'me Dios yanem ca'li qoyiyaĝana. Naq'aeta da'me japaĝagueneque ena'uaque joga'me p'etaqadaiquipi.

¹⁸ Gamachaqaega jo'ne joote 'uo ga'me nichaĝajec 'me 'naĝajet, 'noota qom ja eetapela't qaya'te yédiñe, nataq'aen gamachaqaega jo'ne maliaĝa qaya'te 'nanaĝajet 'me nichaĝajec ca'li qoyiyaĝana, 'noota qom ja yaconeguet da'me nichaĝajoĝonaĝac.

¹⁹ Qa'a ñe'me Dios ja naqaeda pacapegue' ta'le joote qo'mi qo'yaneque ga'me nichaĝajoĝonaĝac uotaĝa maliaĝa qaya, dite da'me yataqachiñe jeyamaĝata' daa'me lamaĝajoĝonaĝaco.

²⁰ Chane'eja 'noota ta'le onolqa'tape 'nañaĝatec ga'me jo'ne joote qoyanem ca'li yemta qoyiyaĝana.

²¹ Qom am nelatac da'me am qoyiyaĝana qaedi 'uo da'me adepe'e, ena'te lichigui auen na'me adauel, nach'e ena'am am uojotañi qama'le auepitaqatenac.

²² Qa'a ga'me jo'ne nelatac qom qoyiyaĝana qaedi napeteneguet ñe'me Cristo joga'me male joote lalemaĝajet ñe'me Jaliaĝanec. Nach'e naq'aeta da'me qom qoyiyaĝana ga'me jiyaĝaua jo'ne uojotañi, joga'me male joote Cristo lelatac.

²³ Ena'te auajeñeta ta'le jiyaĝa'u laqaya' ami e'n lelataqa jogaa'me, qa'a Dios joote ami ecoto joca'li.

²⁴ Chane'eja, ami yaqaya'olqa, jalcote 'noota ta'le onolqa'tape uetaue da'me Dios lec'atenaĝanaĝac, nach'eda q'aen da'me ca'li yemta qoyiyaĝana.

Napaĝaguenataĝanaĝac jo'ne qoyanema jogaa'me jamaĝayaqa

²⁵ Nayi japaĝague'n jogaa'me jamaĝayaqa: dojo' qaya'te lapaĝaguenataĝanaĝac ñe'me Jaliaĝanec ta'le yeloĝonaĝa'teguet joda'me, qalaĝaja ami janema da'me mach'e yelnataĝac, nach'eda lelnataĝac ga'me jo'ne joote yedalegue da'me Dios lichoĝodenataĝanaĝac, qama'le auaqanachichi da'me a'uamaqachiñe.

²⁶ Male novi't qomle gaa'me noloqo'ote jo'ne jalcote da'me qadachoĝodec, chane'eja 'uo da'me yelnataĝac queda'me ja 'noota ta'le gaa'me jamaĝayaqa yaĝadegue ga'me ueteda'a.

²⁷ Am jo'ne joote auo'on, ena'te aueguem jaga'me adoua; nataq'aen am jo'ne jamaĝaic, ena'te auelaque da'me at'onáĝac.

²⁸ Qalaĝaja, qom auo'on ja naqaeda ta'le adoec; nach'e naq'aeta jaga'me q'añole jo'ne a'uoneguet ja naqaeda ta'le ya'uo loec. Qalaĝaja ja copa'alo da'me 'uo ga'me laqalaje't jogaa'me, nach'eda jo'ne jetaque ja ami 'te yedalo'te.

²⁹ Ami yaqaya'olqa, ami jayataĝadeneque: ja cop'a qomle novideda'aquena gaa'me p'atedegue noloqo'ote. Chane'eja gaa'me jo'ne ja jamaĝayaqa, yataqachiñe 'noota ta'le yacoteguet da'me ena'am ga'me jamaĝaic.

³⁰ Gaa'me jo'ne noyetedapelegue ga'me najouaĝane'j, 'noota qom ena'am ta'le qaya'te 'uo da'me 'loyaĝac. Nataq'aen gaa'me jo'ne 'uo ga'me netotedapec, 'noota qom ena'am ta'le qaya'te netotedapec. Nataq'aen gaa'me jo'ne neuode'tape, 'noota ta'le ja yiyamaĝa't ga'me neuodenaĝa't.

³¹ Nataq'aen gaa'me jo'ne chiyoĝotedaye da'me 'lonataĝanaĝa'j jena'me aleua, qama'le 'noota qom ja nach'edata yemeda'eguet da'me chiyoĝotedaye jena'me, qa'a da'me 'loyaĝac jena'me aleua yamta'le yem.

³² Qalaĝaja jayem jepaquetapega ta'le ami qaya'te adachitataiqui. Joga'me p'etaqadaiquipi jo'ne jamaĝayaqa chitatatedapega da'me ye't joda'me 'lonatac ñe'me Jaliaĝanec, nataq'aen uenate'ta da'me qaedi matac q'aen ñe'me Jaliaĝanec.

³³ Joga'me p'etaqadaiquipi jo'ne uo'oe gaa'me loua' qamqa'me chitatatapega ta'le yauanalo gaa'me uo'oe jena'me aleua, qaedi made'tape q'ae'n jogaa'me loua',

³⁴ qama'le naq'aeta ga'me mach'e yepaquetapegalo ja nalo'ta't. Nach'e naq'aeta da'me 'loyaĝa'j jogaa'me p'ail nataq'aen jogaa'me jamaĝail uenateteda'a ta'le ye't ga'me 'lonatac ñe'me Jaliaĝanec; t'onataĝaneuo'o qaedi ñe'me Jaliaĝanec ja 'nalegue q'aen ga'me lapat nataq'aen lepaqal. Qalaĝaja jaga'me ja jamaĝai qamqa'me uenatetapegalo gaa'me uo'oe 'me uedalegue jena'me aleua nataq'aen qaedi matac q'aen ga'me loua.

³⁵ Ami ja'aĝatema da'me dojo' qa'a jetaque ami yecochiyalo. Ja naqaeda da'me ena'am ta'le ami jachalo'te da'me ami jecoñe't, dite da'me jetaque ami japaĝagueneque onaĝaic adajoĝoqui, qaedi qaya'te gamachaqaega ademiya'a da'me a'uonataĝañiuo'o ñe'me Jaliaĝanec.

³⁶ Qom 'uo gamachaqaega mach'ega yayaten queda'me ja en 'te yataqatelegue da'me lajoĝoc queda'me joote 'uo jaga'me nayate'ne', qom napacapelegue ga'me lamaic joga'me, nataq'aen lelnataĝac da'me paja'a 'uona't, qama'le 'noota da'me joote naq'aeta ga'me lelnataĝac, qa'a ja naqaeda ta'le ya'uo loec: 'noota da'me 'uona't.

³⁷ Qalaĝaja qom 'uo gamachaqaega jo'ne joote yachimaĝachichiñe da'me lelnataĝac queda'me ja 'uoneguet jaga'me 'naĝataqate, nataq'aen ga'me ja napacapelegue da'me lamaic ga'me 'lonaĝac, dite da'me yaqanatet ta'le noma't jogaa'me lamaico, qom naq'aeta ga'me lelnataĝac qama'le yataqachiñe 'noota ga'me ya'uo.

³⁸ Qama'le ga'me jetaque 'uoneguet jaga'me 'naĝataqate, 'noota da'me ya'uo. Qalaĝaja ga'me ja jetaque uo'on, joga'me yataqachiñe 'noota da'me ya'uo.

³⁹ Qom 'uo jaga'me yauo jo'ne joote 'uo ga'me loua qama'te jetaque 'uoneguet ga'me jiyaĝaua laqaya, dojo' yataqachiñe ja qoyajeta qom cha'li nec'aletaye ga'me loua toijec. Qalaĝaja qom yeleu ga'me loua qama'le jaga'me yiyamaqa'teguet da'me 'uoneguet ga'me jo'ne 'yamaqaten jaga'me, qalaĝaja jaldata da'me qom ena'am p'etaqadaic joga'me.

⁴⁰ Mate mane'e yelnataĝac queda'me yataqachiñe machiñe q'aen jaga'me ta'le ja yitaĝa uo'on. Naq'aeta da'me yelnataĝac, nataq'aen jeetapega jayem yaloĝonegue ñe'me Dios Lepaqal.