1 Corintios 16 - Nuevo Testamento Toba Sombrero Negro

Netelaĝac jaga'me najaqaje joga'me p'etaqadaiquipi jo'ne neda'ña di'me Judea

¹ Nayi ami ja'ategueta da'me auauoyi adajaqajai, qom auachetaĝañi qaedi alecochiiyalo joga'me p'etaqadaiquipi 'me neda'ña di'me Judea: joote auayachiñe ga'me yoqotenaĝanaĝaco jo'ne janema ga'me p'etaqadaiquipi jo'ne ueteda'a di'me aleua 'me Galacia; 'noota ta'le nach'e ena'am ami auauoyi da'me dojo'.

² Jalcote 'noota ta'le nalochiguilo naa'me noloqo'ote 'me niyamaqataqa da'me onolqa'tape yiyota'a jaga'me naicaua, onole jaga'me yiyota'a jaga'me lomataĝanaqate nale yenoĝonegue ga'me semana, qama'le yiyamaĝat. Chane'eja qom ami jovitalo, qama'le ja jouetaque ta'le japetena't jaga'me nachetaqataĝanaqate.

³ Chane'eja aueloyapiye gaa'me jiyaĝa'u jo'ne adiquiyaqadi' qaedi naqaegaua yachi'y jaga'me adajaqajai; qom ami jovitalo qama'le janema jaga'me yediije jo'ne lomalate queda'me yauote da'me dojo', qama'le jamaĝategue di'me Jerusalén qaedi yadeuo jaga'me adajaqajai.

⁴ Nach'e ena'am qom aueñetapega 'noota ta'le jec'ata di'me Jerusalén, qama'le jayem quetegue joga'me.

Pablo 'yaĝatetac joda'me leuoĝoc

⁵ Da'me yeuoĝoc jetaque jalegue di'me aleua Macedonia; qama'le qom yeuotalegue di'me Macedonia qama'le jovita na'me Corinto,

⁶ nataq'aen jetaque cada'ac copa'ta da'me ami jouetauelo, uotaĝa chayovida'a yenoĝonegue jena'me naqaviaĝa da'me ami jouetauelo, qaedi jayem alecochiiya ga'me jajoyi qom yitaĝa ja'uo yeuoĝoc.

⁷ Qa'a nayi ja jetaque ch'e ami jec'atenaĝanalo da'me ami jayoĝolo'te, dite da'me 'uo da'me yeuataqataĝanaĝac qaedi cada'ac copa'ta da'me ami jouetauelo, qom naq'aeta da'me jayem yanem ñe'me Jaliaĝanec.

⁸ Qalaĝaja cha'li joue'ta jenjo' Éfeso chayovida'a yovita nolo' Pentecostés,

⁹ qa'a 'nouategue ga'me yadic qaedi jepitaqatenac da'me je'et ga'me 'yonatac jo'ne yataqachiñe p'ajaye, mate mane'e uo'oe qayoĝode' gaa'me qo'mi nautenalo.

¹⁰ Qom ami yovitalo ñe'me qadaqaya Timoteo, 'noota qom ja auauoyi loqolanaĝa da'me ami uetauelo ñe'me, queda'me yema'eguet ye'et da'me 'lonatac jo'ne yanem ñe'me Jaliaĝanec ena'am da'me jayem.

¹¹ Chane'eja 'noota qom qaya'te gamachaqaega ami ta'le 'yotan ñe'me, dite da'me alecochiiya qaedi 'uo da'me 'lemaĝac qom yitaĝa ya'uo leuoĝoc, qaedi jayem nec'atenaĝana, qa'a jeuatetaque, nach'e naq'aeta naa'me qadecochaĝa'u jena'me jenjo'.

¹² Ñe'me qadaqaya Apolo jalcote ñachoĝodetapecot qaedi equeguelo jogaa'me qadaqaya'olqa da'me ami dejapichiyalo, qalaĝaja nayi cha'li ja yaqanatet ta'le ec; ya'uo da'me dojo' qom 'uo ga'me ledaqa'.

Gaa'me p'atedegue 'naqataqa

¹³ Jalcote 'noota ta'le a'vicheta't nataq'aen a'nañaĝachiyec da'me oquiyegue da'me napaĝaguenataĝanaĝac jo'ne chiyaqayi ñe'me Dios, nataq'aen ami 'uañaĝayaqa nataq'aen nach'e aueñeta't.

¹⁴ Nataq'aen yema ga'me auauoyi, 'noota qom 'uo da'me adichoĝodenataĝanaĝaqui.

¹⁵ Ami yaqaya'olqa, joote auayachiñe queda'me Estéfanas nataq'aen gaa'me 'lachaqa' laje' nach'egaua 'uaediñe ga'me jiyaĝadipi di'me aleua Acaya jo'ne yacoteguet da'me 'laqataĝanaĝac ñe'me Jesucristo, nataq'aen nach'egaua yauote da'me qaedi lecochiyalo joga'me p'etaqadaiquipi.

¹⁶ Jepaquetapega ta'le oquiyeguelo jogaa'me jo'ne ena'ama jogaa'me, nataq'aen gamachaqaega qadaqaya yotauan da'me 'lonata'j joga'me.

¹⁷ Eja jayem matac queda'me novita jena'me jenjo' ñe'me Estéfanas nataq'aen Fortunato choqoñe'me Acaico, qa'a da'me ami ja ovi'tena,

¹⁸ joñaa'me jayem yate'm da'me machiñe q'aen, nach'e naq'aeta ca'li ami yate'm. Chane'eja ga'me jiyaĝaua jo'ne ena'ama joga'me, 'noota qom aueloyeguet.

¹⁹ Joga'me p'etaqadaiquipi jo'ne ueteda'a di'me aleua jo'ne Asia ami namaĝalo da'me lamai'j. Aquila nataq'aen Prisca, choqoga'me p'etaqadaiquipi jo'ne yema'a't nale ueda'a ga'me 'lachaqa't jalcote lamai'j ami yanema queda'me qademe'teguet ñe'me Jaliaĝanec.

²⁰ Nataq'aen ami yep'iye'tape naa'me qadaqaya'olqa jo'ne ueteda'a jena'me jenjo'. 'Noota qom auaqapalitapega't nale anep'iyeñiya't.

²¹ Jayem Pablo ami jedenaqatenalo jenjo' yep'iyenataĝanaĝac.

²² Qom 'uo ga'me ja noqopita ñe'me Jaliaĝanec, joote qoyachetalegue ga'me ne'uaĝanaguec jo'ne yataqachiñe t'adaic. ¡Am Qadejaliaĝanec, ja anayaloĝoden da'me auanaequena!

²³ 'Noota qom da'me lichoĝodenataĝanaĝac ñe'me Qadejaliaĝanec Jesús ami uetauelo.

²⁴ Ami joqopitalo, qo'mi jo'ne joqotaqa'taguet ñe'me Jesucristo. Male naq'aeta jenjo' 'yaqatac.