1 Corintios 6 - Nuevo Testamento Toba Sombrero Negro

'Noota qom onolqa'tape ja dachinataĝalegue ga'me laqaya nale auajoyiya'agueta joga'me jiyaĝadipi nec'atenoqo'tpi 'me ja p'etaqadayaqa

¹ Qom 'uo gamachaqaega ami jo'ne necotayapegue' ga'me mach'e laqaya, 'noota qom ja chinataĝalegue da'me 'yaĝatot ga'me jiyaĝadipi nec'atenoqo't jo'ne ja p'etaqadaic, dite da'me mach'ega ga'me Dios lec'oqo'te nemitaque ga'me najouaĝajet.

² ¿Qo'li ja auayachiñe queda'me nach'ega ga'me Dios c'oqo'tepi ja cop'a qomle da'me ya'uo nec'atenaguec ena'uac ga'me 'uo jena'me aleua? Qama'le qom naqa'ami auauoyi da'me nec'atenaguec yema ga'me 'uo jena'me aleua, ¿toqoch'e ja auaqanachichi da'me anemichiyaque ga'me chiyaqayi da'me anecotaĝaqui jo'ne ja let'adaic?

³ Qama'le qom naq'aeta da'me chayovida'alo gaa'me piyem laje' ñemitaqaque ga'me lajouaĝaje't, chane'eja ¡yataqachiñe chimaqachiñe da'me jaqatatetac da'me jeloĝolo'te gaa'me lajouaĝaje'te da'me mach'e qat'oyaĝac nayi!

⁴ Qama'le qom 'uo da'me anecotaĝaqui jo'ne chiyaqayi da'me ja aniyamaĝadeñiya't, ¿toqoch'e a'uaĝachiyoto nale ga'me jiyaĝadipi nec'atenoqo'tpi jo'ne ja yayate'n da'me lajoĝo'j joga'me Dios lec'oqo'tepi?

⁵ Chane'eja ñenaĝategue da'me dojo' qaedi 'uo da'me adepocoĝoqui: ¿qo'li qaya'te yatenaĝanaĝaic da'me ami, jo'ne yaqanatet da'me nemitaque ga'me chiyaqayi ga'me lajouaĝajet ga'me adepi'iyaĝauai?

⁶ ¡Ja jaldata da'me mach'egaua nepi'iyaĝa'u da'me deloiquitapega't, dite nach'e ena'am yeda'alo da'me necotaĝa'j joga'me jiyaĝadipi nec'atenoqo't jo'ne ja p'etaqadayaqa!

⁷ Qalaĝaja joote jalcote da'me anepachiñe queda'me 'uo da'me dojo' ja aniyamaĝadeñiya't. ¿Qo'li ja 'noota ta'le anapogaĝadeñiyeguet ga'me ja chimaqachiñe? ¿Qo'li ja 'noota ta'le anajeñe'teguet da'me ami qodecachiyoto?

⁸ Qalaĝaja ¡ami qamqa'me auauoyi da'me ja chimaqachiñe nataq'aen chayovida'a gaa'me yataqachiñe adaqayadi' auecachiyoto nale!

⁹ ¿Qo'li ja auayachiñe joona gaa'me ja 'noe'n ja yaqanate't ta'le tadoue da'me lejaliaĝa joñe'me Dios? ¡'Noota qom yataqachiñe auayachiñe da'me dojo'! Uotaĝa gaa'me jo'ne 'yetedac da'me nequejeguetaĝa, uotaĝa gaa'me jo'ne p'iya'alo ga'me ch'e nequi'il, uotaĝa gaa'me jo'ne ja neteleta da'me yataqatelegue 'lonáĝa'j, uotaĝa gaa'me le'mi jo'ne yadenaĝa't da'me yauo 'loyaĝac qama'le nemedoue da'me nequejeguetaĝa,

¹⁰ uotaĝa gaa'me dalataĝa'n nale decachi'y, uotaĝa gaa'me pitaĝanaqataqayaqa, uotaĝa gaa'me taĝayaqa nale, uotaĝa gaa'me 'uenaĝanaĝayaqa, uotaĝa gaa'me cachaĝayaqa. Qaya'te onolec naa'me naajo' yaqanate't ta'le taue joda'me lejaliaĝa ñe'me Dios.

¹¹ Uo'oe gaa'me naq'aeta ca'li da'me 'loyaĝa'j. Qalaĝaja male ami qonachilaĝa'n; male joote ami qoyiyota'alo qaedi oviyo'ot ñe'me Dios; male ami qoye'n yataqatelo'te q'ae'n; nach'eda lañoqotaĝanaĝac ñe'me Jaliaĝanec Jesucristo nataq'aen Lepaqal 'me ja 'nalegue ñe'me Qanedios jo'ne ami 'yetema da'me dojo'.

Ena'te oquiyeguelo daa'me ch'e anejiyaĝauayaĝaqui lamaico

¹² Uo'oe gaa'me jo'ne enapega't: “Jayem qoyaje'tem yema ga'me jo'ne jetaque ja'uo.” Eja, qalaĝaja ja yema ta'le qo'mi lecochiyalo. Yataqachiñe eja da'me jayem qoyaje'tem yema ga'me mach'e jepaquetapega, qalaĝaja ja jemache'ta ta'le gamachaqaega jayem nomat.

¹³ Nataq'aen aueñiyapega chimaqachiñe ga'me adoequi nale aueñiyapega't: “Ga'me jaliguinaq qoya'uo qaedi taue jana'me qadeta'am, nataq'aen jana'me qadeta'am qoya'uo qaedi jenaĝa taue ga'me jaliguinaq.” Jaja'a, yataqachiñe eja da'me dojo', qalaĝaja Dios yapalaĝa't qomle jana'me qadeta'am nataq'aen ga'me jaliguinaq. Qama'le nach'e ena'am na'me qadapat: 'noota ta'le ja jenaĝa taue da'me nequejeguetaĝa, dite da'me qolaĝague ñe'me Jaliaĝanec, qa'a nach'eñe ñe'me jo'ne qo'mi yanema ga'me jouenaqataque.

¹⁴ Nach'eñe ñe'me Dios jo'ne joote 'niyelaĝachijeguem ñe'me Jaliaĝanec, qama'le qo'mi nataq'aen nach'eda da'me lañoqotaĝanaĝac qo'mi 'niyelaĝachidijeguem qomle.

¹⁵ ¿Qo'li ja auayachiñe queda'me lapachidiaĝac onolqa'tape da'me ami ena'am ta'le yoqoteta'uo da'me lapachidiaĝac ñe'me Cristo? Chane'eja ja 'noota ta'le jacona ga'me lapat lae ñe'me Cristo qaedi japeteneguet da'me lapachidiaĝac jaga'me quejeguetaĝai. ¡Ja jaqanatetaq ta'le je'etaĝam da'me dojo'!

¹⁶ Uotaĝa ¿qo'li ja auayachiñe joona da'me jo'ne leuaua jaga'me quejeguetaĝai, ñe'me nataq'aen jaga'me quejeguetaĝai male ena'am ta'le yemedaye da'me lapachidiaĝa'j jo'ne onolec? Qa'a naq'aeta da'me 'yaĝat joda'me nediijec joca'li, eet'oi: «Ga'me jiyaĝaua nataq'aen jaga'me yauo yovideta da'me yemedaye da'me lapachidiaĝa'j jo'ne onolec.»

¹⁷ Qalaĝaja ga'me jiyaĝaua jo'ne 'uaĝayet ñe'me Jaliaĝanec, ena'am ta'le ga'me lepaqal yataqachiñe yema'aguet ñe'me Dios Lepaqal 'me ja 'nalegue.

¹⁸ Qo'che' ami ja'aĝatema queda'me ¡'noota qom auajoye'guem da'me nequejeguetaĝa! Gamachaqaega qadoec laqaya jo'ne jauoqo nale ja 'naĝat da'me qadapachidiyaĝac. Qalaĝaja ga'me jo'ne taue da'me nequejeguetaĝa 'uo da'me loec jo'ne 'naĝat da'me mach'e lapachidiaĝac.

¹⁹ ¿Jeele ja auayachiñe queda'me adapachidiaĝaqui ena'am ta'le naqaega 'lachaqa' jo'ne netaue ñe'me Nepaqal 'me ja 'nalegue, nach'eda jo'ne ami yanema ñe'me Dios? Qama'le da'me ami ja naq'aeta ta'le adoqochidi' naa'me adapa'chidi',

²⁰ qa'a Dios joote ami ecoto joca'li. Qama'le 'noota ta'le a'uonataĝañiyalo naa'me adapa'chidi' qaedi a'nonaĝachiyegui joñe'me Dios.